1 Ambuje Akunnungu ŵasalile che Musa, kuti, 2 "Mwauchisye Ŵamidiani indu iŵaatendele Ŵaisilaeli; nipele mmwejo tinchiwa."

3 Nipele che Musa ŵasalile ŵandu kuti, "Mwaŵiche chile ŵandu kwa ngondo ajaule kukwagunguluchila Ŵamidiani kwauchisya kwaligongo lya Ambuje Akunnungu aila yatutesile uwe. 4 Kutyochela pa kila lukosyo lwa Ŵaisilaeli, timwapeleche ŵandu elufu moja ku ngondo."

5 Nipele, ŵandu elufu moja ŵasagulikwe pa kila lukosyo pasikati ja Ŵaisilaeli achajinji, ŵaliji achalume elufu kumi nambili ŵaakwete yakumenyanilana. 6 Che Musa ŵaajawisye ku ngondo ŵandu elufu moja kutyochela pa kila lukosyo, achilongoswaga ni che Finehasi mwanache jwa jwambopesi che Eleasali, ali ni yoombo ya peuto papaswela ni mapenga ga kupeleka imanyisyo. 7 Ŵachigungumuchile chilambo cha ku Midiani, mpela Ambuje Akunnungu iŵanlamulile che Musa, ŵauleje achalume wose. 8 Pasikati ja ŵandu ŵaŵaulajikwe wo, kwaliji ni mamwenye nsano ŵa ku Midiani: Che Evi ni che Lekemu ni che Suli ni che Huli ni che Leba. Iyoyo peyo ŵauleje che Balaamu mwanache jwa che Beoli.

9 Ŵaisilaeli ŵaakamwile achakongwe ŵa Chimidiani ni kwajigala pamo ni ŵanache ŵao ni sooni ŵajigele kwa machili mipingo ja ng'ombe ni ngondolo ni ipanje yao yose. 10 Ŵajitinisye mooto misi jao jose mwakutama, ni igono yao yose. 11 Ŵajigele iŵaisumwile yose ni mateeka wose ya ŵandu ni inyama, 12 ŵampelechele che Musa ni che Eleasali, ni mpingo wose wa Ŵaisilaeli uwaliji ku chigono ku chilambo cha mwiŵata ya ku Moabu, peesi lusulo lwa Yolodani chiŵandika ni ku Yeliko.

13 Che Musa ni jwambopesi che Eleasali ni ilongola wosepe ŵa Ŵaisilaeli ŵatyosile pa chigono, ŵapite kukwachingamila ŵangondo paasa chigono. 14 Che Musa ŵaatumbilile achakulungwa ŵangondo ni ilongola ŵaŵajimililaga mipingo ja ŵangondo elufu moja ni mipingo ja ŵangondo mia moja ŵaŵausile kutyochela ku ngondo. 15 Che Musa ŵausisye, "Ligongo chichi mwalesile achakongwe wose ŵa ali ŵajumi? 16 Nkumbuchilanje kuti achakongwe ni ŵaŵakuiye maloŵe ga che Balaamu, ŵaatesile Ŵaisilaeli ŵaaleche Ambuje Akunnungu akula ku Peoli mpaka ulwele wakogoya waichile ŵandu ŵakwe Ambuje Akunnungu. 17 Kwayele, mwaulaje ŵanache wosepe achalume ni jwankongwe jwalijose jwawahiye kuwonegana ni jwannume. 18 Nambo achiŵali wose ŵanganawahi kuwonegana ni achalume nkaaulaga; mwaleche ŵajumi kwaligongo lyenu mwachimisyene. 19 Aŵala ŵanawose ŵaali pasikati jenu ŵauleje mundu pane kugakwaya malilo akusachilwa atame paasa pa chigono kwa moŵa saba; nliswejesye pamo ni ŵanawose umwajigele, pa lyuŵa lyaatatu ni lyasaba. 20 Nombe nkusachilwa nchape yakuwala, kila chindu chekolochekwe ni lipende, ni manyunya ga ngondolo pane ni chitela."

21 Jwambopesi che Eleasali ŵaasalile achalume ŵausile ku ngondo kuti, "Lyeleli ni lilajisyo lya Ambuje Akunnungu liŵapele che Musa. 22 Madini ga sahabu ni feza ni shaba ni chisyano ni libati ni madini ga lisasi, 23 malumbo gakwe indu yanayose yaikupililila mooto, nnyiswejesye pakuiŵika pa mooto. Namose yeleyo, ikusachilwa iswejechekwe ni meesi gauswejesyo. Indu ine yose yangakomboleka kuiŵika pa mooto nnyiswejesye pakuichapa ni meesi go. 24 Pa lyuŵa lya saba ikusachilwa nchapeje yakuwala yenu; pelepo timme ŵasalele ni kukundikwa kwinjila pa chigono."

25 Ambuje Akunnungu ŵaasalile che Musa, ŵansalile kuti, 26 "Ŵalakwejo ni jwambopesi che Eleasali pamo ni ilongola ŵa ngosyo sya Ŵaisilaeli, mmalanje indu yasumwile ku ngondo, ŵandu ni inyama. 27 Ngaŵanye indu yasumwile pa maunjili gaŵili, liunjili limo lya ŵangondo ni liunjili liine kwaligongo lya Ŵaisilaeli wose. 28 Nipele pa alila liunjili lya ŵangondo ŵaŵajawile ku ngondo, nsapule yakwapelechela Ambuje Akunnungu: Chindu chimo pa kila indu mia tano, iŵeje ŵandu ni ng'ombe ni mbunda ni ngondolo pane mbusi, 29 mpeleche kwa jwambopesi che Eleasali kuŵa mbopesi kwa Ambuje Akunnungu. 30 Pa alila liunjili lya Ŵaisilaeli wosepe, njigale chindu chimo pa kila indu hansini, iŵeje ŵandu ni ng'ombe ni mbunda ni ngondolo pane mbusi pane inyama ine. Kwayele timwape Ŵalawi ŵakupanganya masengo pa Lisakasa lya kusimanilana." 31 Che Musa ni jwambopesi che Eleasali ŵatesile mpela Ambuje Akunnungu iŵansalile che Musa.

32 Indu iŵasumwile ŵangondo kungondo ila yaliji: Ngondolo laki sita na elufu sabini na tano, 33 ng'ombe Elufu sabini na mbili, 34 mbunda Elufu sitini na moja, 35 ni achiŵali ŵanganawonegane ni achalume Elufu selasini na mbili. 36 Nusu jakwe, liunjili liŵagaŵenye kwa ŵangondo ŵaŵajawile kungondo, lyaliji ngondolo Laki tatu na elufu selasini na saba na mia tano. 37 Pa ŵelewo mia sita na sabini na tano ŵapeleche kwa Ambuje Akunnungu. 38 Ng'ombe elufu selasini na sita ni ŵelewo ng'ombe sabini na mbili ŵapeleche kwa Ambuje Akunnungu. 39 Mbunda ŵaliji elufu selasini na mia tano, ni pa ŵelewo mbunda sitini na moja ŵapeleche kwa ligongo lya Ambuje Akunnungu 40 Ŵandu ŵaliji elufu kumi na sita, ni pa ŵelewo ŵandu selasini na mbili ŵapeleche kwa ligongo lya Ambuje Akunnungu. 41 Nipele, che Musa ŵampele jwambopesi che Eleasali yakupeleka yo iyatyosekwe kwa ligongo lya Ambuje Akunnungu, mpela Ambuje Akunnungu iŵasalile che Musa.

42 Ajila nusu jiŵapele Ŵaisilaeli, jati che Musa ŵajiŵisile pakwe ni ajila nusu jiŵapele ŵangondo ŵaŵajawile ku ngondo, 43 jaliji ngondolo laki tatu na selasini na saba na mia tano, 44 ngombe elufu selasini na sita, 45 mbunda elufu selasini na mia tano, 46 ni ŵandu elufu kumi na sita. 47 Pa aji nusu jiŵapele Ŵaisilaeli ji, che Musa ŵajigele chimo pa indu hansini ni inyama hansini, mpela Ambuje Akunnungu iŵatite kwalajisya, ŵapele Ŵalawi ŵaŵapanganyaga masengo pa Lisakasa lya Kusimanilana kwaligongo lya Ambuje Akunnungu.

48 Nipele achakulu ŵangondo ni ŵakwimilila mipingo ja ŵangondo elufu moja, ni ŵakwimilila mipingo ja ŵangondo mia moja, ŵanjaulile che Musa, 49 ŵansalile kuti, "Ŵakutumichila ŵenu twaŵalasile ŵangondo wosepe ŵaali paasi penu ni tuiweni kuti ngapagwa namose jumo jwaulajikwe. 50 Nipele, tuichisye yoombo ya sahabu ni mikufu ni bangili ni pete sya muhuli ni heleni ni shanga yati kila mundu ŵapatile. Tuiichisye kuti ni uweji wakwe tutendelwe ujilanyo paujo pa Ambuje Akunnungu." 51 Che Musa ni jwambopesi che Eleasali ŵapochele indu yo yose iyasalalikwe kwa sahabu. 52 Sahabu josepe jiŵajipeleche kwa Ambuje Akunnungu jaŵandichile kilo mia mbili. 53 Jwangondo jwajulijose ŵajigele indu yakwe iŵasumwile. 54 Nipele, che Musa ni jwambopesi che Eleasali ŵajipochele sahabu jo kwa achakulungwa ŵangondo, ŵajijawisye ku Lisakasa lya Kusimanilana kwaligongo lya Akunnungu, jiŵe chikumbuchisyo cha Ŵaisilaeli paujo pa Ambuje Akunnungu.