1 Ŵandu ŵa ngosyo sya Lobeni ni Gadi ŵakwete ilango yejinji kwannope. Nipele, paŵaiweni kuti malo ga ku Yaseli ni ku Gadi galiji gambone kwa ilango, 2 ŵaajaulile che Musa ni jwambopesi che Eleasali ni ilongola ŵampingo, ŵaasalile kuti, 3 "Misi ja ku Ataloti ni ku Diboni ni ku Yaseli ni ku Nimula ni ku Heshiboni ni ku Eleale ni ku Sebamu ni ku Nebo ni ku Beoni, 4 chilambo chati Ambuje Akunnungu ŵachipundile kwaligongo lya Ŵaisilaeli, chili chilambo chambone kwa kulanga, ni uweji tukwete ilango yejinji kwannope. 5 Nipele, iŵaga chintukunde tukummenda ntupeje chilambo chi chiŵe chetu; nkatujombosya pesi lusulo lwa Yolodani."

6 Che Musa ŵaajanjile ŵandu ŵa ngosyo sya Gadi ni Lubeni kuti, "Uli, nkusakanga nsigalile apano, akuno achalongo achinjenu Ŵaisilaeli ali nkwaula kukuputana ngondo? 7 Kwachichi nkwatengusya Ŵaisilaeli akajaula ku chilambo chati Ambuje Akunnungu ŵapele? 8 Yele ni iŵaitesile achambuje ŵenu panaalajichisye kutyochela ku Kadeshi Balinea ajaule akachiuchilichisye chilambo. 9 Ŵanyawo ŵajawile mpaka ku lichemba lya Eshikoli, ŵachiweni chilambo, nambo paŵausile, ŵatengwisye Ŵaisilaeli akajaula ku chilambo chiŵapele Ambuje Akunnungu. 10 Ambuje Akunnungu ŵatumbile pa lyele lyuŵa lyo, ŵalumbilile achitiji, 11 ‘Kusyene ngapagwa mundu jwalijose pasikati ja ŵandu ŵaŵatyosile ku Misili jwakwete yaka ishilini ni kupunda jutachijinjila mu chilambo chinalanjile kwapa che Abulahamu ni che Isaka ni che Yakubu, ligongo nganaambilikanichisya.’ 12 Ŵanawose ngaachiwona chilambo cho, ikaŵe che Kalebu mwanache jwa che Yefune jwa ntundu wa Kenisi, ni che Yoshua mwanache jwa che Nuni, pakuŵa ŵanyawo ŵaambilikanisisye. 13 Ambuje Akunnungu ŵatumbilile kwannope Ŵaisilaeli, ŵatesile ajendejende akuno ni akunokuno mwipululu kwa yaka olobaini, uŵelesi wose uwatesile chigongomalo paujo pakwe, ŵawile. 14 Ni sambano, ŵanyamwe uŵelesi wa che Lobeni ni che Gadi nkutenda ila iŵaitesile achachekulu ŵenu, ni konjechesya lutumbilo lwekulungwa lwa Ambuje Akunnungu kwa Ŵaisilaeli. 15 Ŵanyamwe mwakanaga kwakuya, ŵelewo tachinneka sooni mwipululu, ni ŵanyamwe tinchatenda ŵandu ŵa ajonanjikwe."

16 Nipele, ŵanjaulile che Musa, ŵansalile kuti, "Ntukunde kaje tutaŵe pelepa machinga ga ngondolo syetu, ni misi jajili ni makome ga maganga jakutama ŵanache ŵetu. 17 Nambo uweji twachinsyene tutujigale yakumenyanila yetu kwaula ku ngondo pamo ni achalongo achinjetu Ŵaisilaeli, ni tutuŵe chambujo ku ngondo mpaka twaichisye pamalo patachitama. Pa kele katema ko ŵanache ŵetu tachitama ku misi jajili ni makome kulilinda ni achinsyene chilambo chi. 18 Ngatuuja kumusi mpaka pele Ŵaisilaeli wose ali agaŵilwe malo gatigaŵe gao. 19 Ngatujigala malo gagali gose pasikati jao peesi lusulo lwa Yolodani, ligongo uweji tupatile malo getu peesi pano, kungopochelo lyuŵa kwa Yolodani."

20 Che Musa ŵasalile kuti, "Iŵaga kusyene chintende mpela inkusala, nipele papapa pepa paujo pa Ambuje Akunnungu, njigalanje yakumenyanila yenu njaulanje ku ngondo. 21 Jwakumenyana jwalijose pasikati jenu tajomboche lusulo lwa Yolodani nli nkulongoswa ni Ambuje Akunnungu, timwagungumuchile ŵammagongo ŵetu mpaka Ambuje Akunnungu ŵaapunde, 22 ni kuchijigala chilambo kuchitenda chenu. Mwatendaga yeleyo, timmuje, pakuŵapo timme ntesile yakuisaka Ambuje Akunnungu ni achalongo achinjenu Ŵaisilaeli. Nipele Ambuje Akunnungu chakunde achi chilambo chakungopochelo lyuŵa kwa Yolodani chi chiŵe chenu. 23 Nambo ngunjamuka kuti iŵaga ngampanganya inlanjile yi, tintende sambi kwa Ambuje Akunnungu ŵenu; mmanyilileje kusyene kuti tinjamuchikwe. 24 Mwataŵile misi achiŵankwenu ni ŵanache ŵenu ni ilango yenu machinga; nambo ntendeje mpela intite pakulanga."

25 Nipele, ŵandu ŵa lukosyo lwa Gadi ni Lobeni ŵansalile che Musa kuti, "Uweji ŵakutumichila ŵenu tututende mpela intite pakutulamulila. 26 Achiŵankwetu, ŵanache ŵetu ni ngondolo ni ng'ombe, tiisigalile papapa pa misi ja ku Gileadi. 27 Nambo uweji ŵakutumichila ŵenu tuli chile kwaula ku ngondo tulinkulongoswa ni Ambuje Akunnungu. Tutujomboche lusulo lwa Yolodani ni kujiputa ngondo mpela intite kutusalila."

28 Nipele, che Musa ŵaalajisye che Eleasali jwambopesi ni che Yoshua mwanache jwa che Nuni ni ilongola ŵa ngosyo syose sya Ŵaisilaeli achitiji, 29 "Iŵaga ŵandu ŵa lukosyo lwa Gadi ni Lobeni tajomboche lusulo lwa Yolodani pamo ni ŵanyamwe ali ajigele yakumenyanilana yao ali nkulongoswa ni Ambuje Akunnungu, mwapundaga ni kuchijigala chilambo cho, nipele timwape chilambo cha ku Gileadi chiŵe chawo. 30 Nambo iŵaga ngaajomboka lusulo lwa Yolodani akakamulangane ni ŵanyamwe mu kumenyana ngondo, nipele takajigale malo ja ku Kanaani kuti jiŵe jawo pamo ni ŵanyamwe."

31 Ŵandu ŵa lukosyo lwa Gadi ni Lobeni ŵajanjile kuti, "Ambuje, uweji tututende mpela Ambuje Akunnungu yatite kutusalila uweji ŵakutumichila ŵenu. 32 Tuchilongoswaga ni Ambuje Akunnungu, tutujomboche tuli tujigele yakumenyanila yetu mpaka ku chilambo cha ku Kanaani, nambo chilambo chatupele akuno kungopoko lyuŵa kwa lusulo lwa Yolodani chichiŵe chetu."

33 Nipele, che Musa ŵapele ŵandu ŵa ngosyo sya Gadi ni Lobeni ni nusu ja lukosyo lwa Manase mwana jwa che Yusufu, chilambo chosepe cha mwenye che Sihoni jwa Ŵaamoli ni chilambo cha mwenye che Ogu jwa ku Bashani pamo ni misi ni malo gagali mungulugulu mwa misi jo. 34 Lukosyo lwa Gadi lwataŵile misi ja ku Diboni ni ku Ataloti ni ku Aloeli, 35 ni ku Atiloti Shofani ni ku Yaseli ni ku Yogibeha, 36 ni ku Beti Nimila ni ku Beti Halani, misi jajili ni makome ni machinga ga ilango. 37 Lukosyo lwa Lobeni lwataŵile misi ja ku Heshiboni ni ku Eleale ni ku Kiliataimu, 38 ni ku Nebo ni ku Baali Meoni, ni ku Sibima. Misi jiŵataŵile ŵajipele meena gane.

39 Uŵelesi wa che Makili, mwana jwa che Manase, ŵachigungumuchile chilambo cha ku Gileadi, ŵasumwile ni kwatopola Ŵaamoli ŵaŵatamaga mwelemo. 40 Kwayele, che Musa ŵaapele ŵandu ŵa ntundu wa Makili mwana jwa che Manase, chilambo cha ku Gileadi, nombewo ŵatemi mwelemo. 41 Che Yaili jwa lukosyo lwa Manase, ŵajigungumuchile misinda jimpepe ja ku Gileadi ni kujisumula, ŵajipele liina lya Hawoti Yaili malumbo gakwe misinda ja che Yaili. 42 Nombe che Noba ŵaugungumuchile musi wa Kenati ni misinda jakwe ni kuusumula, ni ŵauŵilasile Noba, liina lyakwe nsyene.