1 Ambuje ŵakungulwiche ni che Musa pa chitumbi cha Sinai ni ŵampele malamusi 2 kuti ŵasalile Ŵaisilaeli. Patinjinjile mu chilambo chakumpa Ambuje Akunnungu, pa kila chaka cha saba chose chinchipumusye chilambo, nkalima kwa kwachimbichisya Ambuje Akunnungu. 3 Kwa yaka nsano ni umo nkalimeje ni kupanda mbeju mmigunda jenu, ni kupangulila itela yenu ya misabibu ni kugungula mbeju syakwe. 4 Nambo pa chaka cha saba chiŵeje chaka chati litaka likalimwa kusyene, ligongo chili chaka cha kupumulila kwaligongo lya Ambuje Akunnungu. Nipele nkalima mmigunda jenu namose kupangulila itela yenu ya misabibu. 5 Nkagungula chachilichose chachimele pangapanda namose kukaŵa sabibu sya itela ya sabibu yanganimpangulila. Chelecho chichiŵe chaka chati litaka ngalilimwa. 6 Namuno yeleyo, pa chaka chakupumulila cho chilambo chichisogosye yakulya ichinlye mwanya mwachinsyene, ni ŵamasengo ŵenu ni achikapolo ŵenu ni achalendo ŵakutama pasikati jenu, 7 ni ilango yenu ni inyama ya mwitinji. Chilichose chachichisogole mchilambo chikukomboleka kuligwa.

8 Mmalanjile yaka saba ya kupumulila mala saba, kuti yaka yakupumulila yo iichile yaka alobaini na tisa. 9 Nipele, pa lyuŵa lya kumi lya mwesi wa saba, pa lyuŵa lya ujilanyo lyo, muntume mundu agombeje lipenga, pa chilambo pose. 10 Chaka cha hansini chinchichiŵika pajika kwaligongo lya Akununngu ni ŵandu wose ŵakutama mwelemo chalalichilwe kulecheleswa. Chaka cho chikuŵe ni chindimba chakukumbuchila yaka hansini. Kila mundu tauje pa lisi lyakwe nsyene ni kwa achalongo achinjakwe. 11 Chaka cha hansini cho chikuŵe ni chindimba chakukumbuchila yaka hansini, nkapanda mbeju mmigunda mwenu pane kugungula chachilichose chachichimele chisyene namose kukaŵa sabibu pa itela ya sabibu yanganimpangulile. 12 Pakuŵa chaka cho chili chaka chakukumbuchila yaka hansini, nombe chichiŵe chaka chachiŵichikwe pajika kwaligongo lya Akunnungu. Kwapele chinlye aila yemele isyene mmigunda.

13 Pa achi chaka chakusangalalila yaka hansini, kila mundu tauje ku lisi lyakwe asyene. 14 Iŵaga nkunsumichisya njenu ngunda pane iŵaga nkusuma ngunda kwa njenu, nkannyenga jwine. 15 Mbiche ntengo wa kusumichisya ngunda wo pa kuŵalanjila yaka italime mundu jo Ikanaŵe kwika yaka hansini. 16 Iŵaga yaka Ikuŵa yejinji ajonjechesye ntengo, iŵaga yaka Ikuŵa kanandi ananduye ntengo, pakuŵa malonda gakwe ga, akusumisya malinga ni yaka yakugungula yakulya. 17 Nkannyenga Mwisilaeli njenu nambo mwajogope Akunnungu. Une ndili Ambuje Akuunnungu, Akunnungu ŵenu.

18 Ngakuye makanyo gangu, nlilolechesye kugakamulichisya makanyo gangu, nombe ŵanyamwe chinkatame yambone mu chilambo. 19 Litaka chilisogosye isogosi ni wanyamwe chinchilya ni kwikuta, nipele chinchitama mu chilambo mo kwa chitendewele.

20 Komboleka kuliusya kuti ana chitulye chichi pa chaka cha nsano ni chaaŵili, iwaga ngatukulima ni kupanda, sooni iwaga ngatukugungula yakulya iliyose. 21 Tinjimpanga upile pachilambo pa chaka cha nsano ni chimo, kuti chilambo chisogosye yakulya ya yaka itatu. 22 Pachimpande pa chaka cha nsano ni chaatatu chinchiŵa nli nkulya yakulya ya chipiti ni tinjendelechele kulya yakulya yo mpaka chaaka cha tisa pachintande kugowola.

23 Lisi likatama lili lyesumisye kwa yaka yosepe, pakuŵa lili lyangu, ni mwanya nli mpela achalendo ŵakwasima kuti nkamulisye masengo.

24 Chilambo chilichose chachinchijigale kuŵa chenu, iŵaga mundu asumisye lisi, jwasumile jo akundeje mundu jwasumisye aliwombole lisi lyo. 25 Iŵaga jumo jwa Ŵaisilaeli ajenu akuŵa jwakulaga ni asachilwaga kusumisya lisi lyakwe ligongo lya kulaga ko, nipele nlongo njakwe aiche kuliwombola lisi lyo. 26 Iŵaga mundu jo nganakola nlongo njakwe jwakakombwele kuliwombola lisi lyo, kanyuma pachaŵe jwakusichila, chakombole kuliwombola lisi lyo nsyene, 27 mundu jo talipile ndalama ja kuwombola kwa mundu juŵasumile lisi lyo mbiya sya yaka yisigele yaakalimile mundu jo chikanaŵe kuichila chaka cha hansini, chaka chati akalipochele lisi lyakwe. 28 Nambo iŵaga nganakola mbiya syakwanila kuliwombola lisi lyakwe, chilisigalile kuŵa lyakwe mundu juŵasumile jo mpaka pa chaka chakusangalalila yaka hansini. Pa chele chaka cho lisi tiliŵe lyewombole, akukombola kuliusya kwa nsyene.

29 Iŵaga mundu akusumisya nyuumba jajili mmusi wesyunguchisye lipupa lyakukandapala, akukomboleka kujiwombola nyuumba jo chaka chimo pakumala kujisumisya nyuumba jo. 30 Nambo iŵaga akulepela kujiwombola nyuumba jo chaka chimo pakumala kujisumisya, jwelejo ajasile haki jakwe ja kujiwombola nyuumba jo. Nyuumba jo jikuŵa jakwe mundu jwasumile jo, ni isukulu yakwe kwa yaka yosepe. Ngasajiusya sooni kwa nsyene pa chaka cha hansini. 31 Nambo nyuumba syasili mmisinda syangasyunguchisya lipupa lyakukandambala, tisiŵalanjikwe mpela migunda ja mchilambo mo. Achinsyene akukomboleka kusiwombola nyuumba syo pane akukombola kusiusya kwa achinsyene pa chaka cha hansini. 32 Nambo Ŵalawi akukomboleka kusiwombola nyuumba syao syasili mmisi ja Ŵalawi pa lyuwa lililyose. 33 Iŵaga Mlawi jwine akulepela kujiwombola nyuumba jiŵajisumisye mu musi mo, jwasumile jo ajiusye kwa nsyene mu chaka cha hansini. Pakuŵa nyuumba sisili mmisi ja Ŵalawi sili syao Ŵalawi pasikati ja chilambo chose cha ku Isilaeli. 34 Nambo migunda jakulisisya inyama, jijili mungulugulu misinda ja Ŵalawi akajisumisya ligongo migunda jo jili jao Ŵalawi yaka yosepe.

35 Iŵaga Mwisilaeli njenu akuŵa jwakulaga, ni ngakukombola kulisosela yaikunsoŵa ali pamo nomwe, mungose chenene mukangosile jwannendo pane jwaali pa ulendo jwali pamangwenu kuti ajendelechele kutama nomwe. 36 Nkapochela mbia syakonjechesya pachanya pa mbia syakongwele Mwisilaeli njenu jwali jwakulaga, nambo mwajogope Akunnungu ŵenu kuti nlongo njenu jo ajendelecheleje kutama pamangwenu. 37 Nkankongosya njenu mbia syenu kuti mpochele mbiya sine syakonjechesya, namose nkansumichisya chakulya kuti mpate chipatapata. 38 Une ndili Ambuje Akunnungu, Akunnungu jwenu junankopwesye ku chilambo cha ku Misili kuti nampe chilambo cha Kaanani, ni kuti meje Akunnungu jwenu.

39 Iŵaga Mwisilaeli njenu akuŵa jwakulaga kwannope alisumisyaga kukwenu awe kapolo, nkampa masengo ga ukapolo. 40 Atameje ni mmwejo nti jwamasengo jwenu pane jwannendo jwakutama nomwe kwa katema, nombejo chantumichile mmwejo mpaka pa chaka cha hansini. 41 Pa chaka cha hansini Mwisilaeli njenu jo pamo ni achiŵanagwe aujile ku ntundu wakwe ni ku lisi lya achinangolo ŵakwe. 42 Pakuŵa Ŵaisilaeli ali ŵakutumichila ŵangu unaakopwesye mu chilambo cha ku Misili, ngasiŵaasumisya mpela achikapolo ng'o. 43 Nkaatawala kwa kwaliŵatila nambo munjogope Akunnungu jwenu. 44 Iŵaga nkusaka kukola achikapolo aŵeje achakongwe pane achalume, nkukombola kwasuma kutyochela kwa ŵandu ŵa ngosyo sine. 45 Sooni nkukombola kwasuma ŵanache ŵa achalendo ŵankutama nao kwa katema, ni achalongo ŵa mitundu jao ŵapagwile mu chilambo chenu komboleka kuŵa ŵandu ŵenu. 46 Achikapolo nkukombola kwaleka mmakono mwa ŵanache ŵenu aŵe ŵao moŵa gose, ŵelewo chachiŵa ali nkwatumichila umi wao wose. Nambo nkantawala Mwisilaeli njenu kwakunliŵatila.

47 Iŵaga jwannendo pane mundu jwakutama pamo ni mmwe kwa katema akusichila, ni Mwisilaeli njenu akuŵa jwakulaga kwa mpaka kulisumisya nsyene kuŵa kapolo kwa jwannendo jwakusichila jula pane kwa jumo mwa achalongo achinjakwe jwakutama pamo ni mwe, 48 ikukomboleka kummombola pakumala kulisumisya, jumo jwa achalongo achinjakwe akukombola kwawombola. 49 Pane atatigwe ŵakulungwa pane atatigwe ŵanandi pane mwanache jwa atatigwe ŵakulungwa pane ŵanandi, pane mundu jwalijose pa ulongo wakwe, akukombola kwawombola. Sooni iŵaga mundu jwakulisumisya jula akusichila akukombola kuliwombola nsyene. 50 Aŵalanjilane ni mundu juŵansumile jo yaka iisigalile kuti chikwanile chaka cha hansini chakulechelelwa. Ntengo wa kuwombolekwa kwakwe uŵe wa kulandana ni winji wa yaka iisigalile yo. Nipele alipile mwakanlipile mundu jwamasengo pa katema kakwe. 51 Iŵaga isigalile yaka yejinji pakwika yaka hansini yakulechelelwa, nipele talipe mbiya syasijinji mu mbiya siŵansumile. 52 Iŵaga inandwipe yaka yaisigalile pakwika yaka hansini yakulechelelwa, aŵalanjilaneje, nombejo chalipile malinga ni yaka yaisigalile. 53 Katema kose pakutama ni ambujegwe ampanganyichisyeje mpela mundu jwamasengo jwakanlipile pa kila chaka. Ambujegwe wo akanliŵatila mundu jo, mmwejo nli nkulola. 54 Iŵaga ngakuwombolekwa mwa matala ga, nsyene ni ŵanache ŵakwe tachilechelekwa pa chaka cha hansini. 55 Pakuŵa Ŵaisilaeli ali ŵakutumichila ŵangu ŵanaakopwesye mu ukapolo ku chilambo cha ku Misili. Uneji ndili Ambuje Akunnungu, Akunnungu ŵenu.