1 Ilongola ŵa ŵandu ŵa ntundu wa Gileadi, mwanache jwa che Makili mwanache jwa che Manase, mwanache jwa che Yusufu, ŵajawile kukunguluka ni che Musa ni ilongola ŵane ŵa Ŵaisilaeli. 2 Ŵatite kuti, "Ambuje ŵetu, Ambuje Akunnungu ŵanlamulile kwagaŵila Ŵaisilaeli chilambo pakutenda gudugudu, kuti chiŵe chao; ŵanlamulile sooni kuti mwape achiŵali ŵa che Selofehadi nlongo njetu malo ja atati ŵawo. 3 Nambo ŵanyawo alombelaga ni Ŵaisilaeli ŵa mitundu jine, malo jetu tijijaule kwa ŵandu ŵa ngosyo sisisyalombele; kwayele malo jetu uweji tijichinandwipa. 4 Pa chaka cha kuliusya lisi kwa achinsyene, malo jawo tiliŵalanjikwe pamo ni alila lya lukosyo lutalombele, ni kwayele lukosyo lwetu ngalupata malo jawo sooni."

5 Nipele, che Musa ŵaapele Ŵaisilaeli lilajisyo li kutyochela kwa Ambuje Akunnungu, ŵaasalile kuti "Ŵandu wa lukosyo lwa ntundu wa che Yusufu asasile isyene. 6 Yeleyi ni yatite kulamula Ambuje Akunnungu nkati achiŵali ŵa che Selofehadi; akukombola kulombekwa ni mundu jwalijose jwakunsaka, nambo alombele mu ntundu wa achatati ŵao pe yaani lukosyo lwa Manase, 7 kuti malo japegwilwe lukosyo lumo akapegwa ŵandu ŵa lukosyo lwine pelepo; Mwisilaeli julijose chagose malo ga lukosyo lwakwe. 8 Jwankongwe jwalijose jwakwete malo pa lukosyo lumo mwa ngosyo sya Ŵaisilaeli akusachilwa alombekwe ni mundu jwa pa lukosyo lwa atatigwe, kuti Mwisilaeli julijose apegwe malo ga achambujegwe. 9 Kwayele ngapapagwa ni malo ja lukosyo lumo jichijipegwe ŵandu ŵa lukosyo lwine. Kila lukosyo lwa Ŵaisilaeli tilusigalile pa malo jawo."

10 Achiŵali ŵa che Selofehadi ŵatesile mpela Ambuje Akunnungu iŵansalile che Musa. 11 Ŵanawose, che Mala ni che Tilisa ni che Hogila ni che Milika ni che Noa ŵalombekwe ni ulongo wa kuchitati. 12 Ŵalombekwe ni ŵandu ŵa lukosyo lwa Manase mwanache jwa che Yusufu, ni malo jawo jasigalile pa lukosyo lwa atati ŵao.

13 Gelego ni malajisyo ni makanyo gati Ambuje Akunnungu ŵapele Ŵaisilaeli kwa litala li che Musa mu iŵata ya ku Moabu, pesi lusulo lwa Yolodani chiwandika ni musi wa ku Yeliko.