1 Ambuje Akunnungu ŵansalile che Musa kuti, 2 ŵasalile che Haluni ni achiŵanagwe wose ni Ŵaisilaeli wosepe kuti Chelechi ni chakusala Ambuje Akunnungu: 3 Mundu jwalijose pasikati ja Ŵaisilaeli asikitaga ng'ombe jankambaku pane ngondolo pane mbusi peuto pane, paŵe mu chigono pane paasa pa chigono, 4 kuleka kwikanajo pannango wa Lisakasa lya Kusimanilana kuti jiŵe mbopesi kwa Ambuje Akunnungu, paujo pa lisakasaka lyeswela, mundu jo chaŵe ni magambo gakwita miasi, atyosyekwe mu mpingo wa ŵandu ŵakwe. 5 Yeleyi nikuti Ŵaisilaeli aichenawo kwa Ambuje Akunnungu inyama iŵaisikitilaga peuto papalangwiche mmigunda. Aichenawo kwa jwambopesi, paujo pa Akunnungu, pannango wa Lisakasa lya Kusimanilana ni kusikita kuti siŵe mbopesi sya chitendewele. 6 Jwambopesi chachimisile miasi chilisa cha Ambuje Akunnungu chichili pannango wa Lisakasa lya Kusimanilana, ni mauta gakwe kugatinisya kuti gakoposye ununjile wambone waukwanonyelesya Ambuje Akunnungu. 7 Ŵaisilaeli ngasaŵa sooni ŵandu ŵangakulupilichika kwa Ambuje Akunnungu, kwakusikita inyama yao mmigunda nti mbopesi kwa minungu ja mbusi. Lyeleli chiliŵe lilajisyo lyalikutamilisya moŵa gose pangali mbesi kwa Ŵaisilaeli ni iŵelesi yao yose.

8 Mundu jwalijose jwa Ŵaisilaeli pane jwannendo jwakutama pasikati jao, jwakutyosya mbopesi jakutinisya pane mbopesi jine jilijose, 9 kuŵa mbopesi ja Ambuje Akunnungu peuto palipose, pangaŵa pannango wa Lisakasa lya Kusimanilana, mundu jo atyosyekwe mu mpingo wa ŵandu ŵakwe.

10 Iŵaga Mwisilaeli jwalijose pane jwannendo, jwakutama pasikati jao akulya miasi, Uneji tinjinkana ni kuntyosya mu mpingo wa ŵandu ŵakwe. 11 Chiŵe yeleyo pakuŵa umi wa chepanganyikwe chilichose uli mmiasi. Nannajisye kujityosya miasi pa chilisa kuti jitendelwe ujilanyo kwaligongo lyenu mwachinsyene ni Akunnungu, miasi ni jajikuutenda ujilanyo kwaligongo lya umi wenu. 12 Kwapele ngwasalila Ŵaisilaeli, mundu jwalijose pasikati jenu pane jwannendo jwakutama pasikati jenu akalya miasi.

13 Iŵaga Mwisilaeli jwalijose pane jwannendo jwakutama pasikati jenu ajaulaga kukulupata chinyama pane chijuni chachikukundikwa kuligwa, akusachilwa ajitile miasi paasi ni kujisilila ni litaka. 14 Pakuŵa umi wa chepanganyikwe chilichose uli mmiasi. Lyelelyo ni ligongo naasalile Ŵaisilaeli ng'oo ngasalya miasi ja chepanganyikwe chilichose, pakuŵa umi wa chepanganyikwe chilichose uli mmiasi jakwe. Mundu jwalijose juchalye miasi atyosyekwe mu mpingo wa ŵandu ŵakwe.

15 Mundu jwalijose aŵeje nsyene musi pane jwannendo, juchalye chilichose chachiwile chisyene pane cheulajikwe ni chinyama chijakwe, achapeje yakuwala yakwe ni koga, nombejo chaŵe jwangakundikwa kwa kwapopelela Akunnungu mpaka ligulo. Pakumala pelepo chaŵe jwakukundikwa kwa kwapopelela Akunnungu. 16 Nambo iŵaga mundu jo ngakuchapa yakuwala yakwe ni koga, ichiyaasimane chalionele asyene ajamuchikwe.