1 Ambuje Akunnungu ŵaasalile che Musa ni che Haluni, 2 "Mwaŵalanje Ŵakohati ŵali mu lukosyo lwa Ŵalawi, malinga ni mitundu jao ni minango jao; 3 chimwalembe achalume wose ŵaali ni yaka selasini mpaka hansini ŵakukombola kupanganya masengo ga mu Lisakasa lya Kusimanilana. 4 Gelega chigaŵe masengo ga Ŵakohati mu Lisakasa lyakusimanilana kwaligongo lya Akunnungu, tachiigosa indu yeswela nnope."

5 Katema pakusaka kuchisamisya chigono, che Haluni ni achiŵanagwe tajinjile mu lisakasa ni kulitulusya lipasia lyalili paujo pa lisanduku lya lilangano, ni kuliunichila kwa lipasia lyo. 6 Pachanya pakwe taŵiche chiunichilo cha lipende lyakwepepala lya chinyama cha mu bahali, nipele taŵiche chitambaa cha langi ja chibuluu chakusalala. Kumbesi tajinjisye itela ya kunyakulila lisanduku lyo.

7 Pachanya pa mesa ja kutyochesya mikate jajikuŵichikwa paujo pa Ambuje Akunnungu taŵiche chitambaa cha chibuluu chati pachanya pakwe taŵiche sahani, ni isahani ya ubani, bakuli ni gilasi kwa ligongo lya kutyochesya mbopesi sya ya kung'wa. Moŵa gose chikuŵe ni mkate pachanya pa mesa. 8 Nipele taunichile yoombo yose yi kwa chitambaa chechejeu, ni pachanya pakwe taŵiche chiuichilo cha lipende lyakwepepala lya chinyama cha mu bahali. Pelepo tajinjisye itela yakwe yakunyakulila.

9 Tajigale chitambaa cha chibuluu chati taunichile chindu chakuŵichila lumili ni imuli yakwe, mikasi jakwe ni masinia ni yoombo yose yaikutumika kuŵichila mauta. 10 Tachiŵiche pamo ni yoombo yakwe yose mu lipende lyakwepepala lya chinyama cha mu bahali chachikuŵilanjikwa pomboo ni kuŵika pachanya pa felemu jakwe.

11 Sooni taŵiche chitambaa cha chibuluu pa chilisa cha sahabu ni kuchiunichila kwa lipende lyakwepepala lya chinyama cha mu bahali chachikuŵilanjikwa pomboo pachanya pakwe. Pelepo tajinjisye itela ya kunyakulila. 12 Taijigale yoombo yose yaikutumika peuto papawichikwe kwaligongo lya Akunnungu, taitaŵe kwa chitambaa cha chibuluu ni kuiunichila kwa lipende lyakwepepala lya chinyama cha mu bahali chachikuŵilanjikwa pomboo, nipele taŵiche pachanya pa felemu jakwe. 13 Tatyosye liu kutyochela pa chilisa ni pachanya pakwe taŵiche chitambaa cha sambalau. 14 Nipele taŵiche yoombo yose yaikutumika paakupopela pa chilisa. Sepetu, isyano yaili ni meeno, mitiko ni mabakuli gakusuluchisya miasi. Nipele pachanya pakwe taŵiche chiunichilo cha lipende lyakwepepala lya chinyama cha mu bahali chachikuŵilanjikwa pomboo ni kwinjisya itela ya kunyakulila. 15 Pakumala che Haluni ni achiŵanagwe kuunichila indu yeswela pamo ni yoombo yakwe yose, ni ŵandu pataŵe chile kutanda ulendo, ŵandu ŵa lukosyo lwa Ŵakohani taiche ni kuijigala. Nambo ŵanyawo ngakuŵajilwa kuikwaya yoombo yo akaika kuŵa. Gele ni masengo ga lukosyo lwa Ŵakohati katema kose patalisamisye Lisakasa lya Kusimanilana kwaligongo lya Akunnungu. 16 Che Eleasali mwana jwa jwambopesi che Haluni ni jutachigagosa mauta ga miseituni kwaligongo lya lumuli ni ubani wakununjila kwannope ni mbopesi sya magowolo ga kila lyuŵa ni mauta ga kupakasya kuti kuiŵika pajika indu kwa ligongo lya Ambuje Akunnungu mu lisakasa lyo.

17 Nipele Ambuje Akunnungu ŵaasalile che Musa ni che Haluni, 18 "Nkaaleka ŵandu ŵa ntundu wa Ŵakohati aulajikwe. 19 Nipele pakuti ŵaŵambasye akaika kuulajikwa kwa kuiŵandichila yoombo yeswela yo chintende yeleyi: Che Haluni ni achiŵanagwe tajinjile peuto papaŵichikwe kwaligongo lya Akunnungu ni kwapanjila kila mundu masengo gakwe gatapanganye. 20 Nambo Ŵokohati ngaajinjila ng'oo kukuilola indu yeswela yo, atendaga yeleyo tawe."

21 Ambuje Akunnungu ŵaasalile che Musa, 22 "Mwaŵalanje ŵandu ŵa lukosyo lwa Gelishoni, malinga ni minango jao ni mitumdu jao; 23 timwaŵalanje achalume wose ŵaali ni lisusa lya yaka selasini mpaka hansini, ŵakuŵajilwa kwinjila mu masengo ga mu Lisakasa lya Kusimanilana kwaligongo lya Akunnungu. 24 Masengo gao tigaŵe: Kujigala mapasia ga Lisakasa lya Akunnungu ni Lisakasa lya Kusimanilana pamo ni 25 chiunichilo chakwe cha lipende lya kwepepala lya chinyama cha mu bahali chachikuŵilanjikwa pomboo chachili pachanya pa lipasia lya nnango, 26 ni mapasia ga lutenje lwalusyungulile chilisa ni peuto papaswela pamo ni ngonji sya Lisakasa ni chilisa, mapasia ga nnango wa kwinjilila ni indu yose yaikutumika pa masengo ga kutaŵa lisakasa lyo. Ŵanyawo akusachilwa atende indu yose yaikusachilwa kutendekwa. 27 Che Haluni ni achiŵanagwe ni ŵatachapanjila masengo gose Ŵagelishoni iŵeje indu yakujigala pane kupanganya masengo gane. Timwapanjile indu yose yakusachilwa kwigala." 28 Gele ni masengo ga ntundu wa Ŵagelishoni ku Lisakasa lya Kusimanilana kwaligongo lya Akunnungu; Tatende masengo achilongoswaga ni che Itamali mwana jwa jwambopesi che Haluni.

29 Nipele, Ambuje Akunnungu ŵaasalile che Musa kuti, "Iyoyopeyo timwaŵalanje Ŵamelali malinga ni mitundu jao ni minango jao. 30 Timwaŵalanje achalume wose ŵaali ni lisusa lya yaka selasini mpaka hansini, ŵakuŵajilwa kwinjila mu masengo ga mu Lisakasa lya Kusimanilana kwaligongo lya Akunnungu. 31 Ŵanyawo masengo gao pakupanganya masengo pa Lisakasa lya Kusimanilana tigaŵe: Kujigala sichi ya lisakasa ni mafelemu ni mitambalapanya yakwe ni itamichilo, 32 ni sichi sya ndenje sya kusyunguchisya mosemose ni itamichilo yakwe, ni igingi ni ngonji pamo ni yombo yakwe yose ni kila chindu chachikusachilwa kwa kutumichila. Kila mundu mumpanjile indu itasachilwe kujigala. 33 Gele ni masengo ga ntundu wa Ŵamelali ku Lisakasa lya Kusimanilana kwaligongo lya Akunnungu; Tatende masengo kwa kulongoswa ni che Itamali mwana jwa jwambopesi che Haluni."

34 Nipele che Musa ni che Haluni pamo ni ilongola ŵa nsongangano wose ŵaaŵalasile Ŵakohati malinga ni mitundu jao ni minango jao. 35 Ŵaalembile ŵandu wose ŵaali ni lisusa lya yaka selasini mpaka hansini, jwalijose jwakuŵajilwa kwinjila mu masengo ga mu Lisakasa lya Kusimanilana. 36 Ŵandu wose ŵaŵaŵalanjikwe kwa mitundu jao ŵaliji ŵandu elufu mbili na mia saba na hansini. 37 Ŵelewa ali ŵandu wose ŵa ntundu wa Ŵakohati ŵaŵaŵalanjikwe mu Lisakasa lya Kusimanilana, ŵati che Musa ni che Haluni ŵaaŵalasile mpela Ambuje Akunnungu iŵatite pakwalajisya che Musa.

38 Ŵagelishoni ŵaŵaŵalanjikwe malinga ni mitundu jao ni minango jao, 39 ŵaali ni lisusa lya yaka selasini mpaka hansini, ŵakuŵajilwa kupanganya masengo mu Lisakasa lya Kusimanilana, 40 ŵaŵaŵalanjikwe malinga ni mitundu jao ni ulongo wao ŵaliji ŵandu elufu mbili na mia sita na selasini. 41 Ŵanyaŵa ni aŵala ŵandu ŵa ntundu wa Ŵagelishoni ŵaŵatumiche mu Lisakasa lya Kusimanilana. Che Musa ni che Haluni ŵaŵalasile mpela Ambuje Akunnungu iŵatite pakulajisya. 42 Ŵamelali ŵaŵalanjikwe malinga ni mitundu jao ni ulongo wao. 43 Achalume wose kutandilila ŵa yaka selasini mpaka hansini, ŵaŵaiche kutumichila pa Lisakasa lya Kusimanilana, 44 ŵaliji ŵandu elufu tatu na mia mbili. 45 Ŵanyaŵa ni ŵandu wose ŵa ntundu wa Ŵamelali. Che Musa ni che Haluni ŵaŵalasile mpela Ambuje Akunnungu iŵatite pakwalamulila che Musa.

46 Kwayele Ŵalawi wose ŵalembekwe ni che Musa pamo ni che Haluni ni ilongola ŵa Ŵaisilaeli, malinga ni mitundu jao ni minango jao. 47 Achalume ŵaali ni lisusa lya yaka selasini mpaka hansini, ŵaŵaiche kupanganya masengo ku Lisakasa lya Kusimanilana ni kujigala Lisakasa lyo, 48 ŵaliji ŵandu elufu nane na mia tano na semanini. 49 Kila mundu ŵapegwile masengo gakwe ga kupanganya ni ŵasalilwe chakujigala ku Lisakasa lya Kusimanilana, mpela Ambuje Akunnungu iŵatite pakwalajisya che Musa.