1 Nipele, Ambuje Akunnungu ŵansalile che Haluni, "Mmwejo achiŵanagweni ni Ŵalawi wose chinjigale ileŵo ya pa Lisakasa lya Kusimanilana kwaligongo lya Akunnungu, iyoyo peyo mmwe ni achiŵanaŵenu jikape ni uchinjigale ileŵo pa utumichile wa chimbopesi. 2 Mwaichisye achiŵana ŵenu ni uŵelesi wenu wose atumichile kuŵa ŵambopesi; achalongo ŵenu ŵane wa lukosyo lwa Ŵalawi tatende masengo pamo ni mmwe paujo pa Lisakasa lya Kusimanilana kwaligongo lya Akunnungu. 3 Tatende masengo gachimwape ni masengo gose ga pa Lisakasa. Nambo ng'oo ngasaikwaya yoombo yeswela ya mu Lisakasa namose kuchiŵandichila chilisa ngakaŵa tawe ni ŵanyamwe nombe timmwe. 4 Talumbikane ni mmwe mmasengo ni kugatenda masengo ga kugosa Lisakasa lya Kusimanilana, yaani masengo gose ga mu Lisakasa ni ngasapagwa mundu jwine jutakombole kuŵandichila pele patimpanganye masengo. 5 Mmwe ni achiŵana ŵenu pe tintende masengo ga peuto papaswela ni pachilisa, kuti uchimwa wangu ukaatyochela sooni Ŵaisilaeli. 6 Uneji ni junaasagwile achalongo ŵenu Ŵalawi pasikati ja Ŵaisilaeli nti ntuuka kukwenu. Ŵanyawo aŵichikwe pajika kwa ligongo lyangu une Ambuje Akunnungu, kuti apanganye masengo mu Lisakasa lya Kusimanilana kwaligongo lya Akunnungu. 7 Nambo mmwe jikape ni achiŵana wenu tintende masengo gose ga umbopesi kwa ligongo lya chilisa ni indu yose yaili peuto papaswela nnope. Ngumpa utumichile wa chimbopesi nti ntuuka. Mundu jwalijose jutaŵandichile peuto papaswela aulajikwe."

8 Ambuje Akunnungu ŵaasalile che Haluni, "Ngumpa indu yose yatyosisye Ŵaisilaeli mbopesi kukwangu; indu yose yambele Ŵaisilaeli iŵe yangu ngumpa mmwe ni uŵelesi wenu iŵe yenu mu ndamo syenu moŵa gose pangali mbesi. 9 Pasikati ja indu yaityosekwe kukwangu yangaikutiniswa pa mooto, yele tiiŵe yenu. Mbopesi sya utandi ni mbopesi syakutyosya sambi ni mbopesi sya kugopola nasili ni ilumbilo. Kila chindu tichambelechele ŵandu nti mbopesi jeswela tichiŵe chenu ni achiŵana ŵenu. 10 Tinchilya indu yo nti indu yeswela yaani ityochekwe kukwangu, achalume pe ni utachilya, indu yo pakuŵa ili yeswela nnyichimbichisye nti indu yaityosekwe kukwangu."

11 "Nombe indu ine yose itambelechele Ŵaisilaeli nti mbopesi ja kunyakula, tiiŵe yenu. Ngumpa mmwe, achiŵana ŵenu ni achiŵali ŵenu iŵe yenu moŵa gose. Mundu jwalijose mu ulongo wenu jwakukundikwa kwa kupopelela akukombola kulya indu yo."

12 "Milimbu jose jaakumbelechela Ŵaisilaeli gumpa mmwe; iŵeje mauta ga seituni gambone ni divai jasambano jambone ni utandi. 13 Milimbu jose ja mu chilambo tijiŵe jenu. Kila mundu jwakukundikwa kwa kupopelela jwali mu ulongo wenu akukombola kulya."

14 "Kupunda ni yeleyo kila chindu chachityosekwe kukwangu pa chilambo cha ku Isilaeli chichiŵe chenu."

15 "Kila jwakwitiwo jutambelechele Ŵaisilaeli, aŵaga mwanache jwaandanda kupagwa kwa mundu pane chinyama taŵe ŵenu. Nambo Ŵaisilaeli akusachilwa kwawombola ŵakwitiwo wose ni kila chipago chandanda cha inyama yangaikukundikwa kwa kupopelela. 16 Ŵanache ŵao ŵakwitiwo tinchawombola aŵaga ni lisusa lya mwesi umo kwa kwalipila ipande nsano ya madini ga feza, malinga ni ipimo yaiŵichikwe mu Lisakasa lya Kusimanilana. 17 Nambo ipago yandanda ya ng'ombe, ngondolo pane mbusi nkaawombola, ŵele atyosekwe kukwangu une ni ali kwaligongo lya mbopesi. Miasi jao tinjitile pa chilisa ni mauta gao tingatinisye gaŵe mbopesi ja kutinisya jajikununjila yambone jajikuunonyelesya une Ambuje Akunnungu. 18 Nyama jao nkukombola kulya, mpela inkuti kulya chidali ni chiiga cha kunyuma cha kundyo yaikutyosekwa kwaligongo lya mbopesi jakunyakula."

19 "Ngumpa mmwe, ni achiŵana ŵenu ni achiŵali ŵenu, indu yose yaakundyochesya une Ŵaisilaeli, yele chiiŵe yenu moŵa gose. Lyele lili lilangano lya moŵa gose pangali mbesi linguliŵika kwa ligongo lyenu ni iŵelesi yenu."

20 Ambuje Akunnungu ŵansalile che Haluni, "Mmwe ngampegwa malo jajilijose jichijiŵe jenu mu chilambo cha Ŵaisilaeli, tinjimpa chachilichose chinkuchisaka mu ndamo syenu, une ndili Ambuje Akunnungu."

21 Ambuje Akunnungu ŵajendelechele kusala kuti, "Ŵalawi napele maunjili ga kakumi gose gaakundyochesya Ŵaisilaeli gaŵe gawo. Gele tigaŵe malipilo gawo kwa masengo gaakugatenda kwa kuligosa Lisakasa lyangu lya Kusimanilana. 22 Ni kutandilila sambano Ŵaisilaeli akaŵandichila Lisakasa lya Kusimanilana kwaligongo lya Akunnungu akaika kutenda sambi ni kuliichisya chiwa. 23 Nambo Ŵalawi jika pe ni utapanganye masengo ku Lisakasa lya Kusimanilana kwaligongo lya Akunnungu, ni yangalumbana yaili yose ichiityochele chajamuchikwe achinsyene. Lyele lili lilajisyo lya moŵa gose mu iŵelesi yenu yose. Ŵalawi ngaakola ipanje yachiiŵe yao achinsyene mu chilambo cha Isilaeli. 24 Pakuŵa maunjili ga kakumi gose gachambelechele Ŵaisilaeli naapele gaŵe gao. Lyele ni ligongo lyakuti ŵanyawo ngaakola malo jitijiŵe jawo achinyene pasikati ja Ŵaisilaeli."

25 Nipele, Ambuje Akunnungu ŵansalile che Musa, 26 Sooni timwasalile Ŵalawi malajisyo ga, "Katema katachipochela maunjili ga kakumi gampele Ambuje Akunnungu kutyochela kwa Ŵaisilaeli gaŵe genu, tachindyochesya une Ambuje Akunnungu liunjili limo mwa gele maunjili kumi go. 27 Mbopesi ji tijiŵalanjikwe kuŵa yalumo ni milimbu ja utandi pane mpela divai jasambano jaakundyochesya jwakulima. 28 Nipele yele ni itimundyochesye une Ambuje Akunnungu mbopesi sya maunjili ga kakumi gatimpochele kutyochela kwa Ŵaisilaeli. Liunjili lya kakumi lyatimundyochesye une Ambuje Akunnungu timwape jwambopesi che Haluni. 29 Malinga ni yose itimpochele, timumbelechele une Ambuje Akunnungu liunjili lya kakumi lyalili lyambone kupunda gose ni lyeswela. 30 Kwayele timwaasalile: Patintyosye liunjili lyambone kupunda gose, liunjili lyatilisigalile tiliŵe lyenu, mpela yaili kwa jwakulima akujigala chachisigalile pakumala kutyosya mbopesi syakwe sya milimbu ja utandi ni divai. 31 Ni ŵanyamwe ni achalongo ŵenu tinlye chachisigalile papali pose, pakuŵa uli ntulilo wenu, kwa ligongo lya masengo genu ga ku Lisakasa lya Kusimanilana kwaligongo lya Akunnungu. 32 Ngankola chilewo chilichose mwalyaga indu yo, naga muntyochesye Ambuje Akunnungu liunjili lyalili lyambone kupunda gose, nkaitenda ikanikwe ni Ambuje Akunnungu indu yeswela ya Ŵaisilaeli, ni ŵanyamwe ngammwa."