1 Ambuje Akunnungu ŵaasalile che Musa ni che Haluni, 2 ŵaasalilenje Ŵaisilaeli yelei: Inyama yi ni ichinlye, mwa inyama yanayose yaili pachilambo. 3 Chinyama chachili chose chachili ni ikotwa yeŵalwiche kaŵili ni chinyama chachikuchukula. 4 Nambo ngasinlya chinyama chachilichose chachikuchukula nambo ikotwa yakwe nganiiŵaluka kaŵili, pane ikotwa yakwe iŵalwiche nambo ngachikuchukula. Ngasinlya ngamia pakuŵa chikuchukula nambo ikotwa yakwe nganiiŵaluka kaŵili, kwa ŵanyamwe chele chinyama cho chili changakundikwa kwa kwapopelela Akunnungu. 5 Ngasinlya njechele, pakuŵa jwelejo akuchukula nambo nganakola ikotwa, kukwenu jwelejo ngakukundikwa kwa kwapopelela Akunnungu. 6 Ngasinlya kalunga, jwelejo akuchukula nambo nganakola ikotwa, kukwenu jwelejo ngakukundikwa kwa kwapopelela Akunnungu. 7 Ngasinlya liguluŵe, nachiŵamuno ikotwa yakwe iŵalwiche nambo ngalikuchukula, lyelelyo ngalikukundikwa kwa mapopelo. 8 Ngasinlya nyama jao namose ngasinkwaya mitembo jao, inyama yo ngaikukundikwa kuligwa.

9 Yepanganyikwe yailiyose yaikutama mu bahali pane mu lusulo yaili ni maŵegoŵego ni makalaŵesya nkukombola kulya. 10 Nambo yepanganyikwe yailiyose yaikutama mu bahali pane mu lusulo yangali ni maŵegoŵego namose makalaŵesya, iŵeje yaikwenda mmipingomipingo mmesi pane yepanganyikwe ine yaikutama mmesi, muinyalape. 11 Pakuŵa yepanganyikwe yo ili yakunyalapikwa; ngasinlya nyama jao, namose ngasinjikwaya mitembo jao. 12 Chachili chose chachikutama mmesi changali ni maŵegoŵego ni makalaŵesya, ili yakunyalapikwa.

13 Ijuni yi yanayose chiŵe yakunyalapikwa, kwapele ngasinlya kapungu ni lipupila mbugu ni liundi, 14 ni kasinga ni itotola yaili yose, 15 ni makungulu gagali gose, 16 mbuni ni katilili ni litipitipi ni nsinji 17 chisyantima, mnandi ni liundi lyalikulungwa, 18 ni liundi lyeswela ni litungutu ni lisonombela 19 ni chankoma ni koikoi syasili syose ni chipuupupu ni chiputiputi.

20 Ikoko yose yaikuguluka ni yaikwenda ni makongolo ncheche chiiŵe yakunyalapikwa kukwenu. 21 Namose yeleyo ipali yepanganyikwe ine yaili ni mapapiko ni yaikwenda ni makongolo ncheche yaguluchila mulitaka nkukombola kulya. 22 Kutyochela ni yeleyo nkukombo kulya sombe syasili syose ni itete ni nyembule ni parare syasili syose. 23 Nambo ikoko ine yose yaili ni mapapiko ni makongolo ncheche ili yakuinyalapa kukwenu.

24 Inyama yo chiintesye mme ŵangakundikwa kwa mapopelo. Mundu jwajulijose juchakwaye mitembo jao chaŵe jwangakundikwa kwa mapopelo mpaka ligulo. 25 Mundu ajigalaga mitembo jakwe chaachape iwalo yakwe ni chaŵe jwangakundikwa kwa mapopelo mpaka ligulo. 26 Chinyama chachilichose chachili ni ikotwa yeŵaluche kaŵili nambo nganiilekangana pane achila chinyama changachukula ngaikukundikwa kwa mapopelo; mundu jwalijose juchakwaye mitembowa jao chaŵe jwangakundikwa kwa mapopelo. 27 Inyama yose yaikwenda ni magasa gao namuno akwete makongolo ncheche ili yangakundikwa kwa mapopelo, ni jwalijose juchakwaye ntembo wa chinyama chanti chelecho chaŵe jwangakundikwa kwa mapopelo mpaka ligulo. 28 Mundu jwalijose jwakwigala ntembo wa inyama yo chachape iwalo yakwe nombe jo chaŵe jwangakundikwa kwa mapopelo mpaka ligulo. Inyama yo ili yangakundikwa kwa mapopelo kukwenu.

29 Nkati inyama yaikukwaŵa pa litaka, yeleyi ili yangakundikwa kwa mapopelo: masulu ni makoswe ni nankwalakwasa yekulungwa ya uwele ŵaali wose. 30 Ni makwakwala ni ligondo sakata ni ipupa ni chengamauta ni nalwiyi. 31 Ŵele wose ŵakukwaŵa pa litaka ngakukundikwa kwa mapopelo kukwenu ni jwalijose juchakwaye mitembo jao, chaŵe jwangakundikwa kwa mapopelo mpaka ligulo. 32 Iŵaga jumo jwao chawe ni kugwilila pa chindu chachili chose, chiŵe chindu cha mbao pane chiwalo pane lipende pane ligunia pane choombo chachili chose chachikutumika, choombo cho chichiŵe changakundikwa kwa mapopelo mpaka ligulo. Kuti chiŵe chambone chikusachilwa chiloŵechekwe mmeesi. 33 Iŵaga ntembo wakwe ugwilile pa choombo cha lilongo nipele chindu chachili chose chachili mwelemo chichiŵe changakundikwa kwa mapopelo kukweni ni choombo cho chikusachilwa chikasikwe. 34 Chakulya pane chakung'wa chachili chose chachili mu choombo cho, chichiŵe changakundikwa kwa mapopelo kukwenu. 35 Kila chindu chachigwililwe ni chiŵalo chachili chose cha mitembo jao chichiŵe changakundikwa kwa mapopelo, iŵaga chisiisa chatelechela mikate pane chisiisa chikusachilwa chikasikwe, indu yo ili yangakundikwa, ni mmwe nkusachilwa innyiŵalanje kuŵa yangakundikwa kwa mapopelo. 36 Namose yeleyo chisima pane meesi ga pa chiliŵa chiiŵe yambone nambo chindu chachili chose chachichijikwaye mitembo jajili mmesi mo chichiŵe changakundikwa kwa kwapopelela Akunnungu. 37 Iŵaga ntembo umo ugwilile pa mbeju syasikusachilwa kupaanda, mbeju syo tisisigalile syambone. 38 Nambo iŵaga mbeju sitajikwe mmesi ni ntembo umo ugwilile mwelemo, nipele mbeju syo sili syangakundikwa kwa kwapopelela Akunnungu kukwenu.

39 Iŵaga chinyama chachili chose nlamulikwe kulya, chawaga chisyene, jwalijose jutakwaye ntembo wakwe, chaŵe jwangakundikwa kwa mapopelo mpaka ligulo. 40 Mundu jwalijose alyaga nyama ja ntembo wo chachape iwalo yakwe ni chaŵe jwangakundikwa kwa kwapopelela Akunnungu mpaka ligulo. Ni juchajigale ntembo wo, chachape iwalo yakwe nombejo chaŵe jwangakundikwa kwa kwapopelela Akunnungu mpaka ligulo.

41 Chepanganyikwe chachili chose chachikukwaŵa pachilambo chili chindu chakunyalapikwa kukwenu, ngasinlya ng'o. 42 Chachili chose chachikukwaŵa ni lutumbo lwakwe, chachili chose chachikwenda ni makongolo ncheche pane makongolo gamajinji, ngasinlya pakuŵa chili chindu chakunyalapikwa. 43 Kwapele ngasinlitendekasya kuŵa ŵangakundikwa kwa kwapopelela Akunnungu kwa kulya yepanganyikwe yaikukwaŵa ni kwa yepanganyikwe yo chimme ŵangakundikwa kwa kwapopelela Akunnungu. 44 Pakuŵa uneji ndili Ambuje Akunnungu, Akunnungu ŵenu, nliŵiche pajika kusyenesyene kwaligongo lyangu ni kusigalila upaande wangu, pakuŵa uneji ngwanile mu yose yosepe. Namose ngasinlitendekasya ŵangakundikwa ni chindu chachili chose chachikukwaŵa pachilambo. 45 Uneji ndili Ambuje Akunnungu junantyosisye ku chilambo cha ku Misili, melepe meje Akunnungu ŵenu, kwapele mmeje upaande wangu pakuŵa uneji ngwanile mu yose yosepe.

46 Nipele, lyelelyo ni lilamulo nkati inyama ni ijuni ni yepanganyikwe yose yejumi yaikwenda mmeesi ni yaikwenda pa litaka. 47 Nkusachilwa kulekanganya pasikati ja chindu chachikukundikwa ni changakundikwa kwa kwapopelela Akunnungu, chachikukundikwa kuligwa ni changakundikwa kuligwa kwa kwapopelela Akunnungu.