1 Ambuje Akunnungu ŵaasalile che Musa ni che Haluni, 2 mundu jwalijose aŵaga ni chakuimbila pane upele pane chiŵengwa cheswela pa chiilu pakwe, chachikukomboleka kuŵa ulwele wa pa lipende wakwambuchisya, ikusachilwa ŵaaichinawo ku che Haluni jwambopesi, pane kwa jumo mwa achiŵanagwe jwaali jwambopesi. 3 Jwambombesi chalolelole chakuimbila chachili pa lipende lyakwe ni iŵaga umbo sya pelepo sigalawiche ni kuŵa mbee ni iŵaga chilonda chijinjilisye nkati pa lipende lyakwe, nipele welewo chiuŵe ulwele wakwambuchisya. Jwambopesi amalaga kunnolalola, nipele chantangasye mundu jo kuŵa jwangakundikwa pa kwapopelela Akunnungu. 4 Iŵaga chiŵengwa cho pa lipende chili mbee, nambo nganichijinjilisya mu lipende namose umbo sya pelepo nganisigalauka ni kuŵa mbee, nipele jwambopesi chammiche pajika jwele mundu jo kwa moŵa nsano ni gaŵili. 5 Pa lyuŵa lya nsano ni lyaaŵili, jwambopesi channolelole sooni mundu jo, ni iŵaga malinga ni ulole wa jwambopesi chiŵengwa cho nganichijenela mu lipende lyakwe, jwambopesi chammiche pajika mundu jo kwa moŵa gane nsano ni gaŵili. 6 Pa lyuŵa lya nsano ni gaŵili, jwambopesi channolelole sooni, ni iŵaga chiŵengwa cho chipungwiche, ni nganichijenela mu lipende lyakwe, jwambopesi chantangasye mundu jo kuŵa jwakundikwe pa kwapopelela Akunnungu, weleo uli upele pe. Mundu jo akusachilwa achape iwalo yakwe, nombejo chaŵe jwakundikwe. 7 Nambo chiŵengwa cho chajenelaga pa lipende lyakwe pakumala mundu jo kulilosya ku jwambopesi, mundu jo akusachilwa aiche sooni ku jwambopesi. 8 Jwambopesi channolelole sooni, ni iŵaga chiŵengwa cho chijenele pa lipende, chantangasye mundu jo kuŵa jwangakundikwa pa kwapopelela Akunnungu, nikuti weleo uli ulwele wa lipende wakwambuchisya.

9 Iŵaga mundu akwete ulwele wa lipende wakwambuchisya, ŵaichenawo kwa jwambopesi. 10 Jwambopesi channolelole ni iŵaga kwana chakuimbila chaswela pachanya pakwe chachikusitesya umbo sya pelepo siŵe syeswela mbee ni iŵaga chakuimbila cho chigalawiche kuŵa chilonda cheŵisi, 11 weleo uli ulwele wa lipende wangapikana ntela. Jwambopesi chantangasye mundu jo kuŵa jwangakundikwa kwa kwapopelela. Nganilipagwa ligongo lya kummika pajika mundu jo pakuŵa chaŵe jwangakundikwa pa kwapopelela Akunnungu. 12 Iŵaga ulwele ujenele pa lipende pakwe pose, kutandilila kuntwe mpaka kusajo, malinga ni jwambopesi ichajile pakuwona, 13 pelepo jwambopesi channolelole. Aiwonaga kuti pa lipende pakwe palamile, nipele chantangasye mundu jo kuŵa jwakukundikwa kwa kwapopelela Akunnungu. Pakuŵa lipende lyose liusile mu lyaŵelele, mundu jo ali jwakukundikwa kwa mapopelo. 14 Nambo chaonekaga chakuimbila papali pose mu mu chiilu cha mundu jo, nipele mundu jo chaŵe jwangakundikwa kwa kwapopelela Akunnungu. 15 Jwambopesi patachilolelole chakuimbila cho, chantangasye mundu jo kuŵa jwangakundikwa kwa kwapopelela Akunnungu, pakuŵa akwete ulwele wa lipende wakwambuchisya. 16 Nambo chakuimbila cho chalamaga ni lipende lyakwe kuujila mu lyaŵelele, mundu jo chauje kwa jwambopesi. 17 Jwambopesi channolelole sooni, iŵaga chakuimbila cho chilamile ni lipende lyakwe liusile mu lyaŵelele, jwambopesi chantangasye mundu jo kuŵa jwakukundikwa pa kwapopelela Akunnungu.

18 Iŵaga mundu akwete nammatu, nombecho chilamile, 19 apala papaliji ni nammatu chakopochelaga chakuimbila chachikuoneka cheswela pane uchejeu pane uchechejeu kanondi, akusachilwa akalosye kwa jwambopesi. 20 Jwambopesi channolelole mundu jo. Iŵaga chaiwone kuti pagalawiche kuŵa lisimbo ni umbo sya pelepo sigalawiche kuŵa mbee, nipele jwambopesi chantangasye mundu jo kuŵa jwangakundikwa kwa kwapopelela Akunnungu, weleo uli ulwele wakwambuchisye waukopochele apala papaliji ni nammatu. 21 Nambo iŵaga jwambopesi channolelole mundu jo ni kwiwona kuti umbo sya pelepo nganisiŵa syeswela namose lisimbo nganilipagwa, nambo panyaasile, nipele chammiche pajika mundu jo kwa moŵa nsano ni gaŵili. 22 Iŵaga ulwele wo ukuenela mu lipende, nipele jwambopesi chantangasye mundu jo kuŵa jwangakundikwa kwa kwapopelela Akunnungu, akwete ulwele wakwambuchisya. 23 Nambo iŵaga alama jila nganijigalauga namose kwenela, lyelelyo lili liŵasi lyalikopochele ni nammatu, jwambopesi chantangasye mundu jo kuwa jwakukundikwa kwa kwapopelela Akunnungu.

24 Iŵaga mundu apile pa lipende lyakwe ni papapile po pagalaukaga kuŵa papachejeu kanandi pane papaswela, 25 jwambopesi chapalolelole. Aionaga kuti umbo syasili pelepo sigalawiche kuŵa papaswela, ni pelepo pakopochele lisimbo, kwapele, weleo uli ulwele wakwambuchisya. Ulwele wo ukopochele pelepo papapile po. Jwambopesi chantangasye mundu jo kuŵa jwangakundikwa kwa kwapopelea Akunnungu, pakuŵa akwete ulwele wa lipende waukwambuchisya. 26 Nambo jwambopesi apalolalolaga ni kuiona kuti umbo sya pelepo ngaŵa syeswela ni sooni nganilipagwa lisimbo ni panyasile, nipele jwambopesi chammiche pajika mundu jo kwa moŵa saba. 27 Pa lyuŵa lya nsano ni gaŵili jwambopesi channolelole sooni ni iŵaga ukwenela pa lipende, jwambopesi chantangasye kuŵa jwangakundikwa kwa kwapopelela Akunnungu, pakuŵa akwete ulwele wa lipende wakwambuchisya. 28 Nambo, iŵaga alama jila nganijigalauka ni nganijijenela pa lipende, nambo panyasile, chelecho chili chakuimbila chachikopochele ni kupya. Jwambopesi chantangasye mundu jo kuŵa jwakukundikwa kwa kwapopeloela Akunnungu, pakuŵa lyelelyo lili liŵasi lyalikopochele ni kupya.

29 Mundu jwalijose, aŵeje jwankongwe pane jwannume, aŵaga ni chakuimbila pantwe pane pachimbundi, 30 Jwambopesi tachilolelole chakuimbila cho, ni aionaga kuti chijinjilisye nkati ni umbo syasili pelepo sili syamanjano ni sili nyololo, jwambopesi chantangasye mundu jo kuŵa jwangakundikwa kwa kwapopelela Akunnungu, pakuŵa akwete upele, weleo uli ulwele wakwambuchisya pantwe pane pa chimbundi. 31 Nambo iŵaga jwambopesi chapalolelole apala papaimbile po, aionaga kuti nganilipagwa lisimbo ni umbo sya pelepo nganisiŵa syepiliu, nipele jwambopesi chammiche pajika mundu jo kwa moŵa nsano ni gaŵili. 32 Pa lyuŵa lya nsano ni gaŵili jwambopesi chapalolelole papaimbile po, aionaga kuti nganilipagwa lisimbo ni umbo sya pelepo nganisiŵa sya manjano namose ngapagwa upele wauliwose pelepo, 33 mundu jo akusachilwa amyolekwe umbo pane ndeu syakwe. Nambo papali ni upele po akapamyola. Nipele jwambopesi chammiche pajika mundu jo kwa moŵa gane nsano ni gaŵili. 34 Pa lyuŵa lya nsano ni gaŵili jwambopesi chaulolelole sooni upele wo, iŵaga nganiujenela pa lipende ni nganilipagwa lisimbo, jwambopesi chantangasye kuŵa jwakukundikwa kwa kwapopelela kwa Akunnungu. Mundu jo chachape nguo syakwe, nombejo chaŵe jwakukundikwa. 35 Nambo upele wo wajenelaga pakumala kuntangasya kuŵa jwakukundikwa kwa kwapopelela Akunnungu, 36 jwambopesi channolelole mundu jo ni iŵaga upele wo ujenele pa lipende, jwambopesi ngaakola sooni ligongo lya kulola umbo sya manjano, mundu jo chaŵe jwangakundikwa kwa kwapopelela Akunnungu. 37 Nambo, namose yeleyo, pa ulamusi wakwe aionaga kuti nganipagalauka ni umbo syepiliu simesile pamalo po, upele ulamile, jwambopesi chantangasye mundu jo kuŵa jwakukundikwa kwa kwapopelela Akunnungu.

38 Iŵaga jwankongwe pane jwannume akwete maŵalamaŵala gamaswela pa lipende lyakwe, 39 jwambopesi channolelole mundu jo. Iŵaga chaiwone kuti maŵalamaŵala go gali gamaswela kanandi, welewo uli upele wakawaida, mundu jo ali jwakukundikwa kwa kwapopelela Akunnungu.

40 Iŵaga jwannume apatile lulasi, jwelejo ali jwakukundikwa kwa mapopelo pakuŵa akwete lulasi pe. 41 Ni iŵaga lulasi lo lujenele kutandilila kunyuma mpaka paujo, mundu jo akwete lulasi pe, ali jwakukundikwa kwa kwapopelela Akunnungu. 42 Nambo iŵaga pa lulasi po pane pausyo pakwe, kwana chakuimbila chewanganyiche uchejeu ni uswela, weleo uli ulwele wakwambuchisya wekopochele mu lulasi lwakwe lwa pantwe pane pausyo pakwe. 43 Jwambopesi channolelole mundu jo. Aiwonaga kuti chakuimbila cho chiwanganyiche uchejeu ni uswela pa lulasi pane kumeso ni chikuloleka nti ulwele wa lipende waukwambuchisya, 44 nipele mundu jo ali jwakulwala ni sooni akwete ulwele wa lipende waukwambuchisya. Jwambopesi chantangasye mundu jo kuŵa jwangakundikwa kwa kwapopelela Akunnungu kwaligongo lya chakuimbila chachili mu ntwe mwakwe.

45 Mundu jwakwete ulwele wa lipende wakwambuchisya akusachilwa awaleje masanjala, akasamula umbo syakwe ni aunichile kutandilila pambula jakwe mpaka pa chimbundi ni kunyanyisya achitiji, "Une ndili jwangakundikwa kwa kwapopelela Akunnungu, une ndili jwangakundikwa kwa kwapopelela Akunnungu." 46 Chajendelechele kuŵa jwangakundikwa kwa kwapopelo Akunnungu kwa moŵa gose pachaŵe ni ulwele wo. Akusachilwa atame pajikape paasa pa chigono.

47 Iŵaga kwana nguo jajikwambuchisya lipundugulu, jiŵe ja manyunya ga ngondolo pane ja nguo jeswela mbee, 48 nguo jo jiŵe jakuluka pane jakupota kwa usi weswela mbee pane kwa manyunya ga ngondolo pane jili nguo ja lipende lyalili lyose. 49 Iŵaga lipundugu lyo likamwile mu nguo jeluche pane jepote pane mu lipende, lipundugulu lyo liŵeje lya langi ja chisamba pane jechejeu, lyelelyo lili lipundugulu lyalikwenela. Kwayele ikusachilwa kunnosya jwambopesi. 50 Jwambopesi chalilolelole lipundugulu lyo ni kujiŵika pajikape chele chindu cho kwa moŵa nsano ni gaŵili. 51 Lyuŵa lya nsano ni gaŵili chalolelole lipundugulu lyo, iŵaga lijenele mu nguo pane chindu cheluche pane chepote pane chindu chekolosye ni lipende, chindu cho chili ni lipundugulu. Kwayele chili changakundikwa kwa kwapopelela Akunnungu. 52 Jwambopesi chajijoche pa mooto nguo jo pane chele chindu cheluche pane chepote, chiŵeje cha manyunya ga ngondolo pane cheswela pane chakolochekwe kwa lipende chejambuchikwe; chindu chachilichose chikusachilwa chijochekwe pamooto.

53 Nambo jwambopesi alolalolaga ni kwiwona kuti lipundugulu lyo nganijijenele mu nguo jo, iŵeje mu nguo jeluchikwe, pane chindu chepotekwe, pane chekolosye ni lipende, 54 pelepo jwambopesi chalamule kuti chindu cho chichapikwe, ni kuŵichikwa pajika kwa katema kaane ka moŵa nsano ni gaŵili. 55 Jwambopesi chachilolelole chindu cho pakumala kuchichapa. Iŵaga alama jila nganijigalauka langi jakwe namose lipundugulu lyo nganilijenela, nipele nguo jo jili jangakundikwa kwa kwapopelela Akunnungu. Nguo jo chinjijochekwe pa mooto, iŵeje alama ja lipundugulu jili paujo pane kunyuma kwa nguo jo. 56 Iŵaga jwambopesi chaiwone kuti alama jila jiuŵile pakumala kujichapa, nipele chakate apala papajambuchikwe pa nguo pane lipende pane chindu chachiluchikwe pane kupota. 57 Nambo iŵaga alama jioneche sooni munguo pane chindu cheluche pane chepote pane mu chindu chachilichose cha mapende, nikuti lipundugulu lyo likuenela. Pelepo nguo jo chinjitinisye ni mooto. 58 Nambo nguo pane chindu chachiluchikwe pane kupota pane chekolosye ni lipende chechape, lyakopochelaga lipundugulu sooni, chikusachilwa chichapikwe sooni, nombecho chichiŵe chekundikwe kwa kwapopelela Akunnungu.

59 Gelega ni malajisyo nkati lipundugulu lyalikwambuchisya lyalili mu nguo jekolochekwe ni manyunya ga ngondolo pane nguo jeswela pane chindu chepotekwe pane cheluchikwe pane chindu chekolosye ni lipende, kwa ligongo lya kujitangasya kuŵa nguo jekundikwe pane jangakundikwa kwa kwapopelela Akunnungu.