1 Ambuje Akunnungu ŵansalile che Musa, 2 "Mwaichisye che Haluni ni achiŵanagwe ŵachilume ni iwalo yao, ni mauta gakutendasya indu ni ŵandu atumiche ni Akunnungu, ni ng'ombe jankambaku ja mbopesi ja kulechelesya sambi ni ngondolo tonde siŵili ni chitundu cha mikate jangatajikwa amila. 3 Nipele mwasonganye Ŵaisilaeli wose pamo, paujo pa nnango wa Lisakasa lya Kusimanilana."

4 Che Musa ŵatesile mpela iŵatite pakusalilwa ni Ambuje Akunnungu, ŵaasongenye Ŵaisilaeli wose pamo paujo pa nnango wa Lisakasa lya Kusimanilana.

5 Che Musa ŵausalile mpingo wose, "Chelechi ni chindu chasasile Ambuje Akunnungu chitendekwe." 6 Pelepo che Musa ŵannyichenawo che Haluni ni achiŵanagwe ŵachilume ni kwajosya ni meesi. 7 Nipele ŵambwasisye che Haluni mwinjilo ula ni kwataŵilila mpumbulu, ni kwawasya nkogo ni kwawasya nguo jakuunichila pantima ni kutaŵilila mu chiunu mwakwe mpumbulu weluchikwe chenene. 8 Nipele ŵammwasisye kasaku kakuwala pantima ni mu kasaku ko ŵatasile maganga gakulamulila gagakuŵilanjikwa ulimu ni tumimu. 9 Nipele ŵambwasisye che Haluni chilyemba ni pachanya chilyemba chila, paujo, ŵaŵisile achila chibati cha sahabu, chelecho chili chilyemba chachikulosya kuti jwelejo aŵichikwe pajika kwaligongo lya Akunnungu, mpela Ambuje Akunnungu iŵatite pakunnajisya che Musa.

10 Nipele che Musa ŵajigele mauta gala, ŵagamisile Lisakasa lya Kusimanilana lila kuti litumiche ni Akunnungu ni kila chindu chachili mwelemo, kwayele lyaŵichikwe kuti litumiche ni Akunnungu pe. 11 Nipele ŵagamisile mauta gala pa chilisa kasano ni kaŵili ni kunyulunyusisya mu yoombo yakwe yose, pamo ni ntala ni chitamichilo chakwe, ŵaaitesile yose itumiche kwaligongo lya Akunnungu pe. 12 Iyoyo che Musa ŵanjitilile che Haluni mauta muntwe kuti ammiche pajika kwaligongo lya Akunnungu. 13 Nipele che Musa ŵaaichenawo achiŵanagwe che Haluni ŵachilume ni kwawasya miinjilo ni kwataŵa mipumbulu ni kwawasya ilyemba mpela Ambuje Akunnungu iŵatite pakwalajisya che Musa.

14 Nipele che Musa ŵajiichenao ng'oombe jankambaku ja mbopesi jakulechelesya sambi, ni che Haluni ni achiŵanagwe ŵachilume ŵaŵisile makono gao pantwe pa jele ng'oombe jo. 15 Che Musa ŵajisikite ng'oombe jo, ŵajigele miasi kanandi kwa chala chakwe ni kujipakasya mmisengo jijaliji mu ndumba mwa chilisa mbande syakwe syose, kuchitenda chilisa cho jikundikwe kwaligongo lya Akunnungu. Nipele ŵajigele miasi jijasigalile ŵajitile kuusi kwa chilisa, kwayele ŵachiŵisile chilisa cho kwaligongo lya masengo ga Ambuje Akunnungu, kuti atende ujilanyo kwaligongo lya chilisa cho. 16 Nipele ŵajigele mauta gose gagaliji mmatumbo gakwe ni mauta gose gagasyungulile litooga pamo ni mbyo siŵili syosye ni mauta gakwe ni kuitinisya pachanya chilisa. 17 Nambo nyama ja ng'ombe jo ni lipende lyakwe ni manyi gakwe, ŵaitinichisye paasa pa chigono mpela Ambuje Akunnungu iŵatite pakunnajisya che Musa.

18 Nipele che Musa ŵajiichisye ngondolo tonde ja mbopesi ja kutinisya ni che Haluni ni achiŵanagwe ŵachilume ŵagaŵisile makono gao pantwe pa ngondolo jo. 19 Che Musa ŵajisikite ni miasi ja ngondolo tonde jo ŵajinyuluchisye mbande syose sya chilisa. 20 Ŵajikatenye ngondolo tonde jo iŵaloiŵalo, ŵaitinisye pamo ni ntwe wakwe ni mauta gakwe. 21 Nipele ŵaijosisye indu ya nlutumbo ni makongolo mmeesi, ni che Musa ŵajitinisye ngondolo jose pachanya chilisa, kuŵa mbopesi jakutinisya. Jelejo jili mbopesi jajikutyosyekwa ni mooto jajikununjila yambone kwakwanonyelesya Ambuje Akunnungu. Che Musa ŵatesile mpela Ambuje Akunnungu iŵatite pakwalajisya.

22 Nipele ŵajiichisye ngondolo tonde jine, kwaligongo lya kwaŵika pajika che Haluni ni achiŵanagwe ŵachilume kwaligongo lya masengo ga Akunnungu. Che Haluni ni achiŵanagwe ŵaŵisile makono gao pantwe wa ngondolo jo. 23 Che Musa ŵajisikite ngondolo tonde jo ni ŵajijigele miasi jakwe ni kumpakasya che Haluni kumbesi kwa liwiwi lyao lya kunlyo ni chikongo chao cha nkono wa kunlyo ni cha lukongolo lwao lwa kunlyo. 24 Sooni che Musa ŵaaichisye paujo pa nsongangano ula ŵanache ŵachilume ŵa che Haluni, ŵaapachile miasi kumbesi kwa mawiwi gao ga kunlyo ni ikongo yao ya nkono wa kunlyo ni ya makongolo gao ga kunlyo. Miasi jine ŵajinyuluchisye mbande syose sya chilisa. 25 Nipele ŵajigele mauta gose ni mauta gaku nchila ni mauta gagaliji nlutuumbo ni mauta gose gagasyungulile litooga pamo ni mbyo siŵili syose ni mauta gakwe ni chiiga cha kunlyo. 26 Nipele mu chitundu cha mikate jekolosye pangataga amila, chichaliji paujo pa Ambuje Akunnungu, ŵajigele nkate umo ni nkate umo wewanganye yambone mauta ni nkate umo wakunyilila, ŵaiŵisile yose pachanya pa iŵalo yakunakana ni pachanya pa chiiga cha kunlyo chila. 27 Che Musa ŵaiŵisile yanayose mmakono gao che Haluni ni achiŵanagwe, nombewo ŵanyakwile mwinani ni kujelasya paujo pa Ambuje Akunnungu nti chimanyisyo chakwatyochesya Ambuje Akunnungu, jeleji ni mbopesi jakunyakulwa. 28 Nipele che Musa ŵaijigele indu yo yanayose mmakono mwao ni kuitinisya pachanya pa chilisa pachanya pa mbopesi jakutinisya kuti ŵaaŵiche aŵe kwaligongo lya Ambuje Akunnungu, jajili ni ununjile wambone waukwanonyelesya Ambuje Akunnungu, jili mbopesi jajikutyosyekwa kwa Ambuje Akunnungu ni mooto. 29 Nipele che Musa ŵajigele chidali cha ngondolo tonde chachili mbua ji che Musa chachili chakwaŵika ŵandu aŵe kwaligongo lya Ambuje Akunnungu, ŵanyakwile mwinani ni kujelasya paujo pa Ambuje Akunnungu kuŵa mbopesi jakunyakulwa, mpela Ambuje Akunnungu iŵannajisye che Musa.

30 Nipele che Musa ŵajigele mauta gakwajitilila ŵandu kwa masengo ga Akunnungu ni miasi kanandi kuumila pa chilisa, ŵannyuluchisye che Haluni ni iwalo yakwe pamo ni achiŵanagwe ŵachilume ni iwalo yao. Kwapele che Musa ŵaaŵisile kwaligongo lya masengo ga Akunnungu che Haluni ni iwalo yakwe pamo ni achiŵanagwe ŵachilume ni iwalo yao.

31 Nipele che Musa ŵansalile che Haluni ni achiŵanagwe ŵachilume, "Nteleche nyama jo pannango pa Lisakasa lya Kusimanila, nkalile palapala ni jele mikate jijili mu chitundu chachili ni mbopesi ja kwaŵika pajika ŵandu kwaligongo lya masengo ga Akunnungu, mpela Ambuje Akunnungu iŵatite kunnajisya, paŵatite ‘Che Haluni ni achiŵanagwe ŵachilume ni ŵachalye.’ 32 Nyama jajilijose pane nkate wauliwose uchiisigalile ukusachilwa kutinisya pa mooto. 33 Ngasintyoka paasa pa nnango wa Lisakasa lya Kusimanilana kwa moŵa nsano ni gaŵili, yaani mpaka ndaŵi syenu syakummika pajika kwaligongo lya masengo ga Akunnungu pasisimalile, pakuŵa chimmichikwe pajika kwaligongo lya masengo ga Akunnungu kwa moŵa nsano ni gaŵili. 34 Achi chachitendekwe lelo chilajiswe ni Ambuje Akunnungu kuti utendekwe ujilanyo kwaligongo lyenu. 35 Chinsigale pannango wa Lisakasa lya Kusimanilana muusi ni chilo kwa moŵa nsano ni gaŵili, nchipanganyaga indu yalamwile Ambuje Akunnungu, nkaika kuwa. Yeleyo ni indite kulamulikwa ni Ambuje Akunnungu." 36 Nipele che Haluni ni achiŵanagwe ŵachilume ŵatesile yanayose yalamulikwe ni Ambuje Akunnungu kwalitala li che Musa.