1 Ambuje Akunnungu ŵaasalile che Musa, 2 "Njigale madini ga feza nkasyane mapenenga gaŵili. Mapenenga go tintumie katema ka kwaŵilanga ŵandu ni katema ka kusamisya chigono. 3 Mapenenga gose gaŵili gagombekwaga kwanakamo, ŵandu wose tasongangane paujo penu pa nnango wa kwinjilila pa Lisakasa lya Kusimanilana kwaligongo lya Akunnungu. 4 Nambo lyagombekwaga lipenenga limo pe, nipele ilongola wa ngosyo sya Isilaeli pe tasongangane paujo penu. 5 Katema patikupikaniche kusona kwa lipenenga kwa kumanyisya kutanda ulendo, ŵakutama mu igono ya kungopochelo lyuŵa tautande ulendo. 6 Kwapikanikaga kusona kwaaŵili kwanti iyoyo, aŵala ŵaali mu igono yaili chakulujenda tatande kutyoka. Chimanyisyo cha kusona kwa lipenenga lyo chichityosekwe kila katema ka kuutanda ulendo. 7 Katema ka kwaŵilanga ŵandu asongangane pamo, mapenenga tigagombekwe, nambo nkagomba mapenenga kwa kusona kwakukumanyisya kuutanda ulendo. 8 Mapenenga go tigagombekwe ni ŵanache ŵa che Haluni, ŵaali ŵambopesi."

"Lyele tiliŵe lilajisyo lya moŵa gose mu iŵelesi yenu yose. 9 Katema kachimputane ngondo ni achammagongo ŵenu ŵakungunguluchila mu chilambo chenu, tinchigomba mapenenga ga kwamanyisya ngondo. Pelepo Ambuje Akunnungu ŵenu tachinkumbuchila ni kunkulupusya kutyochela kwa ŵammagongo ŵenu. 10 Iyoyopeyo mmoŵa genu gankusengwa mpela ila, mu chindimba cha kwoneka kwa mwesi ni indimba ine, tinchigomba mapenenga ga katema katinchityosya mbopesi syenu sya kutinisya ni mbopesi syenu sya chitendewele. Pelepo une Akunnungu ŵenu tinankumbuchile. Une ndili Ambuje Akunnungu, Akunnungu ŵenu."

11 Pa lyuŵa lya ishilini lya mwesi waaŵili, chaka chaaŵili kutandilila Ŵaisilaeli paŵatyosile ku Misili, liunde lilyaliji pachanya Lisakasa lya Kusimanilana kwaligongo lya Akunnungu lyanyakulikwe, 12 nombe Ŵaisilaeli ŵautandite ulendo kutyoka ku chipululu cha Sinai, ni ŵajesile mpaka liunde palyatusile ku chipululu cha Palani.

13 Ni ŵautandite ulendo kaandanda kwa lilajisyo lya Ambuje Akunnungu mpela iŵansalile che Musa. 14 Aŵala uŵaliji paasi pa bendela ja mpingo wa lukosyo lwa Yuda, ŵalongolele ni mipingo jao. Chilongola jwao ŵaliji che Nashoni mwana jwa che Aminadabu. 15 Nesaneli mwana jwa che Shuali jwaliji chilongola jwa mpingo wa lukosyo lwa Isakali. 16 Nombe che Eliabu mwana jwa che Heloni jwaliji chilongola jwa mpingo wa lukosyo lwa Sebuloni.

17 Nipele, ŵaaligumwile Lisakasa lya Kusimanilana kwaligongo lya Akunnungu, ni ŵandu ŵa ntundu wa Gelishoni ni wa Melali ŵaŵajigele lisakasa lyo ŵatandite kutyoka.

18 Nipele ŵakuiye ŵaŵaliji paasi pa bendela ja mipingo ja lukosyo lwa Lobeni. Chilongola jwao jwaliji che Elisuli mwana jwa che Shedeuli. 19 Shelumieli mwana jwa che Suli Shadai ŵalongwesye lukosyo lwa Simeoni. 20 Nombe che Eliasafu mwana jwa che Deueli ŵalongwesye lukosyo lwa Gadi.

21 Nipele ŵakuiye Ŵakohati ali ajigele yoombo yeswela. Paŵaiche Lisakasa lya Kusimanilana kwaligongo lya Akunnungu lyaliji chile lyejimiche.

22 Pakumala ŵanyawo, ŵakuiye ŵandu ŵaŵaliji paasi pa bendela cha lukosyo lwa Efulaimu, ni mipingo jose. Chilongola jwao ŵaliji che Elishama mwana jwa che Amihudi. 23 Che Gamalieli mwana jwa che Pedasuli ŵalongwesye mipingo ja lukosyo lwa Manase, 24 nombe che Abidani mwana jwa che Gideoni ŵalongwesye lukosyo lwa Benjamini.

25 Pambesi aŵala ŵaŵaliji paasi pa bendela ja mpingo uwalongoswaga ni lukosyo lwa Dani, ŵaliji mpela ŵakulindilila cha panyuma pa mipingo jose, ŵajesile mpingo ni mpingo. Che Ahieseli mwana jwa che Amishadai ŵaliji chilongola jwao. 26 Che Pagieli mwana jwa che Okilani ŵalongwesye lukosyo lwa Asheli. 27 Nombe che Ahila mwana jwa che Enani ŵalongwesye lukosyo lwa Nafutali. 28 Wele ni ukotopasyo wa kutyoka uŵaukuiye Ŵaisilaeli malinga ni mipingo jao, kila paŵasyamisyaga chigono kwendelechela ni ulendo.

29 Che Musa ŵansalile che Hobabu juŵaliji alambagwe mwana jwa che Leueli. Che Leueli ju ŵaliji akwegwawo che musa mundu jwa ku Midiani, "Uweji tuli mu ulendo kwaula kwati Ambuje Akunnungu atite, ‘Tinampe ŵanyamwe peuto po.’ Ayaga twende pamo nowe tutuntendele yambone, pakuwa Ambuje Akunnungu alanjile kutupa uweji Ŵaisilaeli indu yambone." 30 Nambo che Hobabu ŵajanjile, "Une nganongana ni ŵanyamwe, nguuja ku chilambo changu ni kwa achalongo achinjangu." 31 Che Musa ŵaasalile, "Choonde nkatuleka, pakuŵa mmwe nkuchimanyilila chipululu chi, nkukombola kutulosya peuto patukukombola kuŵika chigono. 32 Sooni mwalonganaga ni uwe chilichose chambone chichatutendele Ambuje Akunnungu ni mmwe chituntendele iyoyo."

33 Nipele ŵatandite kutyoka ku Sinai chitumbi cha Ambuje Akunnungu, ni kwa moŵa gatatu ŵajesile akuno Lisanduku lya Lilangano lya Ambuje Akunnungu lichilongolelaga mmbujo mwao kwa moŵa gatatu go kwasosela liuto lya kuŵika chigono. 34 Kila lyuŵa paŵajesile, liunde lya Ambuje Akunnungu lyaliji pachanya pao muusi.

35 Katema kose lisanduku palyatokaga, che Musa ŵatite, "Njimuche Ambuje Akunnungu, mwapwilinganye achamagongo ŵenu, ni aŵala ŵakunchima autuche paujo penu." 36 Katema kose Lisanduku lya Lilangano palyajimi che Musa ŵatite, "Alakwe Ambuje Akunnungu mwaujile Ŵaisilaeli ŵaali ŵajinji nnope."