1 Ŵaisilaeli wose ŵagumisile kwannope ni kulila chilo chose. 2 Ŵalalatile che Musa ni che Haluni ŵachitiji, "Mbaya tukawilile ku Misili pane kuwilila papapa pa chipululu pa! 3 Kwachichi Ambuje Akunnungu akutujausya ku chilambo cho? Chituulajikwe ku ngondo, achiŵankwentu ni ŵanache ŵetu tajigalikwe mateka! Ngati mbaya tukausile ku Misili?" 4 Nipele ŵatandite kusalilana, "Ayaga, tunsagule chilongola, tuuje ku Misili."

5 Pelepo, che Musa ni che Haluni ŵatindiŵele ni kukotama paujo pa Ŵaisilaeli wose. 6 Che Yoshua mwana ju che Nuni ni che Kalebu mwana ju che Yefune ŵaŵaliji mu mpingo wa aŵala ŵandu ŵaŵajawile kukuchiuchilisya chilambo chila, ŵapapwile yakuwala yao, 7 ni kwasalila Ŵaisilaeli wose, "Chilambo chitwapite kukuchiuchilichisya chili chambone nnope. 8 Naga Ambuje Akunnungu anonyelwe nowe chatujausye kweleko ni kutupa achila chilambo chambone chachikufai kulanga ni kulima. 9 Nambo nkankana Ambuje Akunnungu namose nkaajogopa achinsyene chilambo cho. Pakuŵa tutwapunde. Minungu jawo jiŵaalindililaga jaalesile, nombe Ambuje Akunnungu ali pamo ni uwe, ngasimwajogopa!" 10 Nambo ŵandu wose ŵalamwile kwaponya maganga. Chisisimuchile lilanguka lya lumbili lwa Ambuje Akunnungu lwatyochele pachanya pa Lisakasa lya Kusimanilana, paujo pa Ŵaisilaeli wose.

11 Nipele Ambuje Akunnungu ŵansalile che Musa, "Ŵandu ŵa tachiinyelusya une mpaka chakachi? Tajendelechele kukana kuungulupilila mpaka chakachi namuno ndesile imanyisyo yakusimonjeka pasikati jao? 12 Tinaapute kwa ilwele yakogoya ni kwajonanga tikitiki, nambo mmwe tinantende mme atati jwa chilambo cha ŵandu ŵajinji ni ŵaali ni machili kwapunda ŵanyawo."

13 Nambo che Musa ŵaasalile Ambuje Akunnungu, "Mwatyosisye ŵandu ŵa ku chilambo cha Misili kwa machili genu. Ŵamisili pataipikene kuti mwatendele yeleyo ŵandu ŵenu, 14 tachasalila ngani ji ŵandu ŵa chilambo chi. Pakuŵa ŵandu ŵa amasile kupikana ngani jenu mmwe alakwe Ambuje Akunnungu, ni kuti ndi pamo ni uwe ni nkwoneka pangasisika liunde lyenu palikwima pachanya petu, ni yakuti mmwe nkutulongosya muusi kwa lusichi lwa liunde ni chilo kwa lusichi lwa mooto. 15 Sambano, mwaulagaga ŵandu ŵenu wose kwanakamo, ŵandu ŵa ilambo yaimasile kupikana kulapikwa kwenu tajile, 16 ‘Ambuje Akunnungu ŵauleje ŵandu ŵakwe mu chipululu ligongo ŵalepele kwajausya ku chilambo chiŵaalanjile kwapa.’ 17 Nipele, sambano ngunchondelela alakwe Ambuje Akunnungu, ntulosye ukombole wenu kwa kutenda mpela imwatulanjile pamwatite, 18 ‘Une Ambuje Akunnungu ngangutumbila chitema, ndili jwa unonyelo wejinji ni jwakulechelela sambi ni ilewo. Nambo kwailiyose ila nganeka kwajamuka ŵanache ni isukulu mpaka chipago chaatatu ni chancheche, ligongo lya sambi sya achaŵelesi ŵao.’ 19 Ngunchondelela mwalechelele ŵandu ŵa sambi syao, malinga ni unonyelo wenu wejinji, mpela ila imwalechelele kutandilila paŵatyosile ku Misili mpaka sambano."

20 Ambuje Akunnungu ŵajanjile, "Nalechelele mpela intite kupopela. 21 Nambo kusyene mpela inguti kwendelechela kutama ni mpela ila chilambo ichikuti kugumbaswa ni ukulu wangu, 22 ngapagwa namose jumo jwa ŵandu ŵa jutasigalile ni kwinjila ku chilambo cho. Ŵandu ŵa aweni lilanguka lya lumbili lwangu ni yakusimosya inaitesile akula ku Misili ni ku chipululu, nambo ajendelechele kuuninga ni kukana kuunyitichisya, 23 ngaajinjila mu chilambo chinalumbile kwapa achambuje ŵao, iyoyopeyo ni aŵala ŵaakunyelusya nombe ngaajinjila. 24 Nambo jwakutumichila jwangu che Kalebu anyitichisye mwakukulupichika, tinaajinjisye mu chilambo chajinjile ni iwelesi yakwe tachitende chao chilambo cho. 25 Pakuŵa Ŵaamaleki ni Ŵakanaani akutama ku lichemba lya chilambo cho, malaŵi ngalauchanje panyuma njaule ku chipululu kwa litala lya bahali ja Shamu."

26 Nipele Ambuje Akunnungu ŵausisye che Musa ni che Haluni, 27 "Mpingo ŵa ŵandu ŵangalumbana wu tiujendelechele kulalatila une mpaka chakachi? Mbesile kupilikanila malalatilo ga Ŵaisilaeli! 28 Sambano mwasalile, ‘Ngulumbilila mpela inguti kutama une Ambuje Akunnungu, tinaatendele indu ilaila inaipikene ali nkuŵecheta. 29 Timmwe ni ilu yenu tiijasikwe munomuno mu chipulupu, ligongo nlalete nkati une. Ngapagwa namose jumo jwenu jwali ni lisusa lya kutandilila yaka ishilini ni kupunda, 30 jutajinjile mu chilambo chinalumbile kumpa chiŵe chenu, ikaŵe che Kalebu mwana jwa che Yefune ni che Yoshua mwana jwa che Nuni ni ŵatajinjile mu chilambo mo. 31 Ŵanyamwe mwatite kuti achiŵana ŵenu tajigalikwe mateka, nambo une tinajinjisye ŵanache ŵenu ku chilambo chimwachikanile, kuti chiŵe chilambo chao. 32 Ŵanyamwe chimmwilile mu chipululu pemu. 33 Ŵanache ŵenu tasyungulesyungule ni kulaga mu chipululu mu kwa yaka alobaini, ligongo lya ungakulupilila wenu, mpaka mundu jwambesi patachiwilila mu chipululu. 34 Malinga ni ileŵo yenu tinlaje kwa yaka alobaini, yalumo ni agala moŵa alobaini gamwachiuchilichisye chilambo chila. Chaka chimo kwa kila lyuŵa limo, tinchimanyilila kuti muunjimisye. 35 Une Ambuje Akunnungu ndite, Isyene tinantende yele ŵanyamwe wose unsongangene apano kunganila. Wose tamalile munomuno mu chipululu ni munomuno tachiwilila.’"

36 Aŵala ŵandu ŵati che Musa ŵatumile kwaula kukuchiuchilichisya chilambo chila uŵausile ni kutendekasya ŵandu ŵalalatile Ambuje Akunnungu, kwa kwaichisya ngani jangalumbana nkati chilambo cho, 37 ŵandu ŵaŵatyosisye ngani jangalumbana nkati chilambo cho, ŵawile kwa ulwele wakogoya uwaichisye Ambuje Akunnungu. 38 Nambo che Yoshua mwana jwa Nuni ni che Kalebu mwana jwa Yefune, ŵasigalile ŵajumi pasikati ja aŵala ŵandu ŵaŵapite kukuuchilisya chilambo cho.

39 Che Musa paŵasasile kwasalila Ŵaisilaeli aila yasalilwe ni Ambuje Akunnungu, Ŵaisilaeli ŵalisile kwa ligogo lyekulungwa. 40 Malaŵi jakwe, ŵajimwiche kundaŵipe ŵapite ku matumbi, ni ŵatite, "Sambano tuli chile kwaula pamalo patulanjile Ambuje Akunnungu. Tukuitichisya kuti tutesile sambi."

41 Nambo che Musa ŵatite, "Sambano kwachichi nkukasa lilajisyo lya Ambuje Akunnungu? Chele chindu chi nganchikombola! 42 Nkajaula. Ambuje Akunnungu nganaŵa pamo ni ŵanyamwe, ni ŵammagongo ŵenu champute. 43 Mwaputanaga ni Ŵaamaleki ni Ŵakanaani, timmwilile pangondo, pakuŵa nnesile kwakuya Ambuje Akunnungu, ŵelewo ngaŵa pamo ni ŵanyamwe."

44 Nambo ŵanyawo ŵakanganichile kwaula ku matumbi namose che Musa nganatyoka pachigono ni Lisanduku lya Lilangano nombe nganalijigala. 45 Pelepo Ŵaamaleki ni Ŵakanaani ŵaŵatamaga mu chilambo cha matumbi cho, ŵatulwiche ŵaagungumuchile ni kwapunda. Ŵaatopwele mpaka ku musi wa Holima.