1 Ambuje Akunnungu ŵansalile che Musa, 2 gelega gali malajisyo nkati mundu jwakwete ulwele wa lipende pa katema kakwatesya akundikwe kwa kwapopelela Akunnungu. Amalaga kulama channyiche nawo kwa jwambopesi, 3 ni jwambopesi jo chajaule paasa chigono kukunnolalola mundu jo. Iŵaga mundu jo chaŵe jwannamye ulwele wakwe, 4 nipele, jwambopesi chalajisye aichenawo ijuni iŵili yejumi yakukundikwa kwa kwapopelela Akunnungu, chipaande cha chitela cha mwelezi, manyunya gamachejeu ga ngondolo ni lujambi lwa chitela chachikuŵilanjikwa hisopo kwa ligongo lya jwele mundu juchatendekwe akundikwe kwa kwapopelela Akunnungu. 5 Nipele, jwambopesi chalajisye chisikitilwe chijuni chimo pa chiŵiga chachili ni meesi gambone gagajigalikwe pa uliŵa. 6 Jwambopesi chachijigale chijuni chejumi chila, chipaande cha chitela cha mwelezi ni manyunga gamachejeu ga ngondolo ni lujambi lwa chitela cha hisopo ni kuijinjisya yanayose mmiasi ja achila chijuni chesikite. 7 Nipele, jwambopesi channyuluchisye jwakuntesya akundikwe kwa kwapopelela Akunnungu miasi jila kasano ni kaŵili, nipele chantangasye mundu jo kuŵa jwakukundikwa kwa kwapopelela Akunnungu. Chijuni chejumi chila chachilechele chijaule. 8 Mundu jwatendekwe jwakukundikwa kwa kwapopelela Akunnungu jula akusachilwa achape nguo syakwe, chamyole umbo syakwe ni kooga, nombejo chaŵe jwakukundikwa kwa kwapopelela Akunnungu. Pakumala yeleyo chauje pa chigono nambo chatame paasa lisakasa lyakwe kwa mooŵa nsano ni gaŵili. 9 Pa lyuŵa lya nsano ni lyaaŵili chamyole umbo syakwe syose, ndeu ni ngope ni umbo siine syose. Nipele chachape nguo syakwe ni kooga, nombejo chaŵe jwakukundikwa kwa kwapopelela Akunnungu.

10 Pa lyuŵa lya nsano ni lyaatatu aichenawo ngondolo tonde siŵili ni ngondolo jankolo jimo, ŵanawose aŵeje ŵa chaka chimo, ni ŵangalema, ni kangomba sitatu sya utandi wesyajiche chenene wewanganye ni mauta ga seituni kwaligongo lya sadaka ja nafaka pamo ni makopo saba gakupimila mauta. 11 Jwambopesi juchantangasye mundu jo kuti akukundikwa kwa kwapopelela Akunnungu channyichisye paujo pa Ambuje Akunnungu chiŵandika ni nnango wa Lisakasa lya Kusimanilana pamo ni mbopesi syakwe. 12 Nipele jwambopesi chajigale ngondolo tonde jimo ni kujityosya kuŵa mbopesi ja kulechelesya ileŵo pamo ni agala mauta makopo saba. Chanyakule mwinani ni kujelasya kuŵa mbopesi jakunyakulwa paujo pa Ambuje Akunnungu. 13 Tajisikitile ngolondo jo peuto papakundikwe kwa kwapopelela Akunnungu, paakusikitilaga inyama ya mbopesi ja kulechelesya sambi ni mbopesi ja kutinisya. Mpela yaili kwa mbopesi ja kulechelesya sambi, mbopesi ja kulechelesya ileŵo jili jakwe jwambopesi, nombejo jiŵichikwe pajika kusyenesyene kwaligongo lya Akunnungu. 14 Jwambopesi chajigale miasi kanandi ja mbopesi ja kulechelesya chileŵo ni kujipakasya kumbesi kwa liwiwi lya kunlyo lya ajula jwakuntesya akundikwe kwa kwapopelela Akunnungu, ni pa chikongo cha nkono wa kunlyo, ni pa chikongo cha lukongolo lwa kunlyo. 15 Sooni jwambopesi chajigale mauta kanandi kutyochela mu agala mauta makopo saba ni kugataga pa ligasa lya nkono wakwe wa kunchiji. 16 Chatoŵele chaala cha nkono wakwe wa kunlyo mmauta go ni kunnyuluchisya mundu juchantesye akundikwe kwa mapopelo kasano ni kaŵili paujo pa Ambuje Akunnungu. 17 Mauta gagasigalile pa ligasa lyakwe champakasye mundu jo kumbesi kwa liwiwi lyakwe lya kunlyo ni pa chikongo cha nkono wakwe wa kunlyo ni pa chikongo cha lukongolo lwakwe lwa kunlyo, palapala paŵampachile miasi ja mbopesi ja kulechelesya sambi. 18 Agala mauta gagasigalile pa ligasa lyakwe champakasye mundu jo muntwe. Kwa kutenda yeleyo jwambopesi champanganyichisye mundu jo ujilanyo paujo pa Ambuje Akunnungu.

19 Jwambopesi chatyosye mbopesi ja kulechelesya sambi ni kumpanganyichisya mundu jo ujilanyo kuti antyochesye ungakundikwa wakwe kwa kwapopelela Akunnungu. Nipele tasikite ngondolo ja mbopesi ja kutinisya. 20 Jwambopesi chajityochesye mbopesi ja kutinisya jo ni mbopesi ja nafaka pa chilisa. Kwayele jwambopesi champanganyichisye mundu jo ujilanyo, nombejo chaŵe jwakukundikwa kwa kwapopelela Akunnungu.

21 Nambo iŵaga mundu jo ali jwakulaga ni ngakukombola kuipata indu yi, akusachilwa ajigale ngondolo tonde jimo kuŵa mbopesi jakulechelesya ileŵo, jitajinyakulile mwinani ni kujijelasya kuŵa mbopesi jakunyakulwa kuti ampanganyichisye ujilanyo. Sooni chaichenawo kangomba jimo ja utandi wesyajiche chenene, wewanganye ni mauta ga seituni kwaligongo lya mbopesi ja nafaka ni mauta makopo saba gala. 22 Sooni chaichenawo njuŵa siŵili pane makandi gaŵili ga nguunda, ichakombole kugapata, jumo kwa ligongo lya mbopesi ja kutyosya sambi ni jwine kwa ligongo lya mbopesi jakutinisya. 23 Pa lyuŵa lya nsano ni lyaatatu channyichisye jwambopesi indu yo pa nnango wa Lisakasa lya Kusimanilana paujo pa Ambuje Akunnungu, kwaligongo lya kuswejeswa kwakwe. 24 Jwambopesi chajigale jele ngondolo tonde ja mbopesi ja kutyosya chileŵo, pamo ni agala makopo saba ga mauta, tanyakulile mwinani ni kujelasya paujo pa Ambuje Akunnungu, kuŵa mbopesi jakunyakulwa. 25 Nipele jwambopesi chasikite ngondolo tonde ja mbopesi ja kulechelesya ileŵo. Chajigale miasi kanandi ni kumpakasya mundu jwakutendekwa akundikwe kwa kwapopelela Akunnungu jo kumbesi kwa liwiwi lyakwe lya kunlyo ni pa chikongo cha nkono wakwe wa kunlyo ni pa chikongo cha lukongolo lwakwe lwa kunlyo. 26 Jwambopesi chagataje mauta kanandi ga seituni pa ligasa lyakwe lya nkono wa kunchiji. 27 Nipele channyuluchisye mundu jwakuntesya akundikwe kwa kwapopelela Akunnungu jo mauta gagali pa ligasa lyakwe lya kunchiji kwa chala chakwe cha nkono wa kunlyo kasano ni kaŵili paujo pa Ambuje Akunnungu. 28 Jwambopesi champakasye agala mauta gagasigalile pa ligasa lyakwe, mundu jwakuntesya akundikwe kwa kwapopelela Akunnungu jo mulamula mpela iŵatite pa kumpakasya miasi ja mbopesi ja kulechelesya chileŵo, yaani kumbesi kwa liwiwi lyakwe lya kunlyo ni pa chikongo cha nkono wakwe wa kunlyo ni pa chikongo cha lukongolo lwakwe lwa kunlyo. 29 Mauta gagasigalile pa ligasa lyakwe, champakasye mundu jwakuntesya akundikwe kwa mapopelo jo mu ntwe, kumpanganyichisya ujilanyo paujo pa Ambuje Akunnungu. 30 Nipele chajigale jumo mu njuŵa sila pane makandi ga ngunda sila malinga ni mundu jula yaichenayo. 31 Jumo kwaligongo lya mbopesi ja kulechelesya sambi ni jwine kuŵa mbopesi jakutinisya, pamo ni mbopesi ja nafaka. Kwakutenda yeleyi, jwambopesi champanganye mundu jo ujilanyo paujo pa Ambuje Akunnungu. 32 Lyeleli lili lilamulo nkati mundu jwalijose jwakwete ulwele wa lipende waukwambuchisya, jwati ngakukombola kutyosya mbopesi syeŵichikwe kwaligongo lya kuntesya akundikwe kwa kwapopelela Akunnungu.

33 Ambuje Akunnungu ŵaasalile che Musa ni che Haluni, 34 pachinjinjile pa chilambo cha ku Kanaani, chilambo chingumpa kuŵa chenu, ni une naŵikaga lipundugulu lyalikwenela pa lipupa lya nyuumba jenu, 35 nipele nsyene nyuumba jo chajaule kunsalila jwambopesi kuti, Chindu mpela lipundugulu chioneche pa nyuumba jangu. 36 Jwambopesi chalajisye indu yose mu nyuumba mo ityosekwe akanaŵe kutanda kulolalola yankati lipundugulu lyo, ikaichila kutangasya kuti indu yose yaili mwelemo ili yangakundikwa kwa kwapopelela Akunnungu. Nipele jwambopesi chajinjile kukujilolalola nyuumba jo. 37 Chalilolelole lipundugulu lyo; iŵaga lipundugulu lyo lioneche mmapupa ni kuichisya langi ja masamba pane jechejeu ni kuonechela kuti jipelete mpaka nkati mwa mapupa go, 38 jwambopesi chatyoche nkati ni kuugala nnango wa nyuumba jo kwa moŵa nsano ni gaŵili. 39 Pa lyuŵa lya nsano ni lyaaŵili jwambopesi chaujile kukujilolalola sooni nyuumba jo. Iŵaga lipundugulu lyo lijenele mmapupa ga nyuumba jo, 40 chalajisye kuti maganga gose gagalambuchikwe lipundugulu gatyosekwe ni kugajasila peuto pangakundikwa kwa kwapopelela Akunnungu, paasa musi. 41 Mapupa gose ga nyuumba jo gakusachilwa gamatukulikwe ni chindu ni lilongo lyakwe lijasikwe peuto pangakundikwa kwa kwapopelela Akunnungu, paasa musi. 42 Nipele chajigalanje maganga gane ni kutaŵa sooni paŵagumwile pala, ni ŵanyawo chasyasyajile nyuumba jo sooni.

43 Iŵaga lipundugulu chiliujile sooni mu nyuumba jo pakumala kugatyosya maganga go ni kumatukula papasyasyajile po ni kusyasyajila sooni, 44 jwambopesi taiche kukujilolalola. Iwaga lipundugulu lijenele mu nyuumba jo, nipele lipundugulu lyo lili lyakuulaga, nyuumba jo jili jangakundikwa kwa mapopelo. 45 Nyuumba jo jikusachilwa jigumulikwe, maganga gakwe ni itela yakwe ni swakala jakwe, ikajasikwe paasa musi peuto pangakundikwa kwa kwapopelela Akunnungu. 46 Kupunda ni yeleyo, jwalijose juchajinjile mu nyuumba jo katema pachijiŵe jeugale, chaŵe jwangakundikwa kwa kwapopeloela Akunnungu mpaka ligulo. 47 Jwalijose juchagone pane kulila chakulya mu nyuumba jo akusachilwa achape nguo syakwe.

48 Nambo iŵaga jwambopesi chaiche kukujilolalola nyuumba jo ni kujisimana lipundugulu nganilijenela pakumala kusyasyajila, chajitangasye nyuumba jo kuŵa jekundikwe kwa kwapopelela Akunnungu, pakuŵa lipundugulu limasile. 49 Pakuti kujitenda jekundikwe kwa kwapopelela Akunnungu nyuumba jo, nsyene nyuumba chaichenawo ijuni iŵili pamo ni chipande cha chitela cha mwelezi, ni manyunya gamachejeu ga ngondolo pamo ni lujambi lwa chitela cha hisopo. 50 Tachisikitile chijuni chimo mu chiŵiga chachili pachaanya pa meesi gambone. 51 Nipele chajigale chipande cha chitela cha mwelezi ni lujambi lwa chitela cha hisopo ni agala manyunya gamachejeu ga ngondolo pamo ni chijuni chejumi chila ni kuijinjisya mmiasi ja chijuni chesikite chila pamo ni agala meesi gambone gagajigalikwe pa uliŵa ni kujinyuluchisya nyuumba jila kasano ni kaŵili. 52 Chajitende nyuumba jo jekundikwe kwa kwapopelela Akunnungu, kwa miasi ja chijuni ni meesi gambone, ni chijuni chejumi ni chipande cha mwelezi ni lujambi lwa chitela cha hisopo pamo ni agala manyunya gamachejeu ga ngondolo. 53 Achila chijuni chejumi chaachilechele chijaule paasa musi. Kwa kutenda yeleyo chatende ujilanyo kwa ligongo lya nyuumba jo, nombejo chijiŵe jekundikwe kwa kwapopelela Akunnungu.

54 Gelega gali malamusi gankati ulwele wa lipende wauliwose wakwambuchisya, ni mapuluŵa 55 ni lipundugulu lya mu nguo pane lya mu nyuumba, 56 ni chakuimbila ni nammatu pane iŵengwa yakogoya, 57 kulosya chindu pachikuŵa chakukundikwa pane changakundikwa kwa kwapopelela Akunnungu. Gelega gali malajisyo gankati lipundungulu ni ulwele wa lipende waukwambuchisya.