1 Ambuje Akunnungu ŵansalile che Musa, 2 ŵasalile Ŵaisilaeli kuti iŵaga mundu akulumbila kuti chachintyosya mundu atumiche ni Akunnungu pe, mundu jo akukombola kugopola nasili jakwe kwa kutyosya mbia jajiŵichikwe nti nnyi: 3 Jwannume jwa yaka ishilini mpaka sitini tachimmombola kwa ipande hansini ya madini ga feza malinga ni malamusi ga mitengo ja pamalo papaŵichikwe pajika kwaligongo lya Akunnungu, 4 iŵaga ali jwankongwe tachimmombola kwa ipande selasini ya madini ga feza. 5 Iŵaga ali jwanchanda jwa yaka nsano mpaka ishilini tachimmombola kwa ipande ishilini ya madini ga feza, nambo iŵaga ali mwali apeleche ipande likumi ya madini ga feza. 6 Mwanache jwannume jwangakwanila yaka nsano tachimmombola kwa ipande nsano ya madini ga feza, mwanache jwankongwe tachimmombola kwa ipande itatu ya madini ga feza. 7 Iŵaga ali jwannume jwakupunda yaka sitini tachimmombola kwa ipande kumi na tano ya madini ga feza, iŵaga ali jwankongwe tachimmombola kwa ipande likumi ya madini ga feza.

8 Nambo iŵaga mundu akuŵa jwakulaga nnope mwakuti ngakukombola kulipila ntengo wauŵichikwe peuto papaŵichikwe pajika kwaligongo lya Akunnungu kundikwe, anjausye mundu juŵanlumbilile jula kwa jwambopesi, nipele jwambopesi taŵiche ntengo malinga mundu jwakulumbila jo chichakombole kulipila.

9 Iŵaga kulumbila ko kukuŵa kutyosya chinyama chachikukundikwa kutyosya mbopesi kwa Ambuje Akunnungu, chinyama chanti yeleyo chatyosekwagao kwa Ambuje Akunnungu chikuŵa kwaligongo lya Akunnungu pe. 10 Mundu jwakulumbila jo akatindanya chinyama chachijimbele ni chinyama chakuganda pane chinyama chakuganda ni chinyama chachijimbele. Iŵaga chaatindanye chinyama kwa chinyama chine, nipele inyama yose iŵili chiŵe yakwe Ambuje. 11 Iŵaga akulumbila kupeleka chinyama changakundikwa kwa kwapopelela Akunnungu, nipele mundu jwakulumbila jo aichenajo chinyama cho kwa jwambopesi. 12 Jwambopesi alamule ntengo pakumala kuchilolalola chinyama cho muchiŵelele, iŵaga chili chakwimbala pane chakuganda. Ntengo uchaŵiche jwambopesi jo, chiuŵe uwowo. 13 Iŵaga nsyene chinyama cho akusaka kuchiwombola ajonjechesye pa mbiya sya ntengo wa chinyama cho liunjili limo pa maunjili nsano ga ntengo wakwe.

14 Mundu ajiŵikaga pajika nyuumba jakwe kwaligongo lya Ambuje Akunnungu, jwambopesi aŵiche ntengo mpela mwakujionela nyuumba jo iŵaga jambone pane ngaŵa jambone. Ntengo uchaŵiche wo chiuŵe uwowo. 15 Nsyene nyuumba jo asakaga kujiwombola nyuumba jakwe apeleche ntengo wa nyuumba jo, ajonjechesye liunjili limo pa maunjili nsano ga ntengo wakwe.

16 Mundu agaŵaga ngunda wa achinangolo wakwe ni kuuŵika pajika kwa ligongo lya Ambuje Akunnungu, ntengo wakwe chiuŵe malinga utupile wa mbeju syasisipandikwe mu ngunda wo, kilo ishilini sya shayili ntengo wakwe chiuŵe ipande hansini ya madini ga feza. 17 Iŵaga akuuŵika pajika ngunda wo kwaligongo lya Akunnungu pa chaka cha hansini cha kulechelelwa, ntengo wosepe uchiuŵichikwe chiuŵe ni uwowo pewo. 18 Nambo iŵaga chauŵiche pajika ngunda wo pakumala yaka hansini yakulechelelwa, jwambopesi taŵiche ntengo malinga ni yaka yaisigalile kuti ikwane yaka hansini, ni ntengo wake waulamulikwe chaapungusye. 19 Iŵaga nsyene akusaka kuuwombola ngunda wakwe, ajonjechesye liunjili limo pa maunjili nsano ga ntengo wakwe, nipele ngunda wo chiuŵe wakwe. 20 Nambo iŵaga ngakusaka kuti auwombole ngunda wo, pane iŵaga ngunda wo ausumisye kwa mundu jwine, nipele ngunda wo ngauwombolekwa sooni. 21 Pa chaka cha hansini cha kulechelelwa, wele ngunda wo chiuŵe wakwe Ambuje Akunnungu, ni ŵambopesi tachiujigala kuŵa wao.

22 Iŵaga mundu akuutyosya kwa Ambuje Akunnungu ngunda wausumile yaani ngunda wangaŵa wa achinangolo ŵakwe, 23 jwambopesi aŵicheje ntengo pakuŵalanjila mbiya sya yaka yaisigalile kwichila yaka hansini ya kulechelelwa, nipele mundu jo apeleche mbiya syo lisiku lilyolyo ni mbiya syo sisiŵe syakwe Ambuje Akunnungu. 24 Pa chaka cha hansini cha kulechelelwa, ngunda wo chachimmuchisya mundu juwasumisye, ajula juŵaliji nsyene ngunda.

25 Mitengo jakuwombolela indu jilamulikwe malinga ni mitengo jakuŵalanjila peuto papaŵichikwe pajika kwaligongo lya Akunnungu, gela ishilini kwa gilamu kumi na moj ja madini ga feza.

26 Pangali mundu juchammiche pajika kwaligongo lya Ambuje Akunnungu, jwandanda kupangwa jwalijose jwa inyama, pakuŵa jwaandanda kupagwa ali jwakwe Ambuje Akunnungu kutyochela kalakala. Jiŵeje ng'ombe pane ngondolo, ali ŵakwe Ambuje Akunnungu. 27 Nambo naga akuŵa chinyama changakundikwa kwa kwapopelela Akunnungu achiwombole kwa ntengo utaaŵiche jwambopesi ni konjechesya liunjili limo pa maunjili nsano lya ntengo wakwe. Iŵaga ngakuchiwombola, achisumisye kwa ntengo utaaŵiche jwambopesi.

28 Nambo chindu chachiŵichikwe pajika kwaligongo lya Akunnungu, chiŵeje mundu pane chinyama pane ngunda ngachikomboleka kuchiwombola pane kuchisumisya. Chilichose chachiŵichikwe pajika kwaligongo lya Akunnungu, ni sooni chili chakwe Akunnungu kusyenesyene. 29 Mundu jwalijose jwatyosyekwe kwa Ambuje Akunnungu kuti aulajikwe ngaikomboleka kummombola. Mundu jwanti yeleyo akusachilwa aulajikwe.

30 Liunjili limo pa maunjili likumi ga magowolo ga muchilambo, iŵeje ngano pane isogosi ya mu itela lili lyakwe Ambuje Akunnungu, lili lyakwe Ambuje Akunnungu, ni sooni ili yeŵichikwe pajika kwaligongo lya Akunnungu. 31 Mundu asakaga kuchiwombola chilichose mu liunjili limo pa maunjili likumi, ajonjechesye liunjili limo pa maunjili nsano ga ntengo wakwe. 32 Nkati ilango paikuŵalanjikwa, chinyama chimo pa inyama likumi chili chakwe Ambuje Akunnungu. 33 Chinyama cho ngachisagulikwa kwa kwimbala pane kuganda, kuti achitindanye. Iŵaga akuchitindanya chinyama cho ni chinyama chine, inyama iŵili yosepe chiŵe yakwe Ambuje Akunnungu, ni ngaikomboleka kuiwombola.

34 Gelega ni malamusi gele Ambuje Akunnungu ŵampele che Musa pa chitumbi cha Sinai kuti ŵaasalile ŵandu ŵa ku Ŵaisilaeli.