1 Nipele, che Balaamu paŵaiweni kuti Ambuje Akunnungu yaanonyele kwapa upile Ŵaisilaeli, nganajaula kukutenda chisango sooni nti kuundanda, nambo ŵaliji nkulolechesya ku chipululu. 2 Ŵalolechesye mwinani ŵaaweni Ŵaisilaeli ali aŵisile chigono, lukosyo lulilose pamalo pakwe. Nipele Mbumu jwa Akunnungu ŵannyichilile, 3 nombejo ŵaŵechetaga aga maloŵe gakulondola ga:

Maloŵe gangu une che Balaamu mwanache jwa che Peoli

maloŵe ga mundu jwaunukulikwe meso,

4 maloŵe ga mundu jwapilikene maloŵe ga Akunnungu

mundu jwaiweni yakuiwona ya Akunnungu jwali ni machili,

mundu jwatindiŵele ni kukotema mpaka paasi ni kwiwona indu pangasisika.

5 Masakasa genu gakusalala kwannope ŵanyamwe ŵandu ŵa che Yakubu;

elo, igono yenu ŵanyamwe ŵandu ŵa ku Isilaeli!

6 Ili mpela machemba gagajenele,

mpela ngunda wa mwana mumbali mwa lusulo,

mpela itela ya mishubili jepande ni Ambuje Akunnungu,

mpela itela ya mielesi mumbali mwa meesi.

7 Tachikola ula jakwanila

ni kupanda mbeju syao mmigunda jajili ni meesi

Mwenye jwakwe tachiŵa jwankulu kupunda che Agagi;

umwenye wakwe tiuŵe wekulungwa kwannope.

8 Akunnungu ŵaatyosisye ku Misili,

nombewo akwamenyanila kwa machili gawo mpela njati,

tachaulaga ŵammagongo ŵao,

tachatemangulanya maupa gawo,

tachasoma ni mipamba jawo.

9 Tachijuŵilila ni kugona paasi mpela lisimba lyankambaku,

mpela lisimba lyankolo, nduni jwampaka apakombole kulijimusya?

Apegwe upile jwelejo jutachapa upile Ŵaisilaeli,

alweseche jwelejo jutachalwesya.

10 Che Balaki ŵaatumbilile che Balaamu, ŵagakwatile makono ni kwasalila, "Nammilasile mwalwesye ŵammagongo ŵangu, nambo katatu kose ka mwapele upile! 11 Sambano ntyoche kwachitema njaule kumangwenu! Uneji nansalile kuti tinampe ntuuka wambone nnope, nambo Ambuje Akunnungu anjimile ntuuka wo!"

12 Che Balaamu ŵanjanjile che Balaki kuti, "Uli, nganinaasalila aŵala ŵantenga umwaatumile kukwangu 13 kuti namuno nkaambele nyuumba jenu jegumbale madini ga feza ni sahabu, uneji ngangombola kugakanila malajisyo ga Ambuje Akunnungu, pakutenda chindu chilichose, chiŵeje chambone pane changalumbana kwakusaka kwangu nansyene? Natite, chichaŵechete Ambuje Akunnungu chelecho chisale."

14 "Sambano nguujila kwa ŵandu ŵangu, nambo nguunawe kutyoka, nninde nansalile indu ichaipanganye ŵandu ŵa, kwa ŵandu ŵenu pa moŵa gagakuika." 15 Nipele che Balaamu ŵatite:

"Une che Balaamu mwanache jwa che Beoli, ni maloŵe gangu gali isyene,

kwapele mpilikanile utenga ŵangu!

16 Lunda lwangu lukukopochela kwa Akumanani,

Ambuje Akunnungu ŵali ni machili.

Ŵelewo ngwatindiŵalila ni kwakotamila mpaka paasi

ni kwiwona yakwiwona nkati Ŵaisilaeli.

17 Ngwalola ŵachaiche, nambo kanyuma,

ngwawona, nambo ali kwakutalichila.

Ndondwa tijikopochele pa uŵelesi wa che Yakubu,

tachikopochela mwenye pasikati ja Ŵaisilaeli.

Kwa lubokola lwakwe tachaputa ilongola ŵa Ŵamoabu

tachiijonanga uŵelesi wa che Seti.

18 Isilaeli tachapunda Ŵaedomu

sooni tachapunda ni Ŵaseili ŵaali achammagongo ŵao,

Isilaeli tajendelechele kupunda kwakukulungwa.

19 Jumo mwa uŵelesi u che Yakubu tachitawala

nombejo tachajonanga wosepe ŵatasigalile mu musi wa ku Ali."

20 Nipele che Balaamu ŵaalolechesye Ŵaamaleki, ni ŵatite kuti:

"Ŵaamaleki ali chilambo chachili ni machili kuipunda ilambo yose,

nambo kumbesi tichijonanjikwe tikitiki."

21 Nipele che Balaamu ŵaalolechesye Ŵakeni, ni ŵatite kuti:

"Pamalo pankutama pali ntendele

mpela chisusi chetaŵe penani pa maganga.

22 Nambo tinjonanjikwe mwanya Ŵakeni.

Katema Ŵaashulu patachinjigala kwa machili?"

23 Sooni che Balaamu ŵatite:

"Ammati! Ana ŵani tachisigalila, Akunnungu pataachitendekanya yeleyo?

24 Ngalaŵa tisiiche kutyochela ku Kitimu,

tachijigunguluchila Ashulu ni Ebeli,

nambo ŵanyawo nombe tachijonasikwa."

25 Nipele, che Balaamu ŵatyosile, ŵausile kumangwakwe; che Balaki nombe najo ŵatyosile ni kwaula.