1 Mwenye jwa Chikanaani jwa ku Aladi juŵatamaga kwele ku Negebu ko paŵapilikene kuti Ŵaisilaeli ŵaliji nkwika kupitila litala lya ku Atalimu, ŵajile kukwagunguluchila Ŵaisilaeli ni ŵaakamwile ŵampepe ŵawo. 2 Pelepo Ŵaisilaeli ŵataŵile nasili ji kwa Ambuje Akunnungu: "Iŵaga chintutesye twapunde ŵandu ŵa, nipele tutujijonanje tikitiki misi jawo." 3 Ambuje Akunnungu ŵagapilikanile mapopelo ga Ŵaisilaeli, nombewo ŵaatesile ŵaapunde Ŵakanaani. Ni ŵaajonasile tikitiki ni misi jawo; kwayele peuto po paŵilanjikwe Holima.

4 Ŵaisilaeli ŵajesile ulendo kutyochela ku chitumbi cha Holi ŵapite litala lyalikwaula ku bahali ja Shamu kuti achisyungule chilambo cha ku Edomu. Nambo mwitala ŵandu ŵajasile ntima. 5 Nipele, ŵatandite kwalalatila Akunnungu ni che Musa achitiji, "Ligongo chichi ntutyosisye ku Misili kuti tuwe ku chipululu kuno? Nganichipagwa chakulya! Nganigapagwa meesi? Ni uweji achi chakulya changanong'a chi chitutindikwe!"

6 Pelepo Ambuje Akunnungu ŵapeleche majoka gagali ni sumu pasikati jawo; gaalumile ŵandu, Ŵaisilaeli ŵajinji ŵawile. 7 Ŵandu ŵanjaulile che Musa ni kuti, "Tutesile sambi kwa kwalalatila Ambuje Akunnungu ni ŵalakwe nombe. Mwapopelele Ambuje Akunnungu kuti agatyosye majoka ga." Kwayele che Musa ŵaapopelele ŵele ŵandu wo. 8 Ambuje Akunnungu ŵansalile che Musa, "Nkolosye lijoka lya shaba ni nlikoleche pa sichi; mundu jwalijose jutachaluma lijoka, alolechesyaga lijoka lya shaba lyo chalame." 9 Nipele, che Musa ŵakolosisye lijoka lya shaba, ni ŵalikoleche pa sichi. Nipele mundu jwalijose lyalumaga lijoka, nombejo alolechesyaga alila lijoka lya shaba lila, akulama.

10 Ŵaisilaeli ŵajendelechele ni ulendo wao ni ŵaŵisile chigono ku Oboti. 11 Nipele ŵatyosile ku Oboti ni kuŵika chigono ku Iye Abalimu, ku chipululu chakungopochelo lyuŵa kwa Moabu. 12 Kutyochela pelepo ŵajendelechele chambujo ŵaŵisile chigono ku chiŵata cha ku Seledi. 13 Kutyochela kweleko ŵajendelechele ni ulendo, ni ŵaŵisile chigono chakumpoto kwa lusulo lwa Alinoni, lusulo lwalukuilimisya meesi kutyochela ku chilambo cha Ŵaamoli. Lusulo lwa Alinoni lwaliji mpika pasikati ja Ŵamoabu ni Ŵaamoli. 14 Lyeleli ni ligongo lyakwe chitabu cha ngondo sya Ambuje Akunnungu chikusala kuti,

"Musi wa Ŵahebu ku chilambo cha ku Sufa,

ni iŵata ya ku Alinoni,

15 ni nduluko sya iŵata

syasikwaula mpaka ku musi wa ku Ali

ni kwaula mumpika wa ku Moabu!"

16 Kutyochela pelepo ŵajendelechele ni ulendo mpaka ku Beeli; yaani isima yati Ambuje Akunnungu ŵansalile che Musa kuti, "Mwasonganye ŵandu pamo, ni une tinjapa meesi." 17 Nipele Ŵaisilaeli ŵajimbile lujimbo lu:

"Isima koposyani meesi genu,

njimbeje nkati chisima chi,

18 chisima chiŵasosile achakulu

ni ilongola ŵa ŵandu,

chiŵasosile ali akamulile lubokola lwawo lwa chimwenye

ni mikongojo."

Ŵajesile kutyochela pelepo kwaula ku Matana, 19 kutyochela ku Matana ŵaiche ku Nahalieli, ni kutyochela ku Nahalieli mpaka ku Bamoti, 20 ni kutyochela ku Bamoti ŵaiche ku chiŵata chachikuinjila mu chilambo cha ku Moabu, kuŵandichila litumbi lya Pisiga, lyati lusonga lwakwe lukulolegana ni chipululu.

21 Ŵaisilaeli ŵatumile ŵantenga kwa mwenye che Sihoni jwa Ŵaamoli, ajaule akaasalile: 22 "Ntulechelele tupite mu chilambo chenu, ngatusepuchila pambali ni ngatujinjila mmigunda pane mmigunda ja misabibu, atamuno ngatung'wa meesi ga mu isima yenu; chitupite mu litala lyekulu pe mpaka tutyoche mu chilambo chenu." 23 Nambo che Sihoni nganiŵaalechelela Ŵaisilaeli apite mu chilambo chakwe. Ŵaasonganyisye ŵangondo ŵakwe, ŵapite ku Yahasa ku chipululu kukuputana ngondo ni Ŵaisilaeli. 24 Namose yeleyo, Ŵaisilaeli ŵammuleje, ŵachijigele chilambo chakwe kutandilila ku lusulo lwa Alinoni mpaka ku lusulo lwa Yaboki, nambo mpaka ku chilambo cha Ŵaamoni pe, pakuŵa mipika jakwe jaliji jesyunguchisye lipupa. 25 Ŵaisilaeli ŵajigele kwa machili misi jose ja Ŵaamoli ni kujijigala, pamo ni musi wa ku Heshiboni mwamulimose mumusyungulile ni kutama mwelemo. 26 Musi wa ku Heshiboni waliji musi wa che Sihoni mwenye jwa Ŵaamoli, jwati kuundanda ko ŵamenyene ni mwenye jwa ku Moabu ni kujigala kwa machili chilambo chakwe chose mpaka lusulo lwa Alinoni. 27 Lyelelyo ni ligongo Ŵaamoli ŵajimbile lujimbo lu:

"Njise ku Heshiboni ni kuutaŵa sooni.

Musi wa ku Sihoni utaŵikwe sooni ni kuulimbisya.

28 Mooto wakolele kutyochela ku Heshiboni,

malamba ga mooto gatyochele ku musi wa che Sihoni,

gautinisye nsinda wa Ali ku Moabu,

gaatinisye ŵandu ŵaŵatamaga ku matumbi ga lusulo lwa Alinoni.

29 Chinlaje ŵanyamwe, ŵandu ŵa ku Moabu!

Mmulajikwe, mwanya ŵandu ŵa nnungu Kemoshi!

Mwatesisye achiŵana ŵenu ŵachilume aŵe ŵakuutukautuka,

achiŵali ŵenu mwalesile ajigalikwe kwa machili

ni mwenye che Sihoni, mwenye jwa Ŵaamoli.

30 Nambo twapundile;

Musi wa ku Heshiboni ugumulikwe mpaka musi wa ku Diboni.

Tuugumwile ni musi wa ku Nofa, waujenele mpaka ku Medeba."

31 Kwayele, Ŵaisilaeli ŵatemi ku chilambo cha Ŵaamoli. 32 Pakulama yeleyo, che Musa ŵatumile ŵakuuchilichisya ku musi wa ku Yeseli, nipele Ŵaisilaeli ŵajigele kwa machili misinda ja musi wo ni kwatopola Ŵaamoli uŵatamaga kweleko.

33 Ŵaisilaeli ŵagalawiche ŵalikuiye litala lyalikwaula ku Bashani. Mwenye che Ogu jwa ku Bashani ŵakopweche ni ŵangondo ŵakwe kukwagunguluchila ku Edilei ko. 34 Nombe Ambuje Akunnungu ŵasalile che Musa kuti, "Nkajogopa, pakuŵapo nantesile mumpunde pamo ni ŵangondo ŵakwe wose ni chilambo chakwe chose. Timwatende mpela imwantesile che Sihoni, mwenye jwa Ŵaamoli, juŵatamaga ku Heshiboni." 35 Kwayele ŵammuleje che Ogu, achiŵanagwe ni ŵandu ŵakwe wose, panganneka namose mundu jumo, nipele ŵachijigele chilambo chakwe.