1 Ambuje Akunnungu ŵasalile che Musa kuti, 2 wape Ŵaisilaeli lilajisyo li ni kwasalila kuti akusachilwa ambelechele une pa katema kakwe kakaŵichikwe chakulya kwaligongo lya mbopesi syakutinisya ni mooto, jiŵe ununjile wambone waukuunonyelesya.

3 Mwasalile kuti mbopesi syasisimbelechele une pakutinisya pa mooto, tisiŵe syelesi: Ngondolo siŵili sya chaaka chimo syangalemala kose, kwaligongo lya mbopesi jakutinisya ja kila lyuŵa. 4 Ngondolo jimo tijityosekwe kundaŵi ni jaaŵili tijityosekwe ligulo; 5 jajilijose tijityosekwe pamo ni mbopesi ja utandi kilo jimo wewanganye pamo ni lita jimo ja mauta gambone ga miseituni. 6 Jeleji jili mbopesi jajikutyosekwa kila lyuŵa jajikutiniswa pa mooto, jijatyosekwe kaandanda pa chitumbi cha Sinai nti mbopesi ja yakulya, ununjile wambone waukwanonyelesya Ambuje Akunnungu. 7 Mbopesi ja yakung'wa tijityosekwe pamo ni kila ngondolo jangakomala jili lita jimo ja chakung'wa chaakalipa. Njitilileje mbopesi ja yakung'wa mu Lisakasa lya Kusimanilana. 8 Ligulo lyakwe tinjityose ngondolo jaaŵili jila kuŵa mbopesi jakutinisya pamooto mpela ilaila intesile kwa mbopesi ja kundaŵi, pamo ni mbopesi jakwe ja yakung'wa, Jelejo nombe jili mbopesi ja yakulya, ununjile wambone waukwanonyelesya Ambuje Akunnungu.

9 Pa lyuŵa lya kupumulila, tintyosye mbopesi ja ngondolo siŵili syankambaku sya chaka chimo syangalemala, ni mbopesi ja utandi wesyajiche yambone kilo siŵili, ni mbopesi jakwe ja yakung'wa. 10 Aji mbopesi ja kutinisya ji tijityosekwe kila Lyuŵa lya Kupumulila pamo ni mbopesi ja kutinisya ja kila lyuŵa ni mbopesi ja yakung'wa.

11 Kuundanda kwa kila mwesi, timumpelechele Ambuje Akunnungu mbopesi jakutinisya: Ng'ombe mikambaku jiŵili jangakomala, ngondolo jankambaku jimo ni ngondolo saba syankambaku sya chaka chimo, syangalemala. 12 Tintyosye mbopesi ja utandi wesyajiche yambone kilo sitatu, wewanganye ni mauta pa kila ngombe jimo; tintyose kilo siŵili sya utandi pa kila ngondolo jankambaku, 13 ni kilo jimo ja utandi pa kila ngondolo saba sila. Asi mbopesi sya kutinisya si, sili mbopesi sya yakulya syasikununjila yambone kwakwanonyelesya Ambuje Akunnungu. 14 Chipimo cha mbopesi sya yakung'wa chachikusachilwa chili lita siŵili sya divai pa kila ng'ombe nkambaku; lita jimo ni nusu pa kila ngondolo jankambaku, ni lita jimo pa kila ngondolo syangakomala sila. Jeleji jili mbopesi jakutinisya ja kila mwesi pa chaka chansima. 15 Pamo ni ajila mbopesi jakutinisya ja kila lyuŵa ni mbopesi jakwe ja yakung'wa, timumpelechele Ambuje Akunnungu mbopesi ja kutyosya sambi, mbusi tonde jimo.

16 Pa lyuŵa lya kumi na nne lya mwesi waandanda jili Pasaka ja Ambuje Akunnungu. 17 Pa lyuŵa lya kumi na tano lya mwesi uwowo lili lyuŵa lyekulungwa. Tinlye mikate jangata amila kwa moŵa saba. 18 Pa lyuŵa lyaandanda chinsongangane kwapopelela Ambuje Akunnungu. Pa lyuŵa lyo ngampanganya masengo. 19 Chimpeleche mbopesi jakutinisya nti mbopesi ja yakulya kwa Ambuje Akunnungu: Ng'ombe mikambaku jangakomala jiŵili, ngondolo jankambaku jimo, ngondolo syankambaku saba sya chaka chimo, ŵanawose aŵeje ŵangalemala. 20 Pa kila ng'ombe nkambaku nlinganye mbopesi ja kilo tatu ja utandi wesyajiche yambone wewanganye ni mauta ga miseituni ni kilo mbili pa ngondolo jankambaku jimo, 21 ni kilo jimo pa kila ngondolo jimo mwa asila ngondolo saba sila. 22 Chintyosye mbusi tonde jimo jiŵe mbopesi jakutyosya sambi kuti kwatendela ujilanyo. 23 Tintyosye ayi indu yi pangajiliŵalila ajila mbopesi jakutinisya ja kawaida jajikutyosyekwa pa kila lyuŵa kundaŵi. 24 Iyoyo peyo, kwa moŵa saba, tintyosye mbopesi jakutinisya ja kila lyuŵa ja yakulya kwa kujitinisya pa mooto, jati ununjile wakwe wambone tiwanonyelesye Ambuje Akunnungu. Tinjityosye mbopesi jo pangajiliŵalila ajila mbopesi jakutinisya ja kila lyuŵa ni mbopesi jakwe ja yakung'wa. 25 Pa lyuŵa lya saba tinsongangane kwapopelela Ambuje Akunnungu; nkatenda masengo.

26 Pa lyuŵa lyaandanda lya chindimba cha ijuma katema pankwapelechela Ambuje Akunnungu milimbu ja yakulya yenu, tinsongangane kwapopelela Ambuje Akunnungu; nkatenda masengo. 27 Timpeleche mbopesi jakutinisya, ununjile wakwe wambone tiwanonyelesye Ambuje Akunnungu: Ngombe mikambaku jiŵili jangakomala, ngondolo nkambaku umo, ni ngondolo syankambaku saba sya chaka chimo, wosepe aŵeje ŵangalemala. 28 Mbopesi ja utandi jachijityosekwe pamo najo tijiŵe kilo tatu sya utandi wambone wewanganye ni mauta ga miseituni pa kila ng'ombe, ni kilo siŵili pa kila ngondolo jankambaku jimo, 29 ni kilo jimo pa kila ngondolo saba sila. 30 Tintyosye mbusi tonde jimo jiŵe mbopesi jakutyosya sambi kuti kumpanganyichisya ujilanyo. 31 Timpeleche ayi indu yi pangajiliŵalila ajila mbopesi jakutinisya ja kila lyuŵa pamo ni mbopesi ja yakung'wa. Inyama yi iŵeje yangalemala kose.