Números 30

Malajisyo gankati ilumbilo

1 Nipele che Musa ŵakungulwiche ni ilongola ŵa ngosyo sya Isilaeli, ŵasalile kuti Ambuje Akunnungu aanajisye nansalile.

2 Mundu ataŵaga nasili kwa Ambuje Akunnungu pane alumbililaga kuti akusaka kwatyochesya Akunnungu chindu ni kulitaŵa nsyene kwa chilumbilo cho, akagalausya maloŵe gakwe; akusachilwa apanganye yanayose yasasile nsyene kwa kang'wa jakwe.

3 Mwali jwalijose jwati akutama ku nyuumba kwa atatigwe, aŵikaga nasili kwa Ambuje Akunnungu kuti tampe chindu, 4 akuno atatigwe ali apilikene chilanga cho ni nganankanila, nipele akusachilwa atindimisye nasili syakwe kwa kupeleka kila chindu chalanjile. 5 Nambo iŵaga atatigwe apilikene nkati jele nasili jo, ni kunkanila mwali jwakwe, nipele nasili syakwe ni ilanga yakwe ngaintaŵa. Ambuje Akunnungu tachinnechelesya ligongo atatigwe achikanile chele chindu cho.

6 Iŵaga mwali chalombekwe ali aŵisile nasili, pane ali alanjile pangaganichisya yambone, ni kulitaŵa nsyene, 7 nombe ŵankwakwe apilikene chele chindu cho ni nganankanila, akusachilwa atende mpela iŵatite kusala. 8 Nambo iŵaga ŵankwakwe apilikene chele chindu cho ni kunkanila, nipele jwele ŵankwakwe jo ngasachilwa kutenda aila yasasile yo, nombe Ambje Akunnungu tachinnechelela. 9 Nambo nasili pane chilanga chilichose chaŵisile jwankongwe jwawililwe ni ŵankwakwe pane jwankongwe jwapegwilwe talaka chati akusachilwa atindimisye.

10 Nambo jwankongwe jwalombekwe aŵikaga nasili pane alangaga kwa chilumbilo ali ku nyuumba kwa ŵankwake, 11 nipele ŵankwakwe apilikanaga, ni nganankanila pane nganansalila chindu chilichose, nipele jwankongwe akusachilwa atende yanayose yasasile. 12 Nambo iŵaga ŵankwakwe apilikene chele chindu cho ni kunkanila, nipele jwele ŵankwakwe jo ngasachilwa kutenda aila yasasile yo, nombe Ambje Akunnungu tachinnechelela. 13 Ŵankwakwe wo akukombola kwitichisya pane kukanila nasili pane ilanga iliyose yakuitenda. 14 Nambo iŵaga ŵankwakwe ngaaŵecheta chindu chilichose kutandilila pa lyuŵa lichapikane ngani sya nasili pane ilanga ya jwankongwe jwakwe, nikuti ajitichisye pa lyuŵa lilyolyo papilikene ngani syakwe ligongo nganaŵecheta chilichose kukanila. 15 Nambo asikanilaga ni kusigalausya pa katema ni pakumala kupilikana ngani syakwe, nipele ŵelewo tachiŵa jwaulemwa pa chileŵo cha ŵankwakwe.

16 Gelega ni malajisyo gati Ambuje Akunnungu ŵanlajisye che Musa kwagamba ŵalume ni ŵakongwe; atati ni mwali jwakwe, jwele mwali jo ali nganaŵe kulombekwa ni akutama ku nyuumba ja atatigwe.

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?