1 Nipele, pa mwesi wandanda wa chaka chaaŵili pakumala Ŵaisilaeli kutyoka ku Misili, Ambuje Akunnungu ŵakungulwiche ni che Musa ku chipululu cha ku Sinai achitiji, 2 "Waisilaeli atende chindimba cha Pasaka katema kakaŵichikwe. 3 Yele chiiŵe pa lyuŵa lya kumi na nne lya mwesi wu, katema ka ligulo tatende yeleyo malinga ni malajisyo gakwe ni malamusi gakwe." 4 Kwayele, che Musa ŵaasalile Ŵaisilaeli atende chindimba cha Pasaka, 5 nombe ŵanyawo ŵatesile yeleyo ku lipululu lya Sinai katema ka lyuŵa kutiŵila, pa lyuŵa lya kumi na nne lya mwesi waandanda. Ŵaisilaeli ŵatesile kila chindu mpela Ambuje Akunnungu iŵatite kwalajichisya che Musa.

6 Nambo, ŵandu ŵane nganakombola kutenda chindimba cha Pasaka palyuŵa lila, pakuŵa ŵaliji akwaiye malilo ŵaliji ŵangakundikwa pa paujo pa akunnungu. Ŵanyawo ŵajaulile che Musa ni che Haluni lyuŵa lilalila, 7 ŵaasalile cha Musa, "Uweji tuli ŵangakundikwa paujo pa Akunnungu pakuŵa tugakwaiye malilo, nambo kwa chichi ngatukukundikwa kwatyochesya Ambuje Akunnungu mbopesi syakwe ni Ŵaisilaeli achinjetu kwa katema kakaŵichikwe?"

8 Che Musa ŵajanjile, "Nlinde kaje mpaka pachimbate malajisyo gagakungamba ŵanyamwe kutyochela kwa Ambuje Akunnungu."

9 Pelepo Ambuje Akunnungu ŵaasalile che Musa, 10 ŵaasalile Ŵaisilaeli kuti, "Jumo jwenu pane jumo mwa iŵelesi yenu aŵaga ngakukundikwa ni Akunnungu kwa ligongo lya kugakwaya malilo pane aŵaga mu ulendo namose yeleyo akukombola kutenda chindimba cha Pasaka ja Ambuje Akunnungu. 11 Mundu jwanti yele akukombola kutenda yele mwesi umo waukukuya, ligulo lya lyuŵa lya kumi na nne pa mwesi waaŵili. Tatende kwa kulya ngondolo jangakomala ni mikate jangataga amila ni mboga jajikuŵaŵila. 12 Akasigasya chakulya chilichose mpaka kundaŵi, namose kukasanya liupa limo lya chinyama cha Pasaka. Tatende chindimba cha Pasaka malinga ni mashelaiti gakwe gose. 13 Nambo mundu jwalijose jwakukundikwa ni nganaŵa mu ulendo, naga ngakutenda chindimba cha Pasaka, tachiŵikwa kwa kutalichila ni ŵandu ŵakwe pakuŵa nganandyochesya mbopesi kwa katema kakaŵichikwe. Mundu jo tajamuchikwe kwa ligongo lya sambi jakwe."

14 "Iŵaga kwana jwannendo jwakutama pamo ni ŵanyamwe ni akusaka kutenda chindimba cha Pasaka, mundu jo akusachilwa atende yeleyo malinga ni malamusi ni malajisyo gose ga Pasaka. Kila mundu tagakuye malamusi galagala aŵe jwannendo pane nsyene musi."

15 Pa lyuŵa lilyajimichikwe Lisakasa lya Kusimanilana kwaligongo lya Akunnungu, liunde lyatulwiche ni kuliunichila Lisakasa lyo. Katema ka chilo liunde lyo lyawoneche nti mooto mpaka kundaŵi. 16 Yeleyo ni iyatendekwaga kila lyuŵa, liunde lyaunichilaga Lisakasa muusi ni chilo lyawonekaga nti mooto. 17 Katema kose liunde lyo palyatokaga pachanya pa Lisakasa, Ŵaisilaeli ŵasyamisye chigono ni kuŵika chigono sooni liuto lyalikwima liunde lyo. 18 Ŵajesile kwa malajisyo ga Ambuje Akunnungu ni kuŵika chigono sooni kwa malajisyo ga Akunnungu. Katema kose liunde lyo palyaliji pachanya lisakasa, ŵandu ŵasigele pachigono cho. 19 Katema liunde palyasigalile pachanya lisakasa kwa moŵa gamajinji, Ŵaisilaeli ŵaajitichisye Ambuje Akunnungu ni nganatyoka. 20 Katema kane liunde lyo nganilitamilisya pachanya lisakasa, kwa malajisyo ga Ambuje Akunnungu akaŵisile chigono ni sooni kwa malajisyo gakwe akatyosile. 21 Katema kane liunde lyatemi pachanya lisakasa kutandilila ligulo mpaka kundaŵi, ni palyatokaga kundaŵi ŵandu ŵautandaga ulendo. Naga lili pachanya lisakasa muusi wose ni chilo ŵanyawo nganatyokaga mpaka palyatokoga liunde. 22 Yaŵaga liunde litemi pachanya lisakasa kwa moŵa gaŵili pane mwesi pane chaka, Ŵaisilaeli nganaasamaga; nambo liunde palyanyakulikwaga nombe ŵanyawo ŵasamile. 23 Ŵaŵisile chigono kwa lilajisyo lya Ambuje Akunnungu, ni sooni ŵajesile kwa lilajisyo lya Ambuje. Ŵakamwile lilamulo lya Ambuje Akunnungu mpela iŵatite pakulajisya kwa litala lya che Musa.