1 Awu uli uŵelesi u che Haluni ni che Musa katema Ambuje Akunnungu paŵakungulwiche ni che Musa pa chitumbi cha Sinai. 2 Gelega ni meena ga ŵanache ŵa che Haluni: Che Nadabu jwakwitiwo jwakwe, che Abihu ni che Eleasali ni che Itamali. 3 Gelega ni meena ga ŵanache ŵa che Haluni ŵaŵasagulikwe kwa kwajitilila mauta kuti aŵe ŵambopesi. 4 Nambo che Nadabu ni che Abihu ŵawile paujo pa Ambuje Akunnungu paŵantyochesyaga Ambuje Akunnungu mbopesi kwa mooto wangakundikwa paujo pakwe ku chipululu cha Sinai. Ŵanyawo nganakola ŵanache, kwa yele che Eleasali ni che Itamali pe ŵatumikaga nti ŵambopesi katema ka umi wa che Haluni atati ŵao.

5 Ambuje Akunnungu ŵaasalile che Musa, 6 "Mwaichisye ŵandu ŵa lukosyo la Ŵalaŵi kwa jwambopesi che Haluni kuti ŵakamuchisye masengo. 7 Tapanganye masengo kwaligongo lyakwe ni kwaligongo lya ŵandu wose pa Lisakasa lya Kusimanilana kwaligongo lya Akunnungu, pakutumichila mu Lisakasa. 8 Tachigosa yoombo yose ya mu Lisakasa ni kupanganya masengo pamalo pa Ŵaisilaeli. 9 Nombe chimwape che Haluni ni achiŵanagwe Ŵalawi wose, ŵelewo ni Ŵaisilaeli ŵatiŵapanganyichisye masengo che Haluni ni achiŵanagwe. 10 Chimwaŵiche che Haluni ni achiŵanagwe kwa ligongo lya Ambuje kuti atende masengo ga umbopesi; nambo mundu jwalijose jwine jutaŵandichile peuto papaŵichikwe kwaligongo lyangu tachiulajikwa."

11 Ambuje Akunnungu ŵajendelechele kwasalila che Musa, 12 "Naasagwile Ŵalawi pasikati ja Ŵaisilaeli wose, pamalo pa kila jwakwitiwo jwa chilume pa kila nnango wa Ŵaisilaeli. Ŵalawi ali ŵangu, 13 pakuŵa ŵakwitiwo wose pa Isilaeli ali ŵangu. Panauleje ŵakwitiwo kwele ku Misili, naatyosisye kwaligongo lyangu ŵakwitiwo ŵa pa Isilaeli; kila mwanache jwakwitiwo jwa mundu pane chinyama; tachiŵa jwangu. Une ndili Ambuje Akunnungu."

14 Kanyuma Ambuje Akunnungu ŵasalile che Musa ku chipululu cha Sinai kuti, 15 "Mwaŵalanje ŵana ŵa che Lawi wose malinga ni mitundu jao ni ulongo wao, kila jwannume kutandilia ŵanache ŵa mwesi umo ni kupunda." 16 Kwayele, che Mose ŵaŵalasile mpela Ambuje Akunnungu iŵatite pakwalajisya.

17 Aŵaŵa ni ŵaŵaliji ŵanache ŵa che Lawi: Che Gelishoni ni che Kohati ni che Melali. 18 Mena ga ŵanache ŵa che Gelishoni malinga ni mitundu jawo: Che Libini ni che Shimei. 19 Ŵanache ŵa che Kohati malinga ni mitundu jawo: Che Amulamu ni che Ishali ni che Hebuloni ni che Usieli. 20 Ŵanache ŵa che Melali malinga ni mitundu jawo: Che Mahili ni che Mushi. Ŵele ŵaliji ngosyo sya Ŵalaŵi malinga ni minango jao.

21 Kwaliji ni mitundu ja Ŵalibini ni Ŵashimei jijatyochele ni che Gelishoni; Jeleji ni jijaliji mitundu ja Ŵagelishoni. 22 Achalume wose ŵaŵaliji ni mwesi umo pane kupunda ŵaŵaŵalanjikwe ŵaliji elufu saba na mia tano. 23 Mitundu ja Ŵagelishoni jasachilwe kuŵika chigono chawo cha kulikuswelela lyuŵa panyuma pa Lisakasa lya Kusimanilana kwaligongo lya Akunnungu. 24 Chilongola jwa Ŵagelishoni ŵaliji che Eliasafu mwana jwa che Laeli. 25 Masengo ga ŵanache ŵa che Gelishoni galiji kuligosa Lisakasa lya Akunnungu, lisakasa pamo ni chiunichilo chakwe ni nguo ja lusasa ja pannango wa Lisakasa lya Kusimanilana kwaligongo lya Akunnungu, 26 nguo sya lusasa sya lutenje lwaluli pasikati ja Lisakasa lya Kusimanilana ni chilisa, ni nguo ja lusasa ja pa nnango wa lutenje ni ngonji syakwe ni kila chindu chichasachikwe kwa kupanganyichisya masengo gakwe.

27 Mitundu ja Ŵaamlami ni Ŵaishali ni Ŵahebuloni ni Ŵausieli jatyochele ni che Kohati; Jele ni jijaliji mitundu ja Ŵakohati. 28 Malinga ni iŵatite kuŵalanjikwa achalume wose kutandilila ŵaali ni lisusa lya mwesi umo ni kupunda ŵaliji ŵandu elufu nane na mia sita, ŵaŵatumikaga kupagosa peuto papaŵichikwe kwaligongo lya Akunnungu. 29 Mitundu ja ŵanache ŵa che Kohati ŵasachilwe kuŵika chigono chao cha kulujenda kwa Lisakasa lya Akunnungu, 30 nombe che Elisafani mwanache jwa che Usieli ŵaliji chilongola jwa mitundu ja Ŵakohati. 31 Masengo gao galiji kuligosa lisanduku lya lilangano, mesa jakuŵichila mikate, ni chindu chakuŵichila lumuli ni chilisa pamo ni yoombo yaikutumika peuto papaŵichikwe kwaligongo lya Akunnungu ni lipasia, ni kila chindu chichasachikwe kwa ligongo lya kutumichila.

32 Chilongola jwankulu jwa Ŵalawi ŵaliji che Eleasali mwanache jwa jwambopesi che Haluni. Ŵaŵichikwe kuŵa jwankulu jwa ŵakutumika kupagosa peuto papaswela.

33 Kutyochela ni che Melali kwaliji ni mitundu ja Ŵamahili ni Ŵamushi; jeleji ni mitundu ja Ŵamelali. 34 Achalume wose ŵaali ni lisusa lya chaka chimo pane kupunda ŵaŵaŵalanjikwe ŵaliji elufu sita na mia mbili. 35 Chilongola jwa mitundu ja Melali ŵaliji che Sulieli mwana jwa Abihaili; ŵanyaŵa ŵasachilwe kuŵika chigono chao chakumpoto kwa Lisakasa lya Kusimanilana kwaligongo lya Akunnungu. 36 Ŵanyawo ŵaapele masengo ga kugosa felemu sya Lisakasa lya Akunnungu, ni mitambalapanya, sichi ni itamichilo ni indu yose ya kukamulila lisakasa; ni kila masengo gagasachilwe kupanganyikwa ni indu yo. 37 Nombe ŵasachilwe kugosa sichi sya lutenje sisyasyungwile ni itamichilo yakwe pamo ni igingi ya lisakasa ni ngonji syakwe.

38 Che Musa ni che Haluni ni ŵanache ŵao ŵasachilwe kuŵika chigono chao paujo pa Lisakasa lya Akunnungu chakungopochelo lyuŵa chichilolaga kwalikukopoka lyuŵa. Masengo gao galiji kwimilila masengo gose gagatendekwe peuto papaŵichikwe kwaligongo lya Akunnungu kwa ligongo lya Ŵaisilaeli. Mundu jwine jwalijose juŵasejele peuto papaŵichikwe kwaligongo lya Akunnungu ŵaulajikwe. 39 Ŵalawi wose malinga ni ulongo wao, achalume wose kutandilila ŵanache ŵaali ni mwesi umo ni kupunda, ŵati che Musa ni che Haluni ŵaŵalasile kwa lilajisyo lya Ambuje Akunnungu ŵaliji ŵandu elufu ishilini na mbili.

40 Nipele Ambuje Akunnungu ŵaasalile che Musa, "Mwaŵalanje ŵakwitiwo ŵachilume wose ŵa Ŵaisilaeli kutandilila ŵaali ni mwesi umo ni kupunda. 41 Timwaŵiche pajika Ŵalawi kwaligongo lyangu pamalo pa ŵakwitiwo ŵa Ŵaisilaeli, nombe ilango ya Ŵalawi pamalo pa kila chiŵelesi chandanda cha inyama ya Ŵaisilaeli. Uneji ndili Ambuje Akunnungu." 42 Nipele che Musa ŵajitichisye, ŵaŵalasile ŵakwitiwo wose ŵa ŵandu ŵa Isilaeli mpela Ambuje Akunnungu iŵatite pakwalajisya 43 ŵakwitiwo ŵa chilume ŵaali ni lisusa lya mwesi umo ni kupunda, ŵaŵalembekwe kwa meena gawo ŵaliji ŵandu elufu ishilini na mbili na mia mbili na sabini na tatu.

44 Ambuje Akunnungu ŵasalile che Musa, 45 "Sambano mwatende aŵe ŵangu Ŵalawi wose pamalo pa ŵakwitiwo ŵa Ŵaisilaeli. Iyoyo peyo mwatende aŵe ŵangu ilango ya Ŵalawi wose pamalo pa iŵelesi yandanda kupagwa ya ilango ya Ŵaisilaeli, Une ndili Ambuje Akunnungu. 46 Sooni kwa kwawombola ŵakwitiwo mia mbili sabini na tatu ŵa Ŵaisilaeli, ŵati apundile winji wa Ŵalawi, 47 timpochele kwa kila jwannume ipande nsano ya madini ga feza malinga ni chipimo cha peuto papaŵichikwe kwaligongo lya Akunnungu. 48 Mwape che Haluni ni achiŵanagwe mbiya syo kwa ligongo lya kwawombola Ŵaisilaeli ŵapundile." 49 Kwayele che Musa ŵasongangenye feza sya chiwombolo kutyochela kwa aŵala ŵandu ŵaŵapundile aŵala ŵaŵawombolekwe ni Ŵalawi. 50 Ŵapochele kutyochela kwa ŵanache ŵa kwitiwo ŵa Ŵaisilaeli, madini ga feza ipande ya shekeli elufu moja na mia tatu na sitini na tano, malinga ni chipimo cha peuto papaŵichikwe kwaligongo lya Akunnungu, 51 ŵaapele che Haluni ni achiŵanagwe feza sya kuwombolela syo mpela Ambuje Akunnungu iŵatite kwalajisya che Musa.