1 Pa lyuŵa limo achiŵali nsano ŵa che Selofehadi, yaani che Mala ni che Noa ni che Holiga ni che Milika ni che Tilisa ŵanjaulile che Musa. Che Selofeadi ŵaliji mwana jwa che Hefeli mwana cha che Gileadi mwana jwa che Makili mwana jwa che Manase, jwa ntundu wa Manase mwana jwa che Yusufu. 2 Achiŵali wo ŵaiche ni kwima pannango wa Lisakasa lya Kusimanilana paujo pa che Musa ni jwambopesi che Eleasali ni ilongola wosepe ŵa Ŵaisilaeli, ni Ŵaisilaeli wose ŵaliji pelepo. Ŵatite, 3 "Atati ŵetu ŵaŵilile ku chipululu ni nganaleka mwanache jwalijose jwannume. Nganaŵa mu mpingo wa ŵandu ŵaŵankuyaga che Kola ŵaŵakamulangene ni kwakanila Ambuje Akunnungu, nambo ŵawile kwaligongo lya sambi jakwe nsyene. 4 Ana liina lya atati ŵetu liwe ligongo nganakola mwanache jwannume? Ntupeje malo jetu pasikati ja achalongo achinjakwe atati ŵetu."

5 Che Musa ŵagapeleche magambo ga paujo pa Ambuje Akunnungu. 6 Ambuje Akunnungu ŵasalile che Musa, 7 "Ŵanache ŵa che Selofehadi wo chakuŵecheta cho chili chisyene; mwape malo pasikati pa alongo achinjakwe atati ŵawo. Mwape jwalijose malo jakwe jijikaliji ja atati ŵao. 8 Nipele mwasalile Ŵaisilaeli kuti mundu jwalijose awaga pangaleka mwanache jwannume, mwali jwakwe tapegwe malo jijaliji ja atatigwe. 9 Iŵaga nganakola mwanache jwankongwe, achapwakwe achalume apegwe malo jo kuti jiŵe jao. 10 Ni iŵaga nganakola achapwakwe achalume, nipele achapwakwe ŵa atatigwe apegwe malo jo kuti jiŵe jao. 11 Ni iŵaga atatigwe wo nganakola achapwakwe, nipele nlongo njakwe ŵa liŵasa limo apegwe malo jo jiŵe jakwe chisyenesyene. Lyeleli lili lilajisyo limo mu malajisyo gose kwa Ŵaisilaeli. Ŵaisilaeli agakamulichisye malajisyo ga ni makanyo ga mpela une Ambuje Akunnungu munanlamulile mmwejo."

12 Ambuje Akunnungu ŵasalile che Musa kuti, "Nkwele penani pa achi chitumbi cha Abalimu nipele nkachilole chilambo chinaapele Ŵaisilaeli. 13 Mwamalaga kuchilola, mmwe nombe tinchiwa mpela muŵatendele akulu ŵenu che Haluni, 14 ligongo ŵanyamwe nganinjitichisya malajisyo gangu akula ku chipululu cha Sini kula. Katema mpingo wosepe wa ŵandu paŵalalatile nkati une akula ku Meliba, nganinleka ukulu wangu uloleche paujo pao paŵasachile kuti apegwe meesi." Meliba jili nduluko ja meesi jili ku Kadeshi mchipululu cha Sini.

15 Nombe che Musa ŵapopelele Ambuje Akunnungu kuti, 16 "Alakwe Ambuje Akunnungu, Akunnungu unkwapa ŵandu umi, ngummenda munsagule mundu jutachajimilila ŵandu ŵa, 17 jutachalongolela ni kwalongosya mmasengo gawo gose, kuti akaika kuŵa mpela ngondolo syangali ni jwakuchinga."

18 Ambuje Akunnungu ŵaasalile che Musa kuti, "Munjigale che Yoshua mwanache jwa che Nuni, mundu jwakwete mbumu jwangu munkati mwakwe, nipele munsajichile makono, 19 ni kunjimika paujo pa jwambopesi che Eleasali ni Ŵaisilaeli wose, nipele mwape masengo go wosepe ali nkulola. 20 Mwape ulamusi wenu kanandi kuti Ŵaisilaeli wose ampikanileje. 21 Jwelejo tachinkulupilila che Eleasali jwambopesi, jutachimmanyisya indu inguisaka kwa litala lya liganga lya Ulimu ni Tumimu. Kwa litala li, che Eleasali tachalongosya che Yoshua ni Ŵaisilaeli wose mu ipanganyo yao yose." 22 Che Musa ŵatesile mpela muŵalamulikwe ni Ambuje Akunnungu. Ŵanjigele che Yoshua ni kunjimika paujo pa jwambopesi che Eleasali ni paujo pa Ŵaisilaeli wose. 23 Nipele ŵansajichile makono pantwe ni kwapa ulamusi wakwalongosya Ŵaisilaeli mpela iŵalajichikwe ni Ambuje Akunnungu.