1 Mundu jwalijose aikaganawo mbopesi ja utandi kwa Ambuje Akunnungu, mbopesi jo jiŵe ja utandi wesyajiche yambone. Nombejo chautaje mauta ga miseituni ni ubani. 2 Pele chaichenawo kwa ŵambopesi ŵa uŵelesi u che Haluni. Jwambopesi chasapule ligasa limo utandi wesyajiche wo wauli ni mauta ni ubani ni kuutinisya pachanya pa chilisa kuti jiŵe mbopesi ja chikumbuchisyo kwa Ambuje Akunnungu. Jelejo jili mbopesi jakutinisya jajili jakununjila yambone jajikwanonyela Ambuje Akunnungu. 3 Utandi wa mbopesi waukusigalila chiuŵe wa che Haluni ni achiŵanagwe. Ni wele utandi ligasa limo wetyosekwe kwa Ambuje Akunnungu kwa kutinisya pa mooto pachanya chilisa wo, uŵichikwe pajika kwaligongo lya Ambuje Akunnungu mwa mbopesi syasikutyosyekwa kwa Ambuje Akunnungu pa mooto.

4 Iŵaga mundu akumpelechela Akunnungu mbopesi ja mikate jakupalila mooto, jelejo chijiŵe ja mikate jangatajikwa chilungo ja utandi wesyajiche yambone wewanganye ni mauta ga seituni pane ja mikate jakunyilila jangatajikwa amila ni jangapakaswa mauta.

5 Iŵaga mbopesi jakujityosya jili ja mkate wekalanje muchikalango, jelejo chijiŵe ja utandi wesyajiche yambone wewanganye ni mauta ga seituni nambo wangatajikwa amila. 6 Chimmunye ni kuwanganya mauta ga seituni pachanya pakwe, jelejo jili sadaka ja utandi.

7 Sooni iŵaga mbopesi jo jili ja mikate jeteleche mu chiteleko, jelejo chijiŵe ja utandi wesyajiche yambone ni jewanganye mauta ga seituni. 8 Chinyichenajo mbopesi ja utandi jekolosye ni yele indu yo kwa jwambope, ni jwambopesi chajausye pa chilisa. 9 Jwambopesi chajigale liunjili lya mbopesi jo jiŵe mbopesi ja chikumbuchisyo kwa Ambuje Akunnungu ni kujitinisya pachanya chilisa. Jelejo jili mbopesi jakutinisya jajili jakununjila yambone jajikwanonyela Ambuje Akunnungu. 10 Utandi wa mbopesi waukusigalila chiuŵe wa che Haluni ni achiŵanagwe. Ni wele utandi wetyosekwe kwa Ambuje Akunnungu kwa kutinisya pa mooto pachanya chilisa wo, uŵichikwe pajika kwaligongo lya Ambuje Akunnungu mwa mbopesi syasikutyosyekwa kwa Ambuje Akunnungu pa mooto.

11 Mbopesi jajilijose ja utandi jichiŵatyochesye Ambuje Akunnungu jikusachilwa jikolochekwe pangataga amila pakuŵa ngaikusachilwa kutaga amila namose uchi mwa mbopesi syasikutyochekwa kwa Ambuje Akunnungu pa mooto. 12 Nkukombola kwatyochesya Ambuje Akunnungu magowolo genu gaandanda nti mbopesi, nambo gelego ngasigatyosyekwa kwa kugatinisya pa mooto pa chilisa nti ununjile wambone wakunonyelesya. 13 Sooni mbopesi syenu syosye sya utandi chinnonyesye ni njete. Nkaleka kutaga njete ja Lilangano lya Akunnungu ŵenu mu mbopesi syenu sya utandi; ntajeje njete mu mbopesi syenu syose. 14 Mwaatyochesyaga Ambuje Akunnungu mbopesi ja magowolo genu ga milimbu, chintyosye masache gaandanda gamaŵisi gamaponde, ni kwanichila pa mooto. 15 Njonjechesye mauta ga seituni ni ubani; jelejo jili mbopesi jekolosye kwa utandi. 16 Jwambopesi chatinisye liunjili lya mbopesi ja utandi weponde uli utajikwe mauta ga seituni pampepe ni ubani wakwe wose jiŵe mbopesi ja chikumbuchisyo. Jelejo jili mbopesi jajikutyosyekwa kwa Ambuje Akunnungu kwa mooto.