Números 23

1 Che Balaamu ŵansalile che Balaki, "Muundaŵile ilisa saba pelepa, nipele munyichisye ng'ombe mikambaku saba ni ngondolo mikambaku saba." 2 Che Balaki ŵatesile mpela che Balaamu iŵasalile. Nipele, ŵakopwesye pachanya pa kila chilisa mbopesi ja ng'ombe nkambaku umo ni ngondolo nkambaku jumo. 3 Pelepo che Balaamu ŵasalile che Balaki kuti, "Njimeje pelepa chiŵandi ni mbopesi syenu sya kutinisya, ni une ngwaula pambali. Panepa Ambuje Akunnungu chaiche kukusimana ni une. Chilichose chichasalile chiiche kukunsalila." Nipele, che Balaamu ŵajawile jikape peuto pakulanguka pa chikwesya. 4 Akunnungu ŵasimene ni che Balaamu. Che Balaamu ŵasalile kuti, "Ndaŵile ilisa saba ni kutyosya mbopesi, ng'ombe nkambaku umo ni ngondolo nkambaku jumo pa kila chilisa."

5 Ambuje Akunnungu ŵampele che Balaamu maloŵe gatagasale ni kwasalila auje kwa che Balaki. 6 Che Balaamu ŵausile, ŵasimene che Balaki ali ajimi palapala chiŵandi ni mbopesi jakutinisya, pamo ni achakulungwa wose ŵa ku Moabu.

7 Che Balaamu ŵasasile aga maloŵe ga kulondola ga kuti;

"Che Balaki amilasile apano kutyochela ku Alamu,

Elo, mwenye jwa ku Moabu amilasile kutyochela ku matumbi ga ku ngopochelo lyuŵa.

Njise mwalwesye ŵandu ŵa che Yakubu kwaligongo lyangu,

njise mwalalatile Ŵaisilaeli!

8 Ana ngukombola kunlwesya mundu jwati Akunnungu ngananlwesya?

Ana ngukombola kwalalatila ŵandu ŵati Akunnungu nganiŵalalatila?

9 Ngukombola kwawona kutyochela penani pa lwala,

Ngukombola kwalola kutyochela penani pa matumbi.

Ŵele ali mpingo wa ŵandu ŵakutama jikape,

akuimanyilila kuti apegwilwe upile kupunda ŵandu ŵa ilambo ine.

10 Ŵani ŵakukombola kwaŵalanga winji wa ŵandu ŵa che Yakubu,

pane kuganisisya ŵinji wa Ŵaisilaeli?

Mweje mpela mwakuwilila ŵandu ŵakupanganya yaikwanonyelesya Akunnungu

mbesi jangu jiŵeje mpela ŵanyawo."

11 Pelepo, che Balaki ŵansalile che Balaamu kuti, "Ana muundendele yanti uli? Nannyichisye apano kuti mwalwesye ŵammagongo ŵangu, nambo pamalo pakwe nkwamba kwapa upile!" 12 Che Balaamu ŵaasalile che Balaki kuti, "Une chimechete yaakusalila Ambuje Akunnungu pe."

Kulondola kwaaŵili kwa che Balaamu

13 Pelepo che Balaki ŵaasalile che Balaamu kuti, "Twende tujaule pamalo pane pati timpakombole kwawona; namose yeleyo timwawone ŵampepe ŵao, ngamwawona ŵanawose. Nipele mwalwesye kwaligongo lyangu nli njimi pelepo." 14 Nipele, che Balaki ŵampeleche che Balaamu ku ngunda waukuŵilanjikwa Sofimu penani pa litumbi lya Pisiga. Pelepo ŵataŵile sooni ilisa saba ni kutyochesya mbopesi pachanya pa chilisa chilichose, ng'ombe nkambaku umo ni ngondolo nkambaku jimo.

15 Che Balaamu ŵasalile che Balaki kuti, "Njimeje panopano chiŵandi ni mbopesi jenu jakutinisya, ni une ngwaula ngasimane ni Ambuje Akunnungu akula." 16 Ambuje Akunnungu ŵasimene ni che Balaamu, ŵampele maloŵe gatagaŵechete, ni kwasalila aujile kwa che Balaki. 17 Nipele, che Balaamu ŵausile, ŵansimene che Balaki ali ajimi palapala chiŵandi ni mbopesi sya kutinisya pamo ni achakulu wose ŵa ku Moabu. Che Balaki ŵammusisye kuti, "Ambuje Akunnungu ansalile ichichi?" 18 Pelepo, che Balaamu ŵasasile utenga wakwe:

"Che Balaki njime ni kupilikanila

muumbilikanile une ugwe mwanache jwa che Sipoli.

19 Akunnungu nganaŵa mundu, kuti asale ya unami,

nganaŵa mundu, kuti agalausye nningwa wakwe!

Ana chalanje chindu pangachitenda,

pane asale chindu pangachitindimisya?

20 Nnole, une anajisye kuti naape upile,

nombewo ŵaapele upile ni une ngangukombola kugalausya.

21 Ambuje Akunnungu nganauwona ugongomalo kwa ŵanache ŵa che Yakubu,

namose makani pa Isilaeli.

Ambuje Akunnungu, Akunnungu ŵao ali pamo nawo,

Ŵanyawo akulalichila kuti ali mwenye jwawo,

22 Akunnungu jwaŵajigele kutyochela ku Misili,

akwamenyanila kwa machili mpela njati.

23 Kusyene ngapagwa kwaloga ŵandu ŵa che Yakubu,

namose usaŵi utiŵasiŵilile Ŵaisilaeli.

Sambano kwagamba Ŵaisilaeli, ŵandu tajile kuti,

‘Nnole yakusimonjeka yatesile Akunnungu!’

24 Nnole! Ŵaisilaeli ajimwiche nti lisimba lyankolo,

ajiminji nti lisimba lyankambaku.

Ali nti lisimba lyangagona mpaka lili liuleje chinyama ni kuchitauna,

ni kung'wa miasi ja chinyama chachiuleje."

25 Pelepo che Balaki ŵasalile che Balaamu kuti, "Nkaalwesya atamuno nkaapa upile kusyene!" 26 Nambo che Balaamu ŵajanjile che Balaki kuti, "Uli, nganinansalila kuti chakusala Ambuje Akunnungu chelecho ni chingusachilwa kutenda?"

Kulondola kwaatatu kwa che Balaamu

27 Che Balaki ŵasalile che Balaamu kuti, "Njise, tinampeleche pamalo pane. Panepa Akunnungu chakunde kuti mwalwesye ŵandu wo kwaligongo lyangu kutyochela kweleko." 28 Nipele, che Balaki ŵanjigele che Balaamu mpaka penani pa chitumbi cha Peoli, pati mundu ajimaga akulola mu chipululu. 29 Che Balaamu ŵasalile che Balaki kuti, "Muundaŵile ilisa saba pelepa, nipele muumichile chile ng'ombe mikambaku saba ni ngondolo mikambaku saba." 30 Che Balaki ŵatesile mpela iŵasalilwe ni che Balaamu, nipele ŵatyosisye pachanya pa chilisa chilichose mbopesi ja ngombe ja nkambaku jimo ni ngondolo jankambaku jimo.

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?