1 Kanyuma che Kola mwana jwa che Ishali, juŵaliji mwanache jwa che Kohati, jwa lukosyo lwa Lawi, ŵaajigele ŵandu ŵampepe pamo ni ŵandu ŵatatu ŵa lukosyo lwa Lobeni, yaani che Datani ni che Abilamu ŵana ŵa che Eliabu ni che Oni mwana jwa che Peleti, 2 ilongola ŵaakumanyika mia mbili hansini ŵaŵasagulikwe ni ŵandu wose ŵakamulangene ni ŵandu wo, ni kukana kwajitichisya che Musa. 3 Ŵasongangene mpingo wose kwakanila che Musa ni che Haluni, ŵaasalile, "Ŵanyamwe nkulikwesya nnope! Ŵandu wose ali ŵandu ŵa Akunnungu ni Ambuje Akunnungu ali pamo ni uwe wose. Ana kwa chichi nkulikwesyakwesya mwachimisyene pasikati ja ŵandu wose ŵa Ambuje Akunnungu?"

4 Che Musa paŵapikene yeleyo ŵatindiŵele ni kukotama mpaka paasi ni kupopela. 5 Pelepo ŵaasalile che Kola ni ŵakunkuya che Kola, "Malaŵi kundaŵi, Ambuje Akunnungu chatulosye mundu jutansagule aŵe jwambopesi ni jwele mundu jo ni jutachintumichila. 6 Nipele, ntende nyi, kundaŵi, mmwe pamo ni ŵaakunkuya njigale iteso, 7 mmiche makala ga mooto ni kutaga ubani pachanya pakwe, nipele tinyijausye paujo pa Ambuje Akunnungu. Mundu jwati asagulikwe ni Ambuje Akunnungu, jwele ni jutaŵe jwambopesi jwakwe. Ŵanyamwe Ŵalawi nlikwesisye kwannope!"

8 Che Musa ŵajendelechele kwasalila che Kola, "Mpilikane ŵanyamwe Ŵalawi! 9 Ana nkuchiwona chindu chamwana kukwenu kuti Akunnungu jwa Ŵaisilaeli ansagwile ŵanyamwe pasikati ja ŵandu wose ŵa Ŵaisilaeli, kuti nkombole kwaŵandichila ni kupanganya masengo mu Lisakasa lya Kusimanilana kwaligongo lya Ambuje Akunnungu, ni kwatumichila ŵandu wose? 10 Ampele luchimbichimbi mmwe ni achalongo achinjenu Ŵalawi lwa kwatumichila, nambo sambano nkusakanga mme ŵambopesi nombe? 11 Mmwe ni achinjenu wose nsongangene kwakana Ambuje Akunnungu. Ŵanyamwe nkunlalatila che Haluni, nambo usyene ni kuti nkwalalatila Ambuje Akunnungu."

12 Che Musa ŵatumile utenga wa kwaŵilanga che Datani ni che Abilamu ŵanache ŵa che Eliabu. Nambo ŵanyawo ŵatite, "Uweji ngatukwika. 13 Ana chili chindu chamwana mmwe kututyosya ku Misili, chilambo chambone kwa kulima ni kulanga, kuti ntuulaje mwipilulu? Sooni, nkulitenda jwankulu jwetu! 14 Kupunda yele, nganintuichisya ku chilambo chambone kwa kulima ni kulanga, namose kutugaŵila lisi ni migunda ja misabibu jiŵe jetu. Nkuganisya timwatende ŵandu ŵa ŵangalola? Ngwamba, uweji ngatukwika!"

15 Che Musa ŵatumbile kwannope, ŵaasalile Ambuje Akunnungu, "Nkasikunda mbopesi sya ŵandu wa. Uneji nganinyigala mbunda ja mundu jwalijose namose kunleŵela jwalijose pasikati jao!"

16 Che Musa ŵaasalile che Kola, "Malaŵi mmwe ni achinjenu wose njisangane paujo pa chilisa. Ni che Haluni tachiŵa pelepo. 17 Kila mundu tajigale chiteso chakwe ni kutaga ubani, nipele tachijausye paujo pa Ambuje Akunnungu. Chiiŵe iteso mia mbili hansini. Mmwe ni che Haluni tinchiika ni iteso yenu."

18 Nipele, kila mundu ŵajigele chiteso chakwe ni kutaga mooto ni ubani, ŵapite kwima pannango wa Lisakasa lya Kusimanilana kwaligongo lya Akunnungu, pamo ni che Musa ni che Haluni. 19 Nombe che Kola ŵaasonganyisye ŵandu ŵakwe wose pamo, ŵajimi paujo pa che Musa ni che Haluni ŵaŵaliji pa nnango wa Lisakasa lya Kusimanilana. Pelepo kung'alima kwa Ambuje Akunnungu kwaakopochele ŵandu wose! 20 Pelepo Ambuje Akunnungu ŵaasalile che Musa ni che Haluni, 21 "Nlisapule kutyochela mu nsongangano wo kuti naajonanje ŵanyawo pangakaŵa."

22 Nambo che Musa ni che Haluni ŵatindiŵele ni kukotama mpaka paasi achitiji, "Alakwe Ambuje Akunnungu ŵandi ndande ja umi wa ŵandu wose. Uli naga mundu jumo anneŵele chimwatumbilile ŵandu wose?" 23 Ambuje Akunnungu ŵansalile che Musa, 24 "Mwaasalile ŵandu wose atyokangane pelepo chiŵandi ni masakasa ga che Kola ni che Datani ni che Abilamu."

25 Nipele, che Musa ŵapite ku che Datani ni che Abilamu akuno ali alongene ni ilongola ŵa Ŵaisilaeli. 26 Paŵaiche ŵaasalile ŵandu, "Choonde ntyokangane pa masakasa ga ŵandu ŵachigongomalo ŵa, nkakwaya chindu chili chose cha ŵanyawo nkaika konasikwa pamo nao kwa ligongo lya sambi syao syose." 27 Ŵandu ŵatyosile chiŵandi ni masakasa ga che Kola ni che Datani ni che Abilamu.

Che Datani ni che Abilamu ŵatyosile mmasakasa gawo ni kwima pannango ali alongene ni achiŵankwawo ni ŵanache ŵao wose achakulungwa ni aŵala ŵakonga. 28 Pele che Musa ŵaasalile ŵandu, "Yele ni ichimmanyilile kuti Ambuje Akunnungu andumile kuitendekanya yanayose ni ngaŵa kwa usache wangu nansyene. 29 Naga ŵandu ŵa tawe mpela ŵandu ŵane yakuti kuwa pane kusimanikwa ni yangalumbana yaisyoŵelechekwe mpela yaikwasimana ŵandu ŵane, pelepo mmanyilile kuti Ambuje Akunnungu ngananduma une. 30 Nambo Ambuje Akunnungu atendaga chindu changanichitendekwe, lisi lyaunukaga ni kwamila ŵandu ŵa pamo ni indu yao yose, atitimilaga ali ŵajumi ni kwaula kwiuto kwa ŵandu ŵawile, pelepo ni patimmanyilile kuti ŵandu ŵa ŵakanile Ambuje Akunnungu."

31 Namalisya pe kuŵecheta maloŵe gose go, lisi lyajaseme mpela kang'wa paŵajimi che Datani ni che Abilamu; 32 lyamisile ŵandu wo ni ulongo wao pamo ni ŵandu wose ŵa che Kola ni ipanje yao yose. 33 Nipele, ŵatuluchile ku chilambo cha ŵandu ŵawe ali ŵajumi pamo ni indu yao yose, lisi lyaabudiche, ni ŵawile wose. 34 Ŵaisilaeli wose ŵane ŵaŵaliji chiŵandi paŵapikene ililo yao ŵautwiche achinyanyisyaga, "Twende tuutuche, ngakaŵa lisi kutumila nowe wakwe."

35 Papopo Ambuje Akunnungu ŵapeleche mooto wajonasile aŵala ŵandu mia mbili na hansini ŵaŵapite kututumisya ubani.

36 Pakumala yeleyo, Ambuje Akunnungu ŵansalile che Musa, 37 "Mwasalile che Eleasali mwana jwa jwambopesi che Haluni aityosye iteso yo pa masigale ga mooto, akaumwasyanye mooto wauli mu iteso pakuŵa iteso yo ili yeswela. 38 Iteso ya ŵandu ŵatesile sambi sisyatesile aulajikwe, nkaisyane iŵe yakunyilila kuti mmatichile pa chilisa, pakuŵa ŵaiichisye paujo pa chilisa ni iŵele yeswela. Nombeyo iŵe chimanyisyo kwa Ŵaisilaeli." 39 Nipele, jwambopesi che Eleasali ŵajigele iteso ya shaba yo yati ŵandu ŵaŵajonasikwe ŵaiche nayo paujo pa Ambuje Akunnungu, yasyanikwe kumatichila pa chilisa, 40 mpela Ambuje Akunnungu muŵasalile kwa litala li che Musa. Lyele lyaliji lijamuko kwa Ŵaisilaeli yakuti mundu jwalijose jwangaŵa jwambopesi, yaani jwanganaŵa jwa ntundu wa che Haluni akajaula ku chilisa kututumisya ubani paujo pa Ambuje Akunnungu, ngakaŵa tajonasikwe nti che Kola ni ŵandu wakwe.

41 Kundaŵi kwakwe, Ŵaisilaeli wose ŵandandaulile che Musa ni che Haluni ŵatite, "Mwauleje ŵandu ŵa Ambuje Akunnungu." 42 Paŵasongangene paujo pa che Musa ni che Haluni kuti ŵaakanile, ŵagalauchile kulilola Lisakasa lya Kusimanilana ni ŵaliweni liunde liunichile pa Lisakasa ni kungalima kwa Ambuje Akunnungu watyochele pelepo. 43 Che Musa ni che Haluni ŵapite kwima mbujo mwa Lisakasa lya Kusimanilana kwaligongo lya Akunnungu. 44 Ni Ambuje Akunnungu ŵansalile che Musa, 45 "Nlisapule ntyoche pa ŵandu ŵasongangene kuti naajonanje papopo!"

Nambo ŵanyawo ŵatindiŵele ni kukotama mpaka paasi. 46 Che Musa ŵansalile che Haluni, "Njigale chiteso chenu, ntaje makala ga mooto kutyochela pa chilisa, ntaje ubani ni kwaula nacho kwa chitema kwa ŵandu kuti ntende ujilanyo kwa ligongo lyao. Ntende chitema! Uchimwa wa Ambuje Akunnungu waichilile ni ulwele wakogoya utandite." 47 Nipele che Haluni ŵatesile mpela muŵasalilwe ni che Musa. Ŵajigele chiteso chakwe ni kuutuchila mpaka pasikati ja ŵandu ŵaŵasongangene. Paŵauweni ulwele wakogoya utandite ŵatasile ubani mu chiteso ni kwatendela ŵandu ujilanyo. 48 Paŵatesile yeleyo, ulwele wakogoya ula walesile, nombe che Haluni ŵasigalile pasikati ja aŵala ŵaŵawile ni ŵaŵaliji ŵajumi. 49 Ŵandu ŵaŵawile kwa ulwele wakogoya ula ŵaliji elufu kumi na nne na mia saba pangaŵalanjila aŵala ŵaŵawile pamo ni che Kola ni achijakwe. 50 Ulwele wakogoya pawalesile che Haluni ŵausile ku che Musa pannango wa Lisakasa lya Kusimanilana kwaligongo lya Akunnungu.