1 Ambuje Akunnungu ŵasalile che Musa ni che Haluni kuti, 2 "Gelega ni malajisyo gangumpanga une Ambuje Akunnungu. Mwasalile Ŵaisilaeli annyichisisye ngombe jankolo jechejeu janganakola chilema chilichose namose liŵasi ni janganatumiche pa masengo gagali gose. 3 Mwape jwambopesi che Eleasali ng'ombe jo. Chatyosyekwe paasa pa chigono ni kujisikita paujo pa jwambopesi jo. 4 Nipele, jwambopesi che Eleasali tajigale miasi kanandi ja ng'ombe jo ni kunyuluchisya kwa chala mala saba, chambujo mwa Lisakasa lya Kusimanilana kwaligongo lya Akunnungu. 5 Ng'ombe jo jinajose chijijochekwe pa mooto paujo pa jwambopesi. Kila chindu chichitiniswe; lipende ni nyama ni miasi ni matuumbo gakwe. 6 Pelepo jwambopesi chajigale chitela cha mwelesi, ni husopo ni usi wechejeu wa manyunya ga ngondolo ni kwasila pa mooto wo. 7 Pakumala pelepo, jwambopesi chachape nguo syakwe ni koga kwa meesi, nipele chakombole kwinjila pa chigono, nambo ngaakundikwa ku kupopela mpaka ligulo. 8 Mundu jutachijitinisya ng'ombe jo nombe tachichapa nguo syakwe ni koga kwa meesi, nambo nombejo ngaakundikwa ku kupopela mpaka ligulo. 9 Ajula mundu jwakukundikwa ku kupopelela takumbe liu lya ng'ombe jo ni kulijausya peuto papasalele paasa pa chigono. Tiligosekwe ni tilitumiche ni mpingo wose wa Ŵaisilaeli pakolochesya meesi ga kutyosya ungakundikwa ni Akunnungu, kwaligongo lya sambi. 10 Mundu jutakumbe liu lya ng'ombe jo akusachilwa achape nguo syakwe, nombejo taŵe jwangakundikwa ku mapopelo mpaka ligulo. Lilajisyo li tiliŵe lya moŵa gose, kwa Ŵaisilaeli ni ŵandu ŵane ŵakutama pasikati jawo.

11 "Mundu akwayaga malilo ga mundu jwalijose, ngakundikwa ku mapopelo kwa moŵa saba. 12 Pa lyuŵa lyaatatu ni lya saba mundu jo talijosye ni agala mesi gakuliswejesya, nombejo taŵe jwasalele. Nambo alekaga kuliswejesya pa lyuŵa lyaatatu ni lya saba, mundu jo tasigalile kuŵa jwangakundikwa ku kupopela. 13 Jutagakwaye malilo, yaani chiilu cha mundu jwawile, naga ngakuliswejesya, akuntesya Ambuje Akunnungu alikane Lisakasa lyo, nombejo taŵichikwe pajika ni Ŵaisilaeli. Mundu jo tasigalile jwangakundikwa ku kupopela ligongo ngananyuluchiswa meesi ga kuswejesya gala.

14 "Gelega gali malajisyo gakugakuya iŵaga mundu awilile mu lisakasa: Kila mundu juchajinjile mu lisakasa mo, pane jwali mu lisakasa mo, ngaakundikwa ku kupopela kwa moŵa saba. 15 Choombo chilichose changaunichila ni changali chiunichilo pachanya pakwe ngachikundikwa kwa kupopela. 16 Mundu jwalijose akwayaga chiilu cha mundu jwaulajikwe ni lipanga pane jwawile chiwa chakawaida kumigunda, pane akwayaga liupa lya mundu pane lilembe, ngaakundikwa ku kupopela kwa moŵa saba.

17 "Kwa ligongo lya kutyosya ungakundikwa ku kupopela, mundu jwakukundikwa ku kupopelela tajigale liu lya mbopesi ja kutyosya sambi jajitiniswe, liu lyo taŵiche mu choombo ni kuwanganya ni meesi ga nlusulo. 18 Mundu jwalijose jwakukundikwa kwa mapopelelo tajigale hisopo, tanyoye mmesi ni kunyuluchisya lisakasa ni yoombo yose pamo ni ŵandu ŵali mwelemo. Nombe tannyuluchisye mundu jwakwaiye liupa lya mundu pane mundu jwaulajikwe pane jwawile chiwa chakawaida pane lilembe. 19 Mundu jwakukundikwa ku kupopela tannyuluchisye mundu jwangaakukundikwa meesi go. Kwayele pa lyuŵa lya saba, tanswejesye mundu jwangakukundikwa jo, nombejo tachape nguo syakwe ni koga meesi, ni ligulo lyo taŵe jwakukundikwa kwa kupopelela.

20 "Nambo iŵaga mundu jwangaakukundikwa takane kuliswejesya, takanikwe mu nsongangano pakuŵa akulitenda Lisakasa lya Ambuje Akunnungu likakundikwa kwa kupopela. Pakuŵapo ngananyuluchiswa meesi ga kuswejesya, ni ngaakukundikwa. 21 Ŵandu tagakamule malajisyo ga moŵa gose. Mundu jutanyuluchisye meesi ga kuswejesya chachape nguo syakwe; nombe juchagakwaye meesi gagatumiche kwa kuchapila go taŵe jwangakundikwa kwa mapopelo mpaka ligulo. 22 Chindu chilichose chaakuchikwaya mundu jwangakukundikwa chichiŵe changakundikwa ni julijose jutakwaye chindu cho ngaakundikwa ku kukupopela mpaka ligulo."