1 Ambuje Akunnungu ŵasalile che Musa, 2 "Mwalamule Ŵaisilaeli ŵatyosye paasa pa chigono kila mundu jwaali ni matana, ni jwakukopoka uwou ni jwangakukundikwa pakwapopelela Akunnungu ligongo agakwaiye malilo. 3 Timwatyose paasa pa chigono ŵandu wose ŵa, achalume ni achakongwe, kuti akaika kupatenda pakakundikwa paujo pangu pachigono pao pati une gutama pasikati jao." 4 Ŵaisilaeli ŵatesile yele, ŵaatopwele paasa pa chigono. Ŵatesile mpela Ambuje Akunnungu iŵalajichisye che Musa.

5 Nipele Ambuje Akunnungu ŵaasalile che Musa, 6 "Mwasalile Ŵaisilaeli kuti, mundu jwalijose jwannume pane jwankongwe anneŵelaga njakwe kwa litala lyalili lyose, ni kuŵa jwangakulupilichika kwa Ambuje Akunnungu, mundu jo aneŵele une. 7 Mundu jo akusachilwa kwitichisya sambi jatesile, akusachilwa alipile lileŵa lyakwe, ni sooni aŵiche lipwati lya liunjili limo mwa maunjili nsano pa malipilo go, ni kumpa mundu jwanneŵele. 8 Nambo iŵaga mundu jo awile ni nganakola alongo ŵachiŵandi, jwati akukombola kupochela malipilo go, nipele, malipilo ga kuleŵa ko tigaŵe gakwe Ambuje Akunnungu. Tachipegwa jwambopesi, pamo ni ngondolo tonde jitatumiche kwa kutendela ujilanyo kwa ligongo lyakwe. 9 Chachilichose chachikutyosekwa ni Ŵaisilaeli kwa Ambuje Akunnungu tichiŵe cha jwambopesi. 10 Kila chindu chachityosyekwe kwa Akunnungu ni kuchijausya kwa jwambopesi chichiŵe chakwe jwambopesi jo."

11 Ambuje Akunnungu ŵaasalile che Musa, 12 ŵaasalile Ŵaisilaeli: Naga jwankongwe jwa mundu atesile yangalumbana ni kuleka kulupilichika kwa ŵankwakwe 13 kwa kugona ni jwannume jwine kwa chisyepela pangaimanyilila ŵankwakwe pane mundu jwine jwalijose; alitesile jwangakundikwa kwa mapopelo nachiŵamuno nganapagwa jwammweni patesile yeleyo namose kwakamula ugoni. 14 Nipele, jwannume jo akolaga wiu ni kunsimonga ŵankwakwe, nombejo asakaga kwimanyilila iŵaga ŵankwakwe jo atesile yeleyo pane ngaŵa, 15 nipele ŵana wose ŵaŵili wo tajaule kwa jwambopesi ni kupeleka mbopesi jajikusachilwa, yaani liunjili lya kumi lya shayili, nambo pangataga mauta ni ubani, pakuŵa jili mbopesi ja utandi ja jwannume jwaakunsimonga ŵankwakwe, mbopesi jo jikutyochekwa kulosya kuti jwankongwe jo atesile chileŵo pane ngaŵa.

16 Jwambopesi tachinnyichisya jwankongwe jo, ni kunjimika paujo pa chilisa. 17 Nipele tajitile mesi gamaswela mu choombo cha lilongo ni kujigala luundu kutyochela paasi papasilinje mu lisakasa lyeswela ni kulutaga mmesi go. 18 Pakumala jwambopesi kunjimika jwankongwe jo paujo pa chilisa ni kummunukula umbo ni kwapa mbopesi ja magowolo mmakono mwakwe jajikutyochekwa kwa ligongo lya wiiu wa jwannume. Jwambopesi nsyene takamulile achila choombo chachili ni meesi gagakuŵaŵa gagakuichisya malweso. 19 Sooni jwambopesi tanlumbisye jwankongwe jo achitiji, "Iŵaga nganapagwa jwannume jwine jwagonile ni mmwe, akuno nli nlombekwe nipele aga meesi gagakuŵaŵa gagakuichisya malweso gakammenga mmwe. 20 Nambo iŵaga ngonile ni jwannume jwine akuno nli nlombekwe ni kulinyakasya kwa kugona ni jwannume jwine jwangaŵa ŵankwenu, 21 nipele Ambuje Akunnungu anjamuche nlweseche, ŵandu ŵenu anlwesye ni kunkana, nkaŵeleka ni lutumbo lwenu luyimbe. 22 Meesi gagakuichisya malweso gajinjile nnutumbo mwenu ni kuntenda nkaŵeleka ni lutumbo lwenu lunyale."

Jwankongwe tajanje, "Elo, Elo."

23 Nipele jwambopesi tagalembe malwesyo gose mu chitabu chekolochekwe ni lipende ni kochesya mmeesi gagakuŵaŵa gala. 24 Jwambopesi taching'wesya jwankongwe meesi gagakuichisya malweso nombego tigajinjile mu lutumbo ni kuntesya gampoteche nnope, 25 nipele jwambopesi tajigale ajila mbopesi ja utandi kwa ligongo lya wiu kutyochela kwa jwankongwe jo ni kujinyakula paujo pa Ambuje Akunnungu ni kujipeleka pa chilisa. 26 Nipele, tasapule mwigasa mbopesi ja utandi kwa chikumbuchisyo ni kujitinisya pa chilisa. Kumbesi tang'wesye jwankongwe jo meesi go. 27 Naga alinyakesye kwa ungakulupilika wakwe kwa ŵankwakwe, meesi go gagakuichisya malweso tigampeteche kwannope, lutumbo lwakwe lwa uŵelesi tulualibiche ni ngaakombola kuŵeleka. Ni ŵandu wose taimanyilile kuti jwankongwe jo alweseche. 28 Nambo iŵaga jwankongwe jo ali jwakulupulichika ni nganakola chilewo, nipele ngagaaŵenga ni takombole kuŵeleka ŵanache.

29 Nipele, gelega gali malajisyo gankati ligambo lya wiu iŵaga jwankongwe alombekwe, paakutyoka ni kugona ni jwannume jwine, 30 pane jwannume akolaga wiu ligongo lya ŵankwakwe. Tanjimiche jwankongwe jo paujo pa chilisa, ni jwambopesi tatumie lilamulo li kwa jwankongwe jo. 31 Jwannume ngaakola ni chilewo chilichose, nambo jwankongwe talamulikwe kwa chilewo chakwe.