1 Ŵaisilaeli paŵaliji ku Shitimu ko, achalume ŵatandite kutenda chikululu ni achakongwe ŵa ku Moabu. 2 Achakongwe ŵa ŵaalalikaga Ŵaisilaeli alumbikane nawo paŵatyosyaga mbopesi kwa minungu jiŵajipopelelaga. 3 Yeleyo ni iŵatite Ŵaisilaeli kulilumbikanya ni nnungu Baali jwa ku Peoli, nombe lutumbilo lwa Ambuje Akunnungu lwaichele Ŵaisilaeli. 4 Nipele, Ambuje Akunnungu ŵasalile che Musa kuti, "Mwajigale ilongola wosepe ŵa Ŵaisilaeli mwaulaje paujo pangu muusi mbee, kuti lutumbilo lwangu pa ŵanyamwe lumale." 5 Che Musa ŵaasalile Ilongola ŵa Ŵaisilaeli kuti, "Jwalijose mwa ŵanyamwe aulajeje mundu jwalijose pasikati jenu jwati alilumbikenye ni nnungu Baali jwa ku Peoli."

6 Katema kakoko jwannume jumo jwa Chiisilaeli ŵaiche ni jwankongwe jumo Mmidiani mu lisakasa lyakwe, akuno che Musa ni Ŵaisilaeli wose ali nkulila kwa malumbo, pannango wa Lisakasa lya Kusimanilana kwaligongo lya Akunnungu. 7 Nipele, che Finehasi mwanache jwa che Eleasali mwanache jwa che Haluni jwambopesi paŵaiweni yeleyo, ŵajimwiche ni kuuleka mpingo wo ni kwaula kujigala mpamba 8 ni ŵankuilisye ajula Mwisilaeli mpaka mu lisakasa, ŵaasomile mpamba wose ŵanaŵaŵili, ni wapelengenye pa lutumbo lwa ajula Mwisilaeli ni ajula jwankongwe. Ulwele wakogoya uwatesile Ŵaisilaeli awe walesile. 9 Nambo ŵandu ŵaŵawile kwa ulwele wo ŵaliji ŵandu elufu ishilini na nne.

10 Ambuje Akunnungu ŵansalile che Musa kuti, 11 "Che Finehasi mwanache jwa che Eleasali, mwanache jwa che Haluni jwambopesi, asiŵilile lutumbilo lwangu kwa Ŵaisilaeli; pasikati jenu ni jwelejo jikape ni jwakwete wiu nti ungwete une. Lyelelyo ni ligongo nganinaajonanga Ŵaisilaeli wosepe ni lutumbilo lwangu. 12 Kwayele mwasalile kuti ngutenda lilangano najo lya chitendewele. 13 Lilangano lyo lili lyakwatenda jwelejo ni uŵelesi wakwe tachiŵa ŵambopesi moŵa gose pangali mbesi ligongo ŵakwete wiu kwaligongo lyangu, une Akunnungu ŵakwe, ni kwatendela ujilanyo Ŵaisilaeli."

14 Mwisilaeli juŵaulajikwe jo pamo ni jwankongwe jwa ku Midiani, ŵaŵilanjikwe che Simli mwanache jwa che Salu, chilongola jwa ntundu umo pa lukosyo lwa Simeoni. 15 Ni jwele jwankongwe jwa ku Midiani juŵaulajikwe jo ŵaŵilanjikwe che Kosibi mwali ju che Suli, juŵaliji chilongola jwa ntundu umo wa Ŵamidiani.

16 Nipele, Ambuje Akunnungu ŵasalile che Musa kuti, 17 "Mwagungumuchile Ŵamidiani ni kwajonanga, 18 kwaligongo lya yangalumbana iŵantesile paŵannambwisye nkati Peoli, ni kwa ligongo lya che Kosibi, mwali jwawo, juŵaulajikwe katema ka ulwele wakogoya uwalipwiche ku Peoli kula."