1 Pa mwesi waandanda mpingo wose wa Ŵaisilaeli waiche ku chipululu cha Sini, ni ŵatemi ku Kadeshi. Che Miliamu ŵawilile kweleko ni ŵansichile kukoko.

2 Pamalo paŵaŵisile chigono po paliji pangali meesi kwaligongo lya ŵandu ŵala. Kwayele mpingo wose wa ŵandu, ŵasongangene kukana kwapikanila che Musa ni che Haluni. 3 Ŵandu ŵakangene ni che Musa achitiji, "Ikaliji yambone tukawile paujo pa lisakasa lya Ambuje Akunnungu pamo ni Ŵaisilaeli achinjetu! 4 Kwachichi mwatuichisye uweji mpingo wa Ambuje Akunnungu akuno ku chipululu kuno? Ana mwatuichisye kuti tuwe pamo ni ilango yetu? 5 Kwachichi ntutyosisye ku Misili ni kutuichisya pamalo papakogoya pa? Pamalo pa pangali ni yakulya namose tini, ni sabibu namose makomamanga. Namuno meesi gakung'wa nganigapagwa!" 6 Pelepo che Musa ni che Haluni ŵatyosile pa mpingo wa ŵandu, ŵapite kwima pannango wa Lisakasa lya Kusimanilana kwaligongo lya Akunnungu, ŵatindiŵele ni ŵajineme mpaka paasi. Nipele ungalime wa Ambuje Akunnungu waakopochele. 7 Ambuje Akunnungu ŵaasalile che Musa, 8 "Njigale lubokola lwenu, nipele mmwe pamo ni che Haluni nkulugwenu, nsonganganye mpingo wose wa ŵandu. Nipele, paujo pao muusalile lwala lwaluli paujo pao lukoposye meesi gakwe. Elo, tinlutende lwala lukoposye meesi, kuti mpingo wose wa ŵandu ni ilango yao akombole kung'wa." 9 Kwayele che Musa ŵajawile ni kulujigala alula lubokola kutyochela apala palwaliji paujo pa Lisanduku lya Lilangano mpela Ambuje Akunnungu iŵatite kunlajisya.

10 Che Musa ni che Haluni ŵaasonganyisye mpingo wose paujo pa lwala lo, nombe che Musa ŵaasalile, "Mpikanile mwanya ŵakutindiganya. Ana nkusaka tunkopochesye meesi kutyochela pa lwala lu?" 11 Pelepo che Musa ŵanyakwile nkono ŵakwe ni kuluputa lwala kaŵili ni lubokola lwakwe. Meesi gauliche ni mpingo wose ni ilango yao ŵang'wele. 12 Nambo Ambuje Akunnungu ŵasalile che Musa ni che Haluni kuti, "Pakuŵa ŵanyamwe nganimungulupilila une, namose kuunjimbichisya nti jwanswela paujo pa Ŵaisilaeli, ngamuujinjisya mpingo wu ku chilambo chingwapa." 13 Gelega galiji meesi ga ku Meliba, pamalo pati Ŵaisilaeli ŵaalalatile Ambuje Akunnungu, nombewo ŵalilosisye asyene kuti ali ŵaswela pasikati jawo.

14 Che Musa ŵaatumile ŵantenga kutyochela ku Kadeshi kwaula kwa mwenye jwa ku Edomu achitiji, "Mpwenu Isilaeli akuti nyi: Mmwe nkugamanyilila malagasyo gose gatupatile. 15 Achatati ŵetu ŵatuluchile ku Misili, ni uweji tutemiji kweleko yaka yejinji. Ŵamisili ŵatulagasisye uweji ni achatati ŵetu nombe, 16 nambo patwalilile Ambuje Akunnungu, ŵakupikanile kulila kwetu ni ŵantumile katumetume jwakwe jwa kwinani ni ŵatukopwesye ku Misili. Sambano tuli akuno ku Kadeshi kuno, musi wauli mumpika mwa chilambo chenu. 17 Choonde ntukunde tupite mu chilambo mwenu. Ngatupitila mu ngunda wauli wose, namose migunda ja misabibu; namose ngatung'wa meesi ga isima yenu. Tutupite mu litala lyekulu pe pangali kusepuchila kunchiji atamuno kunlyo, mpaka tuli tukopweche mu chilambo chenu."

18 Nambo mwenye jwa ku Edomu ŵajanjile, "Ngwamba! Ngampita apano; mwalingaga kupita, tutukopoche ni kungunguluchila ni mapanga." 19 Ŵaisilaeli ŵajanjile, "Uweji chitugambe kupita mu litala pe, ni sooni iŵaga uweji pane ilango yetu tutung'we meesi genu, tuchilipila, tukwamba kusosa kupita pe."

20 Ŵandu ŵa ku Edomu ŵajanjile sooni kuti, "Ngatukusaka mpite pelepa." Papopo Ŵaedomu ŵajawile ni ŵangondo wao ŵajinji ni ŵamachili kukwagungumuchila Ŵaisilaeli. 21 Nipele, pakuŵa Ŵaedomu ŵakanile kwaluhusu Ŵaisilaeli kupita mmipika jawo. Ŵaisilaeli ŵagalawiche ni kulikuya litala liine.

22 Ŵaisilaeli wose watyosile ku Kadeshi, waiche ku chitumbi cha Holi. 23 Nipele, Ambuje Akunnungu ŵasalile che Musa ni che Haluni kwele ku chitumbi cha Holi ko, mumpika mwa chilambo cha ku Edomu kuti, 24 "Che Haluni tachiwa; ngaajinjila mu chilambo chati naapele Ŵaisilaeli, ligongo ŵanyamwe ŵanaŵaŵili nganinjitichisya lilajisyo lyangu akula ku Meliba kula. 25 Mwajigale che Haluni ni che Eleasali mwanagwe, mwakwesye ku chitumbi cha Holi. 26 Mwaule che Haluni yakuwala yakwe, mwawasye che Eleasali mwanagwe, che Haluni takawilile kukoko ku chitumbi ko." 27 Che Musa watesile mpela iŵalajichikwe ni Ambuje Akunnungu. Ŵanawose ŵatatu ŵakwesile ku chitumbi akuno Ŵaisilaeli wose achalolechesyaga. 28 Che Musa ŵammusile che Haluni yakuwala ya chimbopesi, ni kummwasya che Eleasali. Nombe che Haluni ŵawilile papopo petumbi po. Nipele che Musa ni che Eleasali ŵatulwiche paasi. 29 Ŵaisilaeli wose paŵaimanyilile kuti che Haluni awile, Ŵaisilaeli wosepe ŵalisile malilo gakwe kwa moŵa selasini.