1 Ulwele ula pawamasile, Ambuje Akunnungu ŵaasalile che Musa ni che Eleasali mwanache jwa che Haluni jwambopesi kuti, 2 "Mwaŵalanje mpingo wose wa Ŵaisilaeli, jwalijose malinga ni ŵapaulongo wao. Mwaŵalanje ŵandu wose kutandilila ŵandu ŵakwete yaka ishilini ni kwendelechela, ŵakuŵajilwa kwaula ku ngondo." 3 Kwayele che Musa ni che Eleasali jwambopesi ŵakungulwiche ni ŵandu ku chilambo chachili ku iŵata ya ku Moabu peesi lusulo lwa Yolodani, chiŵandika ni ku Yeliko, ŵaasalile, 4 "Mwaŵalanje achalume ŵakwete yaka ishilini ni kwendelechela, mpela Ambuje Akunnungu iŵatite kunnajisya che Musa." Ŵaisilaeli ŵaŵatyosile ku Misili ali aŵa: 5 Lwaandanda luli lukosyo lwa Lobeni, jwakwitiwo jwa che Yakubu. Ŵandu ŵa akutyochela mmitundu ja Henoki ni Palu, 6 ni Hesiloni ni Kalimi. 7 Ŵandu ŵaŵaŵalanjikwe kutyochela mu lukosyo lwa Lobeni ŵaliji ŵandu elufu alobaini na tatu na mia saba na selasini. 8 Uŵelesi wa che Palu ŵaliji che Eliabu, 9 ni ŵanache ŵakwe che Nemueli, ni che Dasani ni che Abilamu. Ŵeleŵa ŵaŵili: Che Dasani ni che Abilamu, ni ŵaŵaliji asagulikwe kuŵa ilongola pasikati ja Ŵaisilaeli wose, nambo ŵankanile che Musa ni che Haluni, ni ŵaliunjile ni ŵandu ŵaŵankuyaga che Kola katema paŵankanile Ambuje Akunnungu. 10 Katema ko lisi lyajaseme mpela kang'wa ni kwamila, ŵawile pamo ni che Kola ni ŵaŵankuyaga, mooto pawauleje ŵandu mia mbili na hamsini; ni yaliji majamuko kwa ŵandu wose. 11 Pamo ni yeleyo ŵelewo ŵanache ŵa che Kola nganawa.

12 Lukosyo lwa Simeoni kwaliji ni ntundu wa Nemueli, ni ntundu wa Yamini, ni ntundu wa Yakini, 13 ni ntundu wa Sela ni ntundu wa Shauli. 14 Jelejo jaliji mitundu ja lukosyo lwa Simeoni, ŵaliji ŵandu elufu ishilini na mbili na mia mbili.

15 Lukosyo lwa Gadi mitundu jakwe jaliji Sefoni ni Hagi ni Shuni 16 Osini ni Eli, 17 ni Alodi ni Aleli. 18 Ŵandu ŵaŵaŵalanjikwe kutyochela mu lukosyo lwa Gadi uŵaliji ni ukombole wa kwaula ku ngondo, ŵaliji achalume elufu alobaini na mia tano.

19 Lukosyo lwa Yuda lwakwete ŵanache ŵa che Yuda, che Eli ni che Onani. Ŵanache ŵaŵili ŵa ŵawilile ku chilambo cha ku Kanaani. 20 Lukosyo lwa Yuda lwaliji ni mitundu ja Pelesi, ni Sela. 21 Kutyochela kwa che Pelesi kwapali mitundu jine jiŵili yaani Hesiloni ni Hamuli. 22 Jeleji jaliji mitundu ja lukosyo lwa Yuda, ŵandu ŵaŵaŵalanjikwe uŵaliji ni ukombole wa kwaula ku ngondo ŵaliji achalume elufu sabini na sita na mia tano.

23 Lukosyo lwa Isakali mitundu jakwe jaliji Tola, ni Pua, 24 ni Yashubu ni Shimiloni. 25 Jeleji jaliji mitundu ja lukosyo lwa Isakali, ŵandu ŵaŵaŵalanjikwe uŵaliji ni ukombole wa kwaula ku ngondo ŵaliji achalume elufu sitini na nne na mia tatu.

26 Lukosyo lwa Sabuloni mitundu jakwe jaliji, Seledi, ni Eloni ni Yaleeli. 27 Ŵandu ŵaŵaŵalanjikwe kutyochela mu lukosyo lwa Sabuloni, uŵaliji ni ukombole wakwaula ku ngondo ŵaliji achalume elufu sitini na mia tano.

28 Che Yusufu ŵakwete ŵanache ŵaŵili, che Manase ni che Efulaimu. Ni kutyochela kukwawo ngosyo siŵili syakopochele, yaani lukosyo lwa Manase ni lukosyo lwa Efulaimu.

29 Lukosyo lwa Manase lwaliji ni mitundu ja Makili juŵaliji atati ŵa che Gileadi. 30 Ni Yeseli ni Heleki, 31 ni Asilieli ni Shekemu, 32 ni Shemeida ni Hefeli. 33 Che Selofehadi mwanache jwa che Hefeli nganapata ŵanache ŵachilume nambo ŵachikongwe pe, nombewo ali che Mala ni che Noa ni che Holiga, ni che Milika ni che Tilisa. 34 Jelejo ni mitundu ja lukosyo lwa Manase, ŵandu ŵaŵaŵalanjikwe uŵaliji ni ukombole wakwaula ku ngondo ŵaliji achalume elufu hansini na mbili na mia saba.

35 Lukosyo lwa Efulaimu lwaliji ni mitundu ja Shutela ni Bekeli ni Tahani. 36 Iyoyopeyo kutyochela ni ntundu wa Shutela kwakopochele ntundu wa Elani. 37 Jelejo jose jaliji mitundu ja Efulaimu, ŵandu ŵaŵaŵalanjikwe uŵaliji ni ukombole wakwaula ku ngondo ŵaliji achalume elufu selasini na mbili na mia tano.

Mitundu josejo jo jakopochele ni ngosyo sya Manase ni Efulaimu ŵaŵaliji ŵanache ŵa che Yusufu.

38 Lukosyo lwa Benjamini lwaliji ni mintundu ja Bela ni Ashibeli ni Ahilamu, 39 ni Shufamu ni Hufamu. 40 Iyoyo kwaliji ni mitundu ja Alidi ni Naamani jijakopochele ni ntundu wa Bela. 41 Jelejo ni mitundu ja lukosyo lwa Benjamini, ŵandu ŵaŵaŵalanjikwe uŵaliji ni ukombole wakwaula ku ngondo ŵaliji achalume elufu alobaini na tano na mia sita.

42 Lukosyo lwa Dani lwaliji ni ntundu wa Shuhamu; 43 ŵandu ŵaŵaŵalanjikwe kutyochela mu lukosyo lu, uŵaliji ni ukombole wakwaula ku ngondo ŵaliji achalume elufu sitini na nne na mia nne.

44 Lukosyo lwa Asheli lwaliji ni mitundu ja Imina, ni Ishivi ni Belia. 45 Iyoyo peyo kutyochela ku ntundu wa Belia kwaliji ni mitundu ja Hebeli ni Malikieli. 46 Asheli ŵakwete mwali jwaŵilanjikwe che Sela. 47 Jeleji jose jaliji mitundu ja lukosyo lwa Asheli, ŵandu ŵaŵaŵalanjikwe uŵaliji ni ukombole wakwaula ku ngondo ŵaliji achalume elufu hansini na tatu na mia nne.

48 Lukosyo la Nafutali lwaliji ni mitundu ja Yaseeli, ni Guni 49 ni Yeseli ni Shilemu. 50 Jeleji jose ni mitundu ja lukosyo lwa Nafutali, achalume ŵaŵaŵalanjikwe uŵaliji ni ukombole wakwaula ku ngondo ŵaliji elufu alobaini na tano na mia nne.

51 Achalume wose ŵa Ŵaisilaeli ŵaŵaŵalanjikwe uŵaliji ni ukombole wa kwaula kungondo ŵaliji laki sita na elufu moja na mia saba ni selasini.

52 Nipele Ambuje Akunnungu ŵasalile che Musa kuti, 53 "Mwagaŵile chilambo chiŵe chao ŵandu ŵa ngosyo si, malinga ni mwaŵelele winji wao. 54 Lukosyo lwaluli ni ŵandu ŵajinji tilupegwe malo jekulungwa ni lukosyo lwaluli ni ŵandu kanondi tilupegwe malo jenandi. Lukosyo lulilose tilupegwe malo jiŵe jao malinga ni winji wa ŵandu ŵakwe. 55 Namose yeleyo tinchigaŵanye chilambo kwa gudugudu. Lukosyo lulilose tilupegwe malo jawo malinga ni meena ga achachekulu ŵawo. 56 Malo jao kila lukosyo tilugaŵikwe kwa gudugudu, kila lukosyo tilupate malinga ni winji wa ŵandu pane unandi wa ŵandu wakwe."

57 Mu lukosyo lwa Ŵalawi kwaliji ni mitundu ji jajilembekwe: Gelishoni, ni Kohati ni Melali, 58 Iyoyo peyo kwaliji ni mitundu jajakopochele ni iŵelesi yao, jele mitundu jo ni lukosyo lwa Libini ni Hebuloni ni Mahaili, ni Mushi ni Kola. Ni che Kohati ŵaliji atatigwe che Amulamu. 59 Ŵankwakwe che Amulamu ŵaŵilajikwe che Yokebedi mwali ju che Lawi juŵaŵelekwe ku Misili. Jweleju ŵammelechele che Amulamu ŵanache ŵaŵili achalume, che Haluni ni che Musa, ni mwali jumo, che Miliamu. 60 Che Haluni ŵakwete ŵanache achalume ncheche: Che Nadabu ni che Abihu, ni che Eleasali ni che Itamali. 61 Nambo che Nadabu ni che Abihu ŵawile paŵantyochesye mbopesi kwa mooto wangaukukundikwa ni Ambuje Akunnungu. 62 Ŵalawi ŵachilume uŵaliji ni mwesi umo ni kwendelechela ŵaliji elufu ishilini na tatu. Ŵeleŵa nganaŵalanjikwa pamo ni Ŵaisilaeli ŵane ligongo welewo nganapegwa malo jilijose jakuti jiŵe jao mu Isilaeli.

63 Ŵelewo ni achalume Ŵaisilaeli ŵaŵaŵalanjikwe ni che Musa ni jwambopesi che Eleasali mu chilambo cha mwiŵata ya ku Moabu, peesi lusulo lwa Yolodani chiŵandika ni ku Yeliko. 64 Pasikati jawo nganapagwa namose mundu juŵasigalile jwanjumi mwa aŵala ŵaŵaŵalanjikwe ni che Musa ni che Haluni pakuŵalanga kwaandanda kuŵakutesile mu chipululu cha Sinai. 65 Ambuje Akunnungu ŵasasile kuti ŵanawose tachiwilila mu chipululu, ni kusyene nganapagwa namose jumo jwawo juŵasigalile jwanjumi, ikaŵe che Kalebu mwanache ju che Yefune ni che Yoshua mwanache ju che Nuni ni ŵaŵasigalile.