1 Ambuje Akunnungu ŵaasalile che Musa ni che Haluni, 2 ŵasalile Ŵaisilaeli kuti jwannume jwajulijose wankopokaga usakwa kumasisimilo wautyochele ni ulwele wauliwose, usakwa wo uli chindu changakundikwa kwa kwapopelela Akunnungu. 3 Naga usakwa wo ukwendelechela kunkopoka pane usiŵile, chiuntesye jwnnume jo aŵe jwangakundikwa kwa kwapopelela Akunnungu. Yeleyi ni ichiyintendasye jwannume jwaukunkopoka usakwa aŵe jwangakundikwa kwa kwapopelela Akunnungu: 4 Chindanda chachilichose chichagonele pane kutamila jwannume jo chichiŵe changakundikwa kwa kwapopelela Akunnungu. 5 Mundu jwalijose juchakwaye chindanda cha jwannume jo akusachilwa achape nguo syakwe ni koga, nombejo chaŵe jwangakundikwa kwa kwapopelela Akunnungu mpaka ligulo. 6 Mundu jwalijose juchatamile chindu chachilichose chatamile jwannume jo, akusachilwa achape nguo syakwe ni koga, nombejo chaŵe jwangakundikwa kwa kwapopelela Akunnungu mpaka ligulo. 7 Mundu jwalijose juchankwaye jwannume jwaukunkopoka usakwa, akusachilwa achape nguo syakwe ni koga, nombejo chaŵe jwangakundikwa kwa kwapopelela mpaka ligulo. 8 Mundu jwalijose juchasunilwe mata ni jwannume jwaukunkopoka usakwa jo akusachilwa achape nguo syakwe ni koga, nombejo chaŵe jwangakundikwa kwa kwapopelela Akunnungu mpaka ligulo. 9 Chachilichose chichatamile jwannume jo pa chinyama chachilichose chichiŵe changakundikwa kwa kwapopelela Akunnungu. 10 Mundu jwalijose juchachikwaye chindu chachilichose chiŵatamile jwannume jo, chaŵe jwangakundikwa kwa kwapopelela Akunnungu mpaka ligulo. Mundu jwalijose juchajigale indu yo, chachape nguo syakwe ni koga, nombejo chaŵe jwangakundikwa kwa kwapopelela Akunnungu mpaka ligulo. 11 Jwannume jo ankwayaga mundu panganaŵa kaje mmakono mwakwe, mundu jwankwaiye jo akusachilwa achape nguo syakwe ni koga, nombejo chaŵe jwangakundikwa kwa kwapopelela Akunnungu mpaka ligulo. 12 Choombo chachilichose cha lilongo achikwayaga jwannume jo chikusachilwa chikasikwe. Nambo chindu chachilichose cha chitela chikusachilwa chijosekwe ni meesi.

13 Jwannume jo iŵaga alamile ulwele wakwe, agaŵalanje moŵa nsano ni gaŵili, nipele achape nguo syakwe ni koga kwa meesi gagakuilima, nombejo chaŵe jwangakundikwa kwa kwapopelela Akunnungu. 14 Pa lyuŵa lya nsano ni lyaatatu aichenawo njuŵa siŵili pane makandi gaŵili ga nguunda paujo pa Ambuje Akunnungu pannango wa Lisakasa lya Kusimanilana ni kwapa jwambopesi. 15 Jwambopesi chaityosye yeleyo, chimo kwaligongo lya mbopesi ja kulechelesya sambi ni chine kwaligongo lya mbopesi jakutinisya. Nombe jwambopesi champanganyichisye jwannume jo ujilanyo paujo pa Ambuje Akunnungu kwaligongo lya kukopoka usakwa kwakwe.

16 Iŵaga jwannume sikwatyoka mbeju syakwe sya chilume ajojeje chiilu chose kwa meesi, nombejo chaŵe jwangakundikwa kwa kwapopelela Akunnungu mpaka ligulo. 17 Chakuwala chilichose pane lipende, chachigwililwe ni mbeju ja chilume chichapikwe ni meesi, chichiŵe changakundikwa kwa kwapopelela Akunnungu mpaka ligulo. 18 Jwannume aoneganaga ni jwankongwe, wose ŵanaŵaŵili jwannume ni jwankongwe akusachilwa ajojeje kwa meesi, ni ŵanyawo chaŵe ŵangakundikwa kwa kwapopelela Akunnungu mpaka ligulo.

19 Iŵaga jwankongwe ali pa ulwele wakwe wachikongwe chaŵe jwangakundikwa kwa kwapopelela Akunnungu kwa moŵa nsano ni gaŵili, ni mundu jwalijose juchankwaye jwankongwe jo chaŵe jwangakundikwa kwa kwapopelela Akunnungu mpaka ligulo. 20 Chindu chachilichose chakugonela pane chaatamile jwankongwe jo, ali chiŵela mu ulwele wakwe, chichiŵe changakundikwa kwa mapopelo.

21 Mundu jwalijose juchachikwaye chindanda cha jwankongwe jo achapeje yakuwala yakwe ni koga kwa meesi, nombejo chaŵe jwangakundikwa kwa kwapopelela Akunnungu mpaka ligulo. 22 Mundu jwalijose juchachikwaye chindu chachilichose chakutamila jwankongwe jo achapeje yakuwala yakwe ni koga ni meesi, nombejo chaŵe jwangakundikwa kwa kwapopelela Akunnungu mpaka ligulo. 23 Iŵaga chili chindanda pane chachilichose chiŵatamile jwankongwe jo, mundu jwalijose achikwayaga chaŵe jwangakundikwa kwa kwapopelela Akunnungu mpaka ligulo. 24 Jwannume aoneganaga ni jwankongwe jwaali pa ulwele wakwe wa chikongwe, chaŵe jwangakundikwa kwa kwapopelela Akunnungu kwa moŵa nsano ni gaŵili. Chindanda chachilichose chichagonele jwannume jo chichiŵe changakundikwa kwa kwapopelela Akunnungu.

25 Iŵaga jwankongwe akwasa miasi kwa moŵa gamajinji kugapunda moŵa ga ulwele wakwe wa chikongwe, pane iŵaga ulwele wakwe wachikongwe ukupelenganya moŵa gakwe, jwankongwe jo chaŵe jwangakundikwa kwa kwapopelela Akunnungu kwa katema kose kakwasa miasi jo mpelaga yaitite kuŵa kwa moŵa ga ulwele wakwe wa chikongwe. 26 Chindanda chachilichose chaakugonela pa moŵa gose go pane chindu chachilichose chakutamila, chichiŵe changakundikwa kwa kwapopelela Akunnungu, nti yaikuti pakuŵa pa katema ka ulwele wakwe wachikongwe. 27 Mundu jwalijose juchaikwaye indu yo chaŵe jwangakundikwa kwa kwapopeloela Akunnungu, chachape yakuwala yakwe ni koga, nombejo chaŵe jwangakundikwa kwa kwapopeloela Akunnungu mpaka ligulo. 28 Wamalaga ulwele wakwe wa chikongwe, pakuti aŵe jwakukundikwa kwa kwapopelela Akunnungu atameje kwa moŵa nsano ni gaŵili, pelepo ni pataŵe jwakukundikwa kwa kwapopelela Akunnungu. 29 Pa lyuŵa lya nsano ni lyaatatu chajigale njuŵa siŵili pane makandi gaŵili ga nguunda, aichenago kwa jwambopesi pannango wa Lisakasa lya Kusimanilana. 30 Jwambopesi chaityosye chimo kwaligongo lya mbopesi jakulechelesya sambi ni chine kwaligongo lya mbopesi jakutinisya. Kwa kutenda yeleyi jwambopesi chatende ujilanyo kwa ligongo lya jwankongwe jo paujo pa Ambuje Akunnungu kwaligongo lya ungakundikwa wakwe pakwapopelela Akunnungu kwaligongo lya kukopokwa ni miasi.

31 Nkusachilwa mwajamuche Ŵaisilaeli akaika kutenda indu ichiyaatendekasye akakundikwa ni une. Atendaga yele indu yo, taachilitendekasya Lisakasa lyangu Lyakusimanilana lyalili pasikati jao likaŵa pamalo papakukundikwa kwa kuumbopelela une, kwayele tachiwa.

32 Gelega gali malajisyo gankati jwannume jwaukunkopoka usakwa kumasisimilo waukutyochela ni ulwele wauliwose, ni kwa jwannume jwasikwatyoka mbeju syakwe sya chilume, ni kuntendekasya aŵe jwangakundikwa kwa kwapopelela Akunnungu, 33 nombe ni kwa jwankongwe jwaali pa ulwele wakwe wa chikongwe ni kwa jwannume pane jwankongwe jwaukunkopoka usakwa kumasisimilo waukutyochela ni ulwele wauliwose, ni kwa jwannume jwaonegene ni jwankongwe jwaali pa ulwele wakwe wa chikongwe.