1 Pa lyuŵa lyaandanda lya mwesi waaŵili pakumala Ŵaisilaeli kutyoka ku Misili, Ambuje Akunnungu ŵakungulwiche ni che Musa ku chipululu cha Sinai mu Lisakasa lya Kusimanilana kwaligongo lya Akunnungu. Ŵaasalile kuti, 2 "Mmwe ni che Haluni mwaŵalanje Ŵaisilaeli malinga ni mitundu jao ni minango jao, kila jwannume kwa liina lyakwe, jumojumo. 3 Timwaŵalanje ŵandu malinga ni mitundu jao, achalume wose ŵaali ni yaka ishilini ni kupunda ŵaali ni ukombole wa kuputana ngondo. 4 Sooni jwannume jumo mu kila lukosyo jwaali chilongola jwa lukosyo lyo tankamusye kuŵalanga." 5 Gelega gali mena ga ŵandu ŵatachinkamusya: Kutyochela mu lukosyo lwa che Lobeni jwaliji che Elisuli mwanache jwa che Shedeuli.

6 Kutyochela mu lukosyo lwa che Simeoni jwaliji che Shelumieli mwanache jwa che Sulishadai,

7 kutyochela mu lukosyo lwa che Yuda, jwaliji che Nashoni mwanache jwa che Aminadabu,

8 kutyochela mu lukosyo lwa Isakali, jwaliji che Netaneli mwanache jwa che Suali,

9 kutyochela mu lukosyo lwa Sabuloni, jwaliji che Eliabu mwanache jwa che Heloni,

10 Kwa ŵanache ŵa che Yusufu: Kutyochela mu lukosyo lwa Efulaimu; jwaliji che Elishama mwanache jwa che Amihudi. Ni kutyochela mu lukosyo lwa Manase; jwaliji che Gamalieli mwaanche jwa che Pedasuli.

11 Kutyochela mu lukosyo lwa Benjamini, jwaliji che Abidani mwanache jwa che Gidioni.

12 Kutyochela mu lukosyo lwa Dani, jwaliji che Ahieseli mwanache jwa che Amishadai.

13 Kutyochela mu lukosyo lwa Asheli, jwaliji che Pagieli mwanache jwa che Okilani.

14 Kutyochela mu lukosyo lwa Gadi, jwaliji che Eliasafu mwanache jwa che Deueli.

15 Kutyochela mu lukosyo lwa Nafutali, jwaliji che Ahila mwanache jwa che Enani.

16 Ŵele ni uŵasagulikwe pasikati ja Ŵaisilaeli wose, ŵaliji ilongola ŵa ngosyo syao ni ilongola ŵa mitundu jao.

17 Nipele, che Musa ni che Haluni ŵaasongangenye ŵandu wose ŵasasikwe meena, 18 pa lyuŵa lilalila lyandanda lya mwesi waaŵili, ŵaasongangenye ŵandu wose uŵaŵalanjikwe. Ŵandu ŵaŵanjikwe malinga ni mitundu jawo ni ulongo wao, nombe achalume wose uŵaliji ni yaka ishilini ni kupunda ŵalembekwe meena gao jumojumo, 19 mpela Ambuje Akunnungu iŵatite kwalamulila che Musa. Kwayele ŵaŵalasile ŵandu ŵa, kuchipululu cha Sinai kula.

20 Kutyochela mu uŵelesi wa che Lobeni juŵaliji jwakwitiwo jwa Isilaeli juŵaŵilanjikwe che Yakubu, ŵandu wose ŵaŵaliji ni yaka ishilini ni kupunda ŵaŵaliji ni ukombole wa kuputana ngondo ŵalembekwe meena gao, jumojumo malinga ni iŵelesi yao ni mitundu jao ni minango jao. 21 Ŵaŵaŵalanjikwe mu lukosyo lwa Lobeni ŵaliji ŵandu elufu alubaini na sita na mia tano.

22 Kutyochela mu lukosyo lwa Simeoni malinga ni iŵelesi yao ni mitundu jao ni minango jao, malinga ni uŵalanje ŵa meena gao jumojumo, ŵaali ni lisusa lya yaka ishilini ni kupunda ŵakusachilwa kwinjila mu mpingo ŵa ŵandu ŵa ngondo, 23 ŵaŵaŵalanjikwe mu lukosyo lwa Simeoni ŵaliji ŵandu elufu amsini na tina na mia tatu.

24 Kutyochela mu lukosyo lwa Gadi ŵandu wose ŵaali ni lisusa lya yaka ishilini ni kupunda ŵakusachilwa kwinjila mu mpingo wa ŵandu ŵa ngondo ŵalembekwe meena gao, malinga ni mitundu jao ni minango jao, 25 ŵaŵaŵalanjikwe mu lukosyo lwa Gadi ŵalinji ŵandu elufu alubaini na tano ni miasita ni amsini.

26 Ŵandu ŵaŵakuiye ŵaliji ŵandu kutyochela mu lukosyo lwa Yuda malinga ni mitundu jao ni ulongo wao malinga uŵalanje wa meena gao, ŵaali ni lisusa lya yaka ishilini ni kupunda ŵakusachilwa kwinjila mu mpingo wa ŵandu ŵangondo, 27 ŵaŵaŵalanjikwe mu lukosyo lwa Yuda waliji ŵandu elufu sabini na nne na mia sita.

28 Ŵakuiye ŵandu kutyochela mu lukosyo lwa Isakali, ŵandu wose ŵaali ni lisusa lya yaka ishilini ni kupunda ŵakusachilwa kwaula ku ngondo ŵalembekwe meena gao malinga ni mitundu jao ni minango jao, 29 ŵaŵaŵalanjikwe mu lukosyo lwa Isakali ŵaliji ŵandu elufu amsini na nne ni mia nne.

30 Ŵakuiye ŵandu kutyochela mu lukosyo lwa Sabuloni, ŵandu wose ŵaali ni lisusa lya yaka ishilini ni kupunda ŵakusachilwa kwaula ku ngondo ŵalembekwe meena gao malinga ni mitundu jao ni minango jao, 31 ŵaŵaŵalanjikwe mu lukosyo lwa Sabuloni, ŵaliji ŵandu elufu amsini na saba na mia nne.

32 Ŵaŵakuiye ŵaliji ŵandu kutyochela mu lukosyo lwa Efulaimu mwanagwe che Yusufu, ŵandu wose ŵaali ni lisusa lya yaka ishilini ni kupunda ŵakusachilwa kwaula ku ngondo ŵalembekwe meena gao malinga ni mitundu jao ni minango jao, 33 ŵaŵaŵalanjikwe mu lukosyo lwa Efulaimu ŵaliji ŵandu elufu alubaini na mia tano.

34 Kutyochela mu lukosyo lwa Manase mwanagwe che Yusufu, ŵandu wose ŵaali ni lisusa lya yaka ishilini ni kupunda ŵakusachilwa kwaula ku ngondo ŵalembekwe meena gao malinga ni mitundu jao ni minango jao, 35 ŵaŵaŵalanjikwe mu lukosyo lwa Manase ŵaliji ŵandu elufu salasini na mbili na mia mbili.

36 Kutyochela mu lukosyo lwa Benjamini ŵandu wose ŵaali ni lisusa lya yaka ishilini ni kupunda ŵakusachilwa kwaula ku ngondo ŵalembekwe meena gao malinga ni mitundu jao ni minango jao, 37 ŵaŵaŵalanjikwe mu lukosyo lwa Benjami ŵaliji ŵandu elufu salasini na tano na mia nne.

38 Kutyochela mu lukosyo lwa Dani ŵandu wose ŵaali ni lisusa lya yaka ishilini ni kupunda ŵakusachilwa kwaula ku ngondo ŵalembekwe meena gao malinga ni mitundu jao ni minango jao, 39 ŵaŵaŵalanjikwe mu lukosyo lwa Dani ŵaliji ŵandu elufu sitini na mbili na mia saba.

40 Ŵaŵakuiye ŵaliji ŵandu kutyochela mu lukosyo lwa Asheli, ŵandu wose ŵaali ni lisusa lya yaka ishilini ni kupunda ŵakusachilwa kwaula ku ngondo ŵalembekwe meena gao malinga ni mitundu jao ni minango jao, 41 ŵaŵaŵalanjikwe mu lukosyo lwa Asheli ŵaliji ŵandu elufu alubaini na moja na mia tano.

42 Ŵakuiye ŵandu kutyochela mu lukosyo lwa Nafutali, ŵandu wose ŵaali ni lisusa lya yaka ishilini ni kupunda ŵakusachilwa kwaula ku ngondo ŵalembekwe meena gao malinga ni mitundu jao ni minango jao, 43 ŵaŵaŵalanjikwe mu lukosyo lwa Nafutali ŵaliji ŵandu elufu amsini na tatu na mia nne.

44 Ŵeleŵa ni ŵandu ŵaŵaŵalanjikwe ni che Musa ni che Haluni achikamuswaga n ilongola kumi na mbili ŵa Isilaeli, kila jumo achijimililaga ntundu wakwe. 45 Kwayele achalume wose ŵa Isilaeli ŵaali ni lisusa lwa yaka ishilini ni kupunda, ŵaŵasachilwe kwaula ku ngondo mu chilambo cha Isilaeli malinga ni ulongo wao; 46 ŵaliji ŵandu laki sita na elufu tatu na mia tano na amsini.

47 Nambo Ŵalawi nganaŵalanjikwa pamo ni aŵala ŵandu ŵa ngosyo sine, 48 pakuŵa Ambuje Akunnungu ŵaasalile che Musa, 49 "Nkaaŵalanga ŵandu ŵa lukosyo lwa Laŵi pamo ni Ŵaisilaeli ŵane. 50 Nambo chimwasagule aŵe ŵakwimilila ŵa Lisakasa lya Kusimanilana kwaligongo lya Akunnungu, ni yoombo yakwe yose ni kila chindu chachili munkati mwakwe; tachiŵa ŵakwigala Lisakasa pamo ni yoombo yakwe yose. Tachitumichila mwelemo ni kuŵika chigono chao kulisyungula Lisakasa lyo. 51 Sooni katema Lisakasa palikutyosyekwa kwaligongo lya kwendelechela ni ulendo, Ŵalawi ni utalityosye ni katema ka kulijimika pa kuŵika chigongo Ŵalawi jikape ni utalijimiche. Mundu jwine jwajulijose jutasejelele chiŵandi ni Lisakasa lyo taulajikwe. 52 Ŵaisilaeli ŵane wose taŵiche igono yao mipingomipingo, kila mundu pa chigono chakwe nsyene pamalo pajili bendela ja mpingo wakwe. 53 Nambo Ŵalawi taŵiche igono yao kusyungula Lisakasa lya Kusimanilana kwaligongo lya Akunnungu, ali nkulindilila kuti mundu jwalijose akaliŵandichila kuti ching'ang'a cha Akunnungu chikaasimana nsongangano wa Ŵaisilaeli. Ŵalawi pe ni utapanganye masengo pa Lisakasa lyo." 54 Kwayele Ŵaisilaeli ŵatesile mpela Ambuje Akunnungu iŵatite pakunlajisya che Musa.