1 Ambuje Akunnungu ŵaasalile che Musa, 2 Mwasalile Ŵaisilaeli annyichisye mauta gambone gagaminyikwe ni seituni kwaligongo lya lumuli, kuti lumuli lujendelechele kukolela. 3 Che Haluni tapape lumuli lo paujo pa Ambuje Akunnungu kuti jikolele kutandilila kundaŵi mpaka liguo. Lumuli lo chiluŵe paasa pa nguo ja lusasa. Lyeleli lili lilajisyo lyakulikamulisya moŵa gose kwa iŵelesi yenu. 4 Chaŵiche lumuli lo pachanya pa chindu chakuŵichila lumuli chachili cha sahabu lukoleleje moŵa gose paujo pa Ambuje Akunnungu.

5 Njigale utandi wesyajiche chenene, kilo kumi na mbili, nkolosye mikate kumi na mbili. 6 Njiŵiche mikate jo pa misitali jiŵili, kila msitali mikate sita, njiŵiche paujo pa Ambuje Akunnungu pachanya mesa jekolochekwe kwa sahabu jesalele. 7 Mbiche ubani wambone pa msitali uliwose nti chikumbuchisyo kuti mikate jo jiŵe pamalo pa mbopesi jetyosyekwe kwa Ambuje Akunnungu kwa kutinisya ni mooto. 8 Kila pa lyuŵa lya kupumulila che Haluni tapanje mikate jo pa misitali paujo pa Ambuje Akunnungu, pamalo pa ŵandu ŵa ku Isilaeli chiŵe lilangano lya moŵa gose pangali mbesi. 9 Che Haluni ni achiŵanagwe pe, ni ŵachalye mikate jo pakuŵa jili jiŵechikwe pajika kusyenesyene, nombe chalile peuto papaŵichikwe pajika kwaligongo lya Akunnungu, pakuŵa mikate jo jiŵichikwe pajika kusyenesyene kwaligongo lya Akunnungu, nombejo jili yakupeleka yakawaida pa mbopesi jajikutyosekwa kwa Ambuje Akunnungu kwa kutinisya ni mooto.

10 Pa lyuŵa limo jwanchanda jumo atatigwe ŵaliji Mmisili, ni achikulugwe ŵaliji Mwisilaeli. Ŵakangene ni Mwisilaeli jumo mu lisakasa. 11 Jwanchanda jo ŵalitukene ni kulilwesya liina lya Ambuje Akunnungu, nipele ŵandu ŵanjawisye ku che Musa, achikulugwe jwanchanda jo jwaŵilanjikwe che Shelomiti mwali ju che Dibili jwa lukosyo lwa Dani. 12 Ni ŵanyawo ŵammisile mu chuumba chakuugalilwa ŵandu mpaka Ambuje Akunnungu ŵaasalile yakutenda kwa jwele mundu jo.

13 Nipele Ambuje Akunnungu ŵansalile che Musa, 14 "Munkoposye mundu jwatukene jo paasa pa chigono. Aŵala wose ŵampikene ali nkutukana asajiche makono gao pantwe pakwe, nipele nsongangano wose ammulaje kwa kumponya ni maganga. 15 Nipele mwasalile Ŵaisilaeli kuti, mundu jwalijose jwakunlwesya Akunnungu, ichiyasimane chalionele asyene. 16 Jwalijose juchalitukane liina lya Ambuje Akunnungu aulajikwe. Nsongangano wose chiwumponyele maganga, Aŵeje jwannendo pane nsyene musi alitukanaga liina lya Ambuje Akunnungu aulajikwe.

17 "Mundu jwalijose jwakuulaga njakwe nombejo aulajikwe. 18 Mundu jwalijose jwakuulaga chilango cha njakwe, anlipe chine che jumi, umi kwa umi.

19 "Iŵaga mundu akummulasya jwa pachiŵandi pwakwe, chilichose chantendele njakwe cho nombe jo atendelwe iyoyopeyo. 20 Iŵaga antemangwile njakwe liupa nombejo chantemangule liupa, iŵaga antuswile njakwe liso nombejo antusule, iŵaga akunkuwula njakwe lino nombejo ankuwule lino. Chindu chilichose chakusakala chakuntendela njakwe nombe jwakutenda yeleyo atendelwe iyoyopeyo. 21 Jwalijose jwakuulaga chilango cha njakwe anlipe chine, nambo jwalijose jwakuulaga njakwe nombejo aulajikwe. 22 Malamusi ga gakwagamba ŵanawose, jwannendo ni nsyene musi nombe. Une ndili Ambuje Akunnungu, Akunnungu ŵenu."

23 Nipele che Musa ŵakungulwiche ni Ŵaisilaeli yelei, nombe Ŵaisilaeli ŵankopwesye mundu jula paasa pa chigono ni ŵammuleje kwa kwaputa ni maganga.Ŵaisilaeli ŵatesile mpela Ambuje Akunnungu iŵannajisye che Musa.