1 Pa lyuŵa lyaandanda lya mwesi wa saba, tinsongangane kwapopelela Ambuje Akunnungu. Nkatenda masengo. Lyelelyo lili lyuŵa lyakugomba mapenga. 2 Timpeleche mbopesi jakutinisya, ununjile wakwe tiwanonyelesye Ambuje Akunnungu: Ng'ombe syangakomala siŵili, ni ngondolo syankambaku siŵili ni ngondolo syankambaku saba sya chaka chimo, wosepe aŵeje ŵangalemala kose. 3 Sooni timpeleche mbopesi jakwe ja utandi wambone wewanganye ni mauta ga miseituni: Kilo sitatu pa kila ngombe ni kilo siŵili pa kila ngondolo, 4 ni kilo jimo pa kila ngondolo jimo pa ngondolo saba sila. 5 Sooni timpeleche mbusi tonde jimo jiŵe mbopesi jakutyosya sambi kuti ampanganyichisye ujilanyo. 6 Timpeleche ayi indu yi pangaliŵalila ni ajila mbopesi jakutinisya ja kila mwesi ni mbopesi jakwe ja yakulya, ni mbopesi jakutinisya ja kila lyuŵa pamo ni mbopesi jakwe ya yakulya ni mbopesi syakwe sya yakungwa mpela yaikuti kusachilwa jiŵe ununjile wambone wakunonyelesya, ni mbopesi kwa Ambuje Akunnungu jajitinichikwe pa mooto.

7 Pa lyuŵa lya kumi lya mwesi wa saba tinsongangane kwapopelela Ambuje Akunnungu. Pa lyuŵa lyo ntaŵeje ni sooni nkapanganya masengo galigose. 8 Timwapeleche Ambuje Akunnungu mbopesi jakutinisya pa mooto, ununjile wakwe tiwanonyelesye Ambuje Akunnungu: Ng'ombe nkambaku jimo jangakomala, ni ngondolo jankambaku jimo ni ngondolo syankambaku saba sya chaka chimo. Ŵanawose aŵeje ŵangalemala kose. 9 Pamo ni yele indu yo, timwapelechele mbopesi ja utandi wambone kilo sitatu wewanganye ni mauta ga miseituni pamo ni ng'ombe nkambaku jila, kilo siŵili pamo ni ajila ngondolo jankambaku jimo jila, 10 ni kilo jimo pa kila ngondolo kwa ngondolo saba sila. 11 Sooni timpeleche mbusi tonde jimo kwaligongo lya mbopesi jakutyosya sambi pamo ni ajila mbopesi jakutendelwa ujilanyo, pamo ni mbopesi ja kila lyuŵa ja kutinisya ni mbopesi jakwe ja utandi ni mbopesi syakwe sya yakung'wa.

12 Pa lyuŵa lya kumi na tano lya mwesi wa saba, tinsongangano kwapopelela Ambuje Akunnungu. Nkatenda masengo pa lyuŵa lyo. Ntendeje chindimba chakwachimbichisya Ambuje Akunnungu kwa moŵa saba. 13 Timwapelechele mbopesi jakutinisya pa mooto, ununjile wambone waukwanonyelesya Ambuje Akunnungu: Ng'ombe mikambaku syangakomala kumi na tatu, ni ngondolo syankambaku siŵili ni ngondolo syankambaku kumi na nne sya chaka chimo. Syosepe siŵeje syangalema kose. 14 Pamo ni asila ng'ombe syankambaku kumi na tatu sila, pa kila ng'ombe jityosyekwe ni mbopesi ja utandi wambone wewanganye ni mauta: Kilo sitatu pa kila ngombe nkambaku umo, ni kilo siŵili pa kila ngondolo jimo, 15 ni kilo jimo pa kila ngondolo kwa asila ngondolo kumi na nne sila. 16 Sooni timwapelechele mbusi tonde jimo jiŵe mbopesi jakutyosya sambi, pangajiliŵalila ajila mbopesi ja kila lyuŵa jakutinisya jila, pamo ni mbopesi jakwe ja utandi ni mbopesi jakwe ja yakung'wa.

17 Pa lyuŵa lyaŵili lyakwe timpeleche Ng'ombe mikambaku syangakomala kumi na mbili, ni ngondolo syankambaku siŵili, ni ngondolo syankambaku kumi na nne sya chaka chimo, syosepe syo syangalemala. 18 Sooni timpeleche mbopesi ja utandi ni mbopesi sya yakung'wa pamo ni asila ng'ombe, ni ngondolo syankambaku siŵili sila ni ngondolo syankambaku kumi na nne sya chaka chimo sila, 19 tintyosye mbusi tonde jimo kwaligongo mbopesi jakutyosya sambi pagaliŵalila ajila mbopesi jakutinisya ja kila lyuŵa pamo ni mbopesi jakwe ja utandi ni mbopesi jakwe ja yakung'wa.

20 Pa lyuŵa lyaatatu timpeleche: Ng'ombe mikambaku kumi na moja ni ngondolo syankambaku siŵili ni ngondolo syankambaku kumi na nne sya chaka chimo, syosepe syangalemala. 21 Timpeleche pamo ni mbopesi ja utandi ni mbopesi sya yakung'wa malinga ni uŵalanjikwe wao mpela yaikuti kulajiswa. 22 Iyoyo peyo timpeleche mbusi tonde jimo kwaligongo lya mbopesi jakutyosya sambi, pangaliŵalila mbopesi ja kila lyuŵa ja kutinisya pamo ni mbopesi jakwe ja utandi ni mbopesi jakwe ja yakung'wa.

23 Pa lyuŵa lya ncheche timpeleche: Ng'ombe mikambaku kumi ni ngondolo syankambaku siŵili ni ngondolo syankambaku kumi na nne sya chaka chimo, syosepe syangalemala. 24 Sooni timpeleche mbopesi ja utandi ni mbopesi ja yakung'wa pamo ni syele ng'ombe ni ngondolo siŵili ni ngondolo syankambaku kumi na nne, mpela yaikuti kulajiswa. 25 Sooni timpeleche mbusi tonde jimo kwaligongo lya mbopesi ja jakutyosya sambi pangaliŵalila mbopesi ja kila lyuŵa jakutinisya ni mbopesi jakwe ja utandi ni mbopesi jakwe ja yakung'wa.

26 Pa lyuŵa lyansano timpeleche ng'ombe mikambaku tisa, ngondolo syankambaku siŵili ni ngondolo syankambaku kumi na nne sya chaka chimo, syosepe siŵeje syangalemala. 27 Sooni timpele mbopesi ja utandi ni mbopesi ja yakung'wa pamo ni syele ngombe ni ngondolo siŵili ni ngondolo kumi na nne malinga ni uŵalanjikwe wao mpela yaikuti kulajiswa. 28 Iyoyo peyo timpeleche mbusi tonde jimo kwaligongo lya mbopesi jakutyosya sambi, pangaliŵalila ni ajila mbopesi jakutinisya ja kila lyuŵa ni mbopesi jakwe ja utandi ni mbopesi jakwe ja yakung'wa.

29 Pa lyuŵa lya sita timpeleche ng'ombe mikambaku nane, ni ngondolo syankambaku siŵili ni ngondolo syankambaku kumi na nne sya chaka chimo, syosepe siŵeje syangalema. 30 Iyoyo peyo timpeleche mbopesi ja utandi ni mbopesi ja yakung'wa pamo ni syele ng'ombe ni ngondolo siŵili ni ngondolo kumi na nne sya chaka chimo sila, malinga ni uŵalanjikwe wao mpela yaikuti kulajiswa. 31 Sooni timpeleche mbusi tonde jimo kuŵa mbopesi jakutyosya sambi, pangaliŵalila ni mbopesi jakwe ja utandi ni mbopesi jakwe ja yakung'wa.

32 Pa lyuŵa lya saba timpeleche ng'ombe mikambaku saba ni ngondolo syankambaku siŵili, ni ngondolo syankambaku kumi na nne sya chaka chimo, syosepe siŵeje syangalemala. 33 Sooni timpeleche mbopesi ja utandi ni mbopesi ja yakung'wa pamo ni syele ng'ombe syo ni ngondolo syankambaku siŵili ni ngondolo syankambaku kumi na nne sya chaka chimo malinga ni uŵalanjikwe wao mpela yaikuti kulajiswa. 34 Sooni timpeleche mbusi tonde jimo jiŵe mbopesi ja sambi, pamo ni ajila mbopesi ja kila lyuŵa jakutinisya, pangaliŵalila mbopesi jakwe ja utandi ni mbopesi jakwe ja yankung'wa.

35 Pa lyuŵa lya nane tintende nsongangano wekulungwa wa kwapopelela Ambuje Akunnungu. Nkatenda masengo pa lyuŵa lyo. 36 Timpeleche mbopesi jakutinisya ununjile wambone waukwanonyelesya Ambuje Akunnungu: Ng'ombe jankambaku jimo, ni ngondolo jankambaku jimo, ni ngondolo syankambaku saba sya chaka chimo, syosepe siŵeje syangalemala. 37 Sooni timpeleche mbopesi ja utandi ni mbopesi ja yakung'wa pamo ni ngombe ni ngondolo jimo jo ni asila ngondolo syankambaku saba, malinga ni uŵalanjikwe wao mpela yaikuti kulajiswa. 38 Sooni timpeleche mbusi tonde jimo jiŵe mbopesi jakutyosya sambi, pamo ni ajila mbopesi ja kutinisya ja kila lyuŵa pangaliŵalila mbopesi jakwe ja utandi ni mbopesi jakwe ja yakung'wa.

39 Gelega ni malajisyo gankati mbopesi syakutinisya, mbopesi sya utandi ni mbopesi sya chitendewele tisimwapelechele Ambuje Akunnungu pa katema ka indimba yenu yepanje. Pamo ni syele mbopesi syose syo, sipali mbopesi syakutinisya ni sya utandi ni sya yakung'wa, sinkwapelechela Ambuje Akunnungu kukwanilisya nasili syenu ni mbopesi syenu sinkupeleka kwakusaka kwenu. 40 Nipele che Musa ŵaasalile ŵandu ŵa ku Isilaeli kila chindu mpela Ambuje Akunnungu iŵatite pakwasalila.