Levítico 20

Majamuko ga sambi

1 Ambuje Akunnungu ŵansalile che Musa, 2 ŵasalile Ŵaisilaeli kuti "Mwisilaeli jwalijose pane jwannendo jwakutama mu Isilaeli juchantyosye jumo jwa achiŵanagwe kuŵa mbopesi kwa nnungu jwakuŵilanjikwa Moleki, mundu jo aulajikwe. Ŵandu ŵakutama pelepo chammulaje kwa kumputa ni maganga. 3 Uneji nansyene chinjinkana mundu jo ni kuntyosya pasikati pa ŵandu ŵakwe pakuŵa antyosisye jumo jwa achiŵanagwe aŵe mbopesi kwa nnungu jwakuŵilanjikwa Moleki, alitesile lisakasa lyaliŵichikwe pajika kwaligongo lyangu likakundikwa kwa kwapopelela Akunnungu ni kulitukana liina lyangu. 4 Iŵaga ŵandu ŵakutama pelepo wo ngasanjamuka mundu jo katema paakuntyosya jumo mwa achiŵanagwe kwa nnungu Moleki, ŵaalekaga kumbulaga, 5 uneji nansyene chinjinjamuka mundu jo pamo ni ŵamunyuumba jakwe, ni uneji tinjaŵika pajika jwelejo pamo ni ŵandu wose ŵaakunkuya, ŵaangaangulupilila une ni kumpopelela nnungu Moleki.

6 "Iŵaga mundu akwaula kwa ŵandu ŵakutenda isango pane kwa misimu ja ŵandu ŵawile ni kuleka chikulupichiko kwanguune, chinjinjamuka mundu jo ni kuntyosya pasikati ja ŵandu ŵangu. 7 Kwapele nliŵiche pajika kusyenesyene kwaligongo lyangu ni kusigalila upaande wangu, pakuŵa uneji ndili Ambuje Akunnungu, Akunnungu ŵenu. 8 Ngakamulisye makanyo gangu ni kupanganyichisya masengo. Uneji ndili Ambuje Akunnungu junguntenda mme upaande wangu."

9 Mundu jwalijose jwakunlwesya atatigwe pane achikulugwe, aulajikwe. Anlwesisye atatigwe ni achikulugwe, kwapele taliichisye chiwa chakwe nsyene.

10 Jwannume atendaga chikululu ni jwankongwe jwa mundu jwapachiŵandi pakwe, ŵandu ŵaŵili wo aulajikwe. 11 Ni mundu agonaga ni jwankongwe jwa atatigwe akuntesya soni atatigwe, ŵandu ŵaŵili wo aulajikwe. Ŵanyawo aliichisye chiwa chao achinsyene. 12 Mundu jwalijose agonaga ni jwankongwe jwa mwanache jwakwe, ŵele ŵandu ŵaŵili aulajikwe. Chaatesile cho chili chakuŵagula, aliichisye chiwa chao achinsyene. 13 Jwannume jwalijose agonaga ni jwannume njakwe nti yakuti kugona jwannume ni jwankongwe, ŵandu ŵaŵili wo aulajikwe pakuŵa atesile chindu cha chakunyalapikwa, aliichisye chiwa chao achinsyene. 14 Iŵaga mundu akulombela jwankongwe, sooni ni kulombelaga achikulugwe jwankongwe jo, welewo uli ugongomalo, atinichikwe mooto ŵanawose ŵatatu, yaani jwannume, jwankongwe jo ni achikulugwe, kuti ukapagwa ugongomalo pasikati jenu. 15 Jwannume jwalijose agonaga ni chinyama aulajikwe, ni chinyama cho chiulajikwe. 16 Jwankongwe achisejelelaga chijama ni kugona nacho, mummulaje jwankongwe ni chijama cho, aliichisye chiwa chakwe nsyene.

17 Jwannume jwalijose alombelaga nlumbugwe, yaani mwali jwa achikulugwe pane atatigwe ni kugona nawo, chelecho chili chindu chakutesya soni. Ŵandu wo atyosekwe mu mpingo wa ŵandu ŵao. Jwannume jo anchembulwisye nnumbugwe, kwayele ajamuchikwe kwa chindu chatesile. 18 Jwannume agonaga ni jwankongwe jwakulwala ulwele wakwe wa chikongwe, ŵandu wo asokonywele kujikukopoka miasi, nombe jwankongwe jo alosisye kumasisimilo kwakwe. Wose ŵanaŵaŵili wo atyosyekwe mu mpingo wa ŵandu.

19 Nkagona ni achikulu ŵenu ŵakulungwa pane mati ŵenu pakuŵa chele chindu cho chichatesye soni achalongo ŵenu ŵakuŵandichila. Ŵanyamwe ŵanaŵaŵili wose tinjamuchikwe. 20 Jwannume agonaga ni jwankongwe jwa atatigwe ŵakulungwa pane ŵanandi akwataga soni atatigwe ŵakulungwa pane ŵanandi. Wose ŵaŵili chajamuchikwe kwa ugongomalo wao, chawe pangaŵeleka. 21 Mundu alombelaga jwankongwe jwa mkulugwe, chele chindu cho chili changalumbana; akuntesya soni nkulugwe. Wose ŵaŵili ngasaŵeleka.

22 Ambuje Akunnungu ŵaasalile "Nkamulisye makanyo ni malajisyo gangu gose, kuti chilambo chingunjausya kutama cho chikankana kutama mu chilambo cho. 23 Nkajaula kukuya masyoŵelelo ga ŵandu ŵa ilambo ungwaŵinga mmbujo mwenu, pakuŵa ŵanyawo ŵaitesile yele yose ni une naachimile kwannope. 24 Nambo masile kunsalila kuti, chinjigale chilambo chao, ni une chinampe chiŵe chenu, chilambo chachikufai kwa kulima ni kulanga. Uneji ndili Ambuje Akunnungu, Akunnungu ŵenu junanlekangenye ni ŵandu ŵa ilambo ine. 25 Kwaligongo lya yeleyo chinkombole kulekanganya pasikati ja chinyama chachikukundikwa ni changakundikwa, ni pasikati ja chijuni chachikukundikwa ni changakundikwa kwa kwapopelela Akunnungu. Nkalitesya ŵangakundikwa kwa ligongo lya chinyama pane chijuni pane chachilichose chachikukwaŵa palitaka, yeila inaiŵilasile kuŵa yangakundikwa kwa kuumbopelela. 26 Ni mwanya chinchiwa ŵandu ŵammichikwe pajika kwaligongo lyangu, pakuŵa uneji Ambuje Akunnungu ngwanile mu yoseyosepe, ni une nanlekangenye mwanya ni ŵandu ŵa ilambo ine kuti mme ŵandu ŵangu nansyene.

27 "Mundu jwalijose jwannume pane jwankongwe jwali nsaŵi pane kutenda isango pane jwakutumia misimu ja ŵandu ŵawile akusachilwa aulajikwe kwa kwaputa ni maganga. Nombewo chaliichisye chiwa chao achinsyene."

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?