1 Ambuje Akunnungu ŵasalile che Musa 2 ŵaasalile Ŵaisilaeli malajisyo ga, "Pachinkajinjile ku chilambo cha ku Kanaani, chilambo chingwapa chiŵe chenu, mipika ja chilambo chenu chose tijiŵe mpela yeleyi. 3 Chakulujenda mpika wenu chiuŵe kutyochela ku chipululu cha Sini kuukuya mpika wa ku Edomu. Chakungopochelo lyuŵa mpika wenu chakulujenda chiutandilile kumbesi kwa Bahali ja Njete, 4 Nipele chiujaule chakulujenda kupitila ku Akilabimu, ni kupitila ku Sini mpaka ku Kadeshi Balinea. Nipele mpika wo tiuendelechele mpaka ku Hasali Adali mpaka ku Asimoni. 5 Kutyochela ku Asimoni tiugalauche ni kwaula ku kasulo ka Misili, ni kumalila ku Bahali ja Meditelaniani.

6 "Chakumaswelelo lyuŵa mpika wenu tiuŵe Bahali ja Meditelaniani.

7 "Chakumpoto mpika wenu tiuŵe nti nnyi: Kutyochela ku Bahali ja Meditelaniani, timmiche alama mpaka ku chitumbi cha Holi. 8 Kutyochela ku chitumbi cha Holi timmiche chilosyo mpaka ku Hamati; ni kutyochela kweleko tiujaule mpaka ku Sedadi, 9 ni kupitila ku Sifiloni ni kumalila ku Hasali Enani; welewo tiuŵe mpika wenu chakumpoto.

10 "Chakungopochelo lyuŵa mpika wenu tiutandilile ku Hasali Enani mpaka ku Shefamu. 11 Kutyochela ku Shefamu tiujaule kulujenda mpaka ku Libila, kungopochelo lyuŵa kwa Aini; nipele mpika wo tiujaule chapasi mpaka ku nduluko ja ku ngopokochelo lyuŵa kwa litanda lya Kineleti, 12 pelepo tiuseleleche kukuya lusulo lwa Yolodani mpaka ku Bahali ja Njete.

"Chelecho ni chichichiŵa chilambo chenu mpela mipika jakwe yajitite kuŵa."

13 Nipele, che Musa waasalile Ŵaisilaeli kuti, "Chelechi ni chilambo chachingaŵilwe kuŵa chenu kwakutenda gudugudu, chilambo chati Ambuje Akunnungu alajisye apegwe ŵandu ŵa ngosyo tisa ni nusu. 14 Lukosyo lwa Lobeni ni Gadi ni nusu ja lukosyo lwa Manase amasile kupegwa malo jawo malinga ni mitundu jawo. 15 Ngosyo siŵili ni nusu syo apegwilwe malo jawo pesi lusulo lwa Yolodani chakungopochelo, kulolegana ni ku Yeliko."

16 Ambuje Akunnungu ŵaasalile che Musa kuti, 17 "Jwambopesi che Eleasali ni che Yoshua mwana jwa che Nuni ni uchiŵagaŵile ŵandu chilambo kuŵa chawo. 18 Tinjigale sooni chilongola jumo kutyochela pa kila lukosyo kukamuchisya mu kugaŵanya chilambo cho." 19 Gelega gali meena gawo:

Kutyochela mu lukosyo lwa Yuda, ŵasagulikwe che Kalebu mwana jwa che Yefune.

20 Kutyochela mu lukosyo lwa Simeoni, ŵasagulikwe che Shemueli mwana jwa che Amihudi.

21 Kutyochela mu lukosyo lwa Benjamini, ŵasagulikwe che Elidadi mwana jwa che Kisiloni.

22 Kutyochela mu lukosyo lwa Dani, ŵasagulikwe che Buki mwana jwa che Yogili.

23 Kutyochela mu lukosyo lwa Manase mwana jwa che Yusufu, ŵasagulikwe che Hanieli mwana jwa che Efodi.

24 Kutyochela mu lukosyo lwa Efulaimu, mwana jwa che Yusufu, ŵasagulikwe che Kemueli mwana jwa che Shifutani.

25 Kutyochela mu lukosyo lwa Sabuloni, ŵasagulikwe che Elisafani mwana jwa che Palinaki.

26 Kutyochela mu lukosyo lwa Isakali, ŵasagulikwe che Palitieli mwana jwa che Asani.

27 Kutyochela mu lukosyo lwa Asheli, ŵasagulikwe che Ahihudi mwana jwa che Shelomi

28 Kutyochela mu lukosyo lwa Nafutali, ŵasagulikwe che Pedaheli mwana jwa che Amihudi.

29 Ŵeleŵa ni ŵandu ŵati Ambuje Akunnungu ŵaalajisye ŵaagaŵile Ŵaisilaeli chilambo cha ku Kanaani kuti chiŵe chawo.