1 Ambuje Akunnungu ŵansalile che Musa, 2 ŵasalile nsongangano wose wa Ŵaisilaeli kuti, "Mmeje ŵandu ŵammichikwe pajika kusyenesyene kwaligongo lyangu pakuŵa une Ambuje Akunnungu, Akunnungu ŵenu ngwanile mu yoseyosepe. 3 Mundu jwalijose pasikati jenu anchimbichisye achikulugwe ni atatigwe, ni kulichimbichisya Lyuŵa lya Kupumulila. Une ndili Ambuje Akunnungu, Akunnungu ŵenu.

4 "Nkaipopelela inyago namose kulikolochesya inyago ya shaba kuti nnyipopelele, uneji ndili Ambuje Akunnungu, Akunnungu ŵenu.

5 "Ni ŵanyamwe pachimwasikitile Ambuje Akunnungu mbopesi ja chitendewele, njityosye kwanti ichijile kupochelwa pamalo penu. 6 Mbopesi jo chijiligwe pa lyuŵa lilyolyo pachijityosyekwe, pane malaŵi jakwe. Chachilichose chachikusigala pa mbopesi jo mpaka pa lyuŵa lyaatatu chijochekwe pa mooto. 7 Iŵaga nyama jo chijiligwe pa lyuŵa lyaatatu, nyama jo ngajikundikwa, ni mbopesi jo ngajipochelwa. 8 Mundu jwalijose juchalye nyama jo chalipile kuleŵa kwakwe kwa ligongo lya kuchitumia chindu chetyosekwe kwa Ambuje Akunnungu kwa litala lya kawaida. Mundu jo chaŵichikwe pajika ni ŵandu ŵakwe.

9 "Pachingungule magungulo ga muchilambo chenu, nkagungula mpaka mmipika ja ngunda wenu, namose nkauja kukulokotanya yakusigalila mu ngunda nli mmasile kugungula. 10 Nkauja sooni mu ngunda wa sabibu kukugungula isogosi ya sabibu yaisigalile namose yaigwile paasi. Yeleyo mwalechele ŵakulaga pane achalendo, uneji ndili Ambuje Akunnungu, Akunnungu ŵenu.

11 "Nkajiŵa, nkalambusya atamuno nkasalilana ya unami. 12 Nkalumbila kwa kulitanga liina lyangu pa indu ya unami, ni kulitesya liina lyangu likachimbichikwa. Uneji ndili Ambuje Akunnungu, Akunnungu ŵenu.

13 "Nkannyenga jwapachiŵandi penu atamuno kunjiŵila. Nkatama ni malipilo ga mundu jwa chibalua chilo chose paka kundaŵi. 14 Ngasimunlwesya mundu jwangapikana atamuno kuŵika chindu chakusiŵila paujo pa mundu jwangalola kuti akuŵale, nambo munjogope Akunnungu ŵenu. Uneji ndili Ambuje Akunnungu, Akunnungu ŵenu.

15 "Pankulamula magambo nlamule kwagoloka, nkatenda lusagu pasikati ja mundu jwakulaga ni jwakwete cheo, nambo munlamule mundu jwapachiŵandi penu kwagoloka. 16 Nkajaula akuno ni akuno kwatindanya ŵandu. Nkatenda chindu chilichose chakunleŵekasya jwapachiŵandi penu kuulajikwa. Uneji ndili Ambuje Akunnungu.

17 "Nkanchima nlongo njenu muntima, nambo ntaamanje paasi ni kwilana, munsalile jwapachiŵandi penu maleŵa gakwe dwe kuti nkajinjila mmaleŵa gakwe. 18 Nkauchisya chakusakala pane kwakolela litima ŵandu ŵenu, nambo munnonyeleje nlongo njenu mpela inkunti pakulinonyela mwasyene. Une ndili Ambuje Akunnungu.

19 "Ngakamulisye makanyo gangu. Nkaileka ilango yenu ikwelane ni ilango ya ntundu wine. Nkapanda mbeju sya uŵele wakupisangana mu ngunda umo. Nkawala nguo jeluchikwe ni ngonji sya uŵele wakupisyangana.

20 "Iŵaga jwannume agonile ni mwali kapolo jwatomelwe ni jwannume jwine, ni jwannume jwatomele jo chiŵela nganaŵe kwawombola pane nganapegwe uhulu, ajamukwe. Akaulajikwa pakuwa mwali jo chiŵela nganaŵe kwaleka kuŵa hulu. 21 Namose yeleyo jwannume jo aiche ni ngondolo tonde pannango wa Lisakasa lya Kusimanilana kuti jiŵe mbopesi jakulechelesya chileŵo paujo pa Ambuje Akunnungu. 22 Jwambopesi champanganyichisye mundu jo ujilanyo paujo pa Ambuje Akunnungu kwa ngondolo tonde ja mbopesi ja chileŵo jo kwaligongo lya sambi syakwe, nombejo chalecheleswe sambi syakwe.

23 "Pachinjinjile mu chilambo cha Kanaani ni kupanda itela ya isogosi yakupisyangana, isogosi yo ngaikusachilwa kuligwa kwa kwapopelela Akunnungu kwa yaka itatu yakuundanda, pa kele katema ko ngasinlya. 24 Pa chaka chancheche isogosi yosepe chiŵe yeŵichikwe pajika kwaligongo lyangu, chiityosyekwe kuŵa mbopesi jakwalapa Ambuje Akunnungu. 25 Nambo kutandila pa chaka cha nsano nkukombola kulya isogosi yakwe, kwakutenda yeleyo itela yenu tiisogole chekwa. Une ndili Ambuje Akunnungu, Akunnungu ŵenu.

26 "Ngasinlya nyama jilijose jajili ni miasi. Nkajaula kukutenda chisango atamuno kutenda usaŵi. 27 Nkachenyendela umbo sya muntwe wenu atamuno kucheenyendela ndeu syenu. 28 Nkalikatakata pa chiilu penu kwaligongo lya kulila kwa malumbo, atamuno kulemba nembo pa chiilu penu. Une ndili Ambuje Akunnungu.

29 "Nkannyembulusya mwali jwenu kwakuntenda aŵe jwachigwagwa, ngakaŵa ŵandu wose ŵa mchilambo kwinjila mu chigwagwa ni kugumbala ugongomalo. 30 Nlikamulichisye Lyuŵa lya Kupumulila lyangu ni kupachimbichisya peuto pangupopelelwa ni ŵandu. Une ndili Ambuje Akunnungu.

31 "Ngasimwajaulila ŵandu ŵakutenda isango pane kwa misimu ja ŵandu ŵawile kuti mpate ukamuchisyo, pakuŵapo tachintenda nkakundikwa kwa kwapopelela Akunnungu. Uneji ndili Ambuje Akunnungu, Akunnungu ŵenu.

32 "Pankuŵa paujo pa jwanchekulu njimeje kulosya kuti nkwachimbichisya, ni mwajogope Akunnungu ŵenu. Une ndili Ambuje Akunnungu.

33 "Iŵaga kwana jwannendo mu chilambo chenu nkampanganyichisya yangalumbana. 34 Jwannendo jwakutama ni mmwe mumpanganyichisye mpela yakuti kumpanganyichisya nsyene musi. Munnonyeleje mpela inkuti pakulinonyela mwasyene, pakuŵa nomwe mwaliji jwannendo mu chilambo cha ku Misili. Une ndili Ambuje Akunnungu, Akunnungu ŵenu.

35 "Ngasimumnyenga mundu pankukamulisya masengo ga kupima uleu wa indu pane kutopa kwa indu pane ugumbale wa indu. 36 Ntumie kaapa jajikusachilwa ni yakupimila yaikusachilwa. Uneji ndili Ambuje Akunnungu ŵenu, juŵankopwesye ku chilambo cha ku Misili. 37 Ngakamulisye makanyo gangu gose ni malajisyo gangu gose. Une ndili Ambuje Akunnungu."