1 Ŵaisilaeli ŵatandite ulendo sooni, ŵajawile kuŵika chigono chao mu iŵata ya ku Moabu, chakungopochelo lyuŵa kwa lusulo lwa Yolodani, kulolegana ni musi wa ku Yeliko. 2 Mwenye jwa ku Moabu, che Balaki mwanache jwa che Sipoli, paŵapilikene indu yose iŵaitesile Ŵaisilaeli kwa Ŵaamoli, 3 jwalakwe jo pamo ni ŵandu ŵakwe wose ŵajogwepe kwannope kwaligongo lya Ŵaisilaeli. Ŵajogwepe kwannope kwaligongo lya winji wao. 4 Nipele Ŵamoabu ŵaasalile ilongola ŵa ku Midiani, "Au mpingo wu pangakaŵa tiujonanje kila chindu chachikutusyungula nti ng'ombe nkambaku yajikuti kulya manyasi mmigunda." Kwayele mwenye che Balaki mwanache jwa che Sipola juŵaliji mwenye jwa ku Moabu pa kele katema ko, 5 ŵaatumile ŵantenga kwa che Balaamu, mwanache jwa che Beoli, juŵaliji kwele ku Petoli, chiŵandika ni lusulo lwa Efulate, chilambo cha ku Amawi. Ŵaasalile kuti, "Apali ŵandu ŵajinji atyosile ku Misili, ajenele palipose mu chilambo, nombewo akusaka kuchijigala chilambo changu. 6 Njise sambano mwalwesye ŵandu ŵa kwaligongo lyangu, pakuŵa akwete machili ga kuumbunda une. Panepa tingombole kwapunda ni kwatopola akajinjila mu chilambo changu, ligongo nguimanyilila kuti mmweji mwampaga upile mundu akukola upile, mwanlwesyaga mundu akulweseka."

7 Nipele, achakulu ŵa ku Moabu ni ku Midiani ŵajawile kwa che Balaamu ali ajigele malipilo ga masengo ga kulwesya go, ni ŵansalile utenga wa che Balaki ula. 8 Che Balaamu ŵaasalile kuti, "Ngonanje kunokuno chilo chino, ni une tinammanyisye itaasalile Ambuje Akunnungu." Nipele achakulu ŵa ku Moabu ŵala ŵagonile ku che Balaamu chilo cho.

9 Nipele Akunnungu ŵammusisye che Balaamu, "Ana aŵa ŵandu ŵali pamo ni mmwe ŵa ali achiŵani?" 10 Che Balaamu ŵajanjile Akunnungu kuti, "Che Balaki mwanache jwa che Sipoli, mwenye jwa ku Moabu, ambelechele utenga waukuti, 11 kwana ŵandu atyosile ku Misili, nombe ajenele palipose mu chilambo. Amendile nyaule ngaalwesye ŵandu wo kuti panepa chakombole kuputana nawo ni kwatopola."

12 Nambo Akunnungu ŵasalile che Balaamu kuti, "Nkajaula pampepe nawo aŵa ŵandu ŵa, namose ngasimwalwesya ŵele Waisilaeli, ligongo une napele upile."

13 Nipele, kundawi kwakwe che Balaamu ŵaasalile achakulu wa che Balaki kuti, "Mmujangane mu chilambo chenu, ligongo Ambuje Akunnungu ngakusaka kuunechelela nyaule pamo ni ŵanyamwe." 14 Kwayele achakulu ŵa ku Moabu ŵatyosile, ŵausile kwa che Balaki, ŵansalile kuti, "Che Balaamu akanile kwika akuno pamo ni uwe."

15 Nipele, che Balaki ŵaatumile achakulu ŵane, achajinji kwannope ni ŵakwete yeo yekulungwa kwapunda ŵaandanda ŵala. 16 Ŵaiche kwa che Balaamu, ŵansalile kuti, "Che Balaki mwanache jwa che Sipoli akuti yelei: ‘Choonde pakapagwa chindu chine chilichose chakwalekasya kuti akaika kwa une; 17 pakuŵa une tinjimpa mmwejo chipanje chekulungwa ni kwatendelela chilichose chitachisala. Choonde njise kuti mwalwesye aŵa ŵandu ŵa kwaligongo lyangu.’"

18 Nambo che Balaamu ŵaajanjile achakulu wa che Balaki kuti, "Atamose che Balaki akambele nyuumba jakwe jili jigumbele feza ni sahabu, uneji ngangombola kuleka kupikanila makanyo ga Ambuje Akunnungu, Akunnungu ŵangu, pa chindu chilichose, chiŵeje chamwana pane chekulungwa. 19 Nambo choonde ngonanje apano chilo chino mpela achinjenu ŵala, ni une tinole iŵaga pana chindu chilichose chakuti aasalile Ambuje Akunnungu."

20 Chilo chila Ambuje Akunnungu ŵanjaulile che Balaamu, ŵansalile kuti, "Iŵaga ŵandu ŵa aiche kummilanga, nnongane nawo, nambo nkatende achila pe chitingansalile une." 21 Che Balaamu ŵajimwiche kundaŵi, ŵatandiche chindu chakutamila pa mbunda jakwe ni kulongana nawo achakulu ŵa ku Moabu ŵala.

22 Nambo Akunnungu ŵatumbile kwannope ligongo che Balaamu ŵaliji nkwaula ku che Balaki, kwayele katumetume jwa kwinani jwa Ambuje Akunnungu ŵajimi pa litala kwasiŵilila litala. Pa kele katema ko che Balaamu ŵaliji akwesile pa mbunda jakwe, ali nkulongana ni ŵamasengo ŵakwe ŵaŵili. 23 Nipele, mbunda jila jammweni katumetume jwa Ambuje Akunnungu jo ajimi mwitala, akamulile lipanga lyalili chile kukata. Kwayele ŵalilesile litala, ni kupitila mumbali. Che Balaamu ŵajiputile mbunda jila kuti ajisye mwitala. 24 Nipele katumetume jwa kwinani jwa Ambuje Akunnungu jo ŵajimi pamalo papali ni litala lyakunyilila, pasikati ja migunda jiŵili ja misabibu jajili ni lipupa lya maganga kila upaande. 25 Mbunda jila pajammweni katumetume jwa Ambuje Akunnungu, jajesile jakulwime mwipupa ni kulutwinyichisya lukongolo lwa che Balaamu kwipupa ko. Pelepo che Balaamu ŵajiputile sooni mbunda jila. 26 Nipele katumetume jwa kwinani ŵalongolele chambujo, ŵajimi pamalo pakunyilila papali pangali sooni lipesa lyakuti agalauche. 27 Mbunda jila pajammweni katumetume jwa Ambuje Akunnungu jo jagonile paasi. Che Balaamu ŵatumbile kwannope, ŵajiputile mbunda jila ni lubokola lwakwe. 28 Pelepo Ambuje Akunnungu ŵajiunukwile kang'wa ja mbunda, mbunda jila jansalile che Balaamu kuti, "Nantesile ichichi kwampaka nkuumbuta katatu ka?" 29 Che Balaamu ŵajijanjile mbunda jila kuti, "Mmweji mundesile nkala! Ikaliji ngwete lipanga ngammuleje sampano!" 30 Mbunda jila jansalile che Balaamu kuti, "Uli, uneji nganima mbunda jenu jilajila jinkwesile moŵa gose mpaka lelo jino? Uli, chipali chaka chinaatendele yanti nyi?"

Che Balaamu ŵajanjile kuti, "Ngwamba."

31 Pelepo Ambuje Akunnungu ŵagaugwile meeso ga che Balaamu, nombejo ŵammweni katumetume jwa kwinani ali ajimi mwitala, akamulile lipanga lyalili chile kukata. Che Balaamu ŵaligwisisye paasi manguku. 32 Katumetume jwa kwinani jwa Ambuje Akunnunggu ŵansalile che Balaamu kuti, "Kwachichi njiputile mbunda jenu katatu kose? Uneji iche kunsiŵila petala, ligongo nganimŵajilwa kuutenda au ulendo wu. 33 Mbunda jenu jamweni une ni jambelembaga katatu kose. Jikaŵe kuti nganijipelembaga, kusyene ngammuleje mmwe ni kujileka mbunda jo jejumi."

34 Che Balaamu ŵansalile katumetume jwakwinani jwa Ambuje Akunnungu kuti, "Ndesile sambi ligongo nganimanyililaga kuti njimi mwitala kuusiŵilila. Sambano, iŵaga ngaikunnonyela kuti une mbitilisye ulendo wu, timuje kumusi." 35 Nambo katumetume jwa kwinani jwa Ambuje Akunnungu ŵansalile che Balaamu, "Njaule ni ŵandu ŵa, nambo tinkasale chingunsalila une." Nipele che Balaamu ŵajendelechele ni ulendo pamo ni achakulu ŵa che Balaki.

36 Che Balaki paŵasalilwe kuti che Balaamu akwika, ŵatyosile kwaula kukwachingamila mmusi wa ku Ali, musi uwaliji mungulugulu mwa lusulo lwa Alinoni mumpika wa ku Moabu. 37 Che Balaki ŵansalile che Balaamu kuti, "Ligongo chichi nganinnyika pa ulendo waandanda unammilasile ula? Uli mwaganisisye kuti ngangakombole kunlipa malipilo gakwanila?" 38 Che Balaamu ŵanjanjile che Balaki kuti, "Sambano iche! Nambo ana une ngwete ulamusi wa kuŵecheta chindu chilichose? Chindu chitasale Akunnungu, chelecho ni chingusachilwa kusala." 39 Nipele, che Balaamu ŵajawile pamo ni che Balaki, ni ŵaiche ku musi wa ku Kiliati Husoti. 40 Kweleko che Balaki ŵasikite ng'ombe ni ngondolo siŵe mbopesi, nyama jine ŵaagawile achakulu ŵaŵaliji pamo nawo ni che Balaamu.

41 Malaŵi jakwe che Balaki ŵanjigele che Balaamu, ŵakwesisye ni kwaula mpaka ku Bamoti Baali; kutyochela kweleko, che Balaamu ŵakombwele kwawona Ŵaisilaeli ŵampepe.