Números 12

Che Miliamu akwamuchikwa

1 Nipele che Miliamu ni che Haluni ŵatandite kummechetela yangalumbana che Musa, ligongo ŵanlombile jwankongwe jwa ku Kushi. 2 Ŵatite, "Uli isyene kuti Ambuje Akunnungu aŵechete kwa litala li che Musa jika pe? Uli nganaŵecheta kwa litala lya uweji nombe?" Ambuje Akunnungu ŵagapikene maloŵe go. 3 Che Musa ŵaliji mundu jwakutulala kwapunda ŵandu wose ŵaŵaliji pa chilambo. 4 Papopo Ambuje Akunnungu ŵaasalile che Musa, che Haluni ni che Miliamu, "Njisangane mu Lisakasa lya Kusimanilana kwaligongo lya Akunnungu, ŵanawose ŵatatu." Nipele, wose ŵatatu ŵapite ku Lisakasa lya Kusimanilana. 5 Pelepo Ambuje Akunnungu ŵatulwiche mu chiimila cha liwunde, ŵajimi pa nnango wa Lisakasa, ŵawilasile che Haluni ni che Miliamu. Wose ŵaŵili ŵasejelele mbujo. 6 Nipele Ambuje Akunnungu ŵaasalile, "Mpilikane maloŵe gangu. Apagwaga jwakulondola pasikati jenu, une Ambuje Akunnungu ngulimanyukusya kukwakwe mu yakwiwona ni kukunguluka nawo mu sagamisi. 7 Nambo ngaŵa kwa jwakutumichila jwangu che Musa, ŵele ali ŵakukulupilichika mu kwalongosya ŵandu ŵangu Ŵaisilaeli. 8 Une nguŵecheta nao tulinkulolegana, pangasisika ni ngaŵa kwa itagu. Ŵelewo akumona uwele wangu une Ambuje Akunnungu. Kwa chichi nganinjogopa kuŵechete yangalumbana nkati jwakutumichila jwangu che Musa?"

9 Pelepo Ambuje Akunnungu ŵatumbilile kwannope, ni ŵatyosile. 10 Liunde lyatosile pachanya pa Lisakasa lya Kusimanilana, papopo che Miliamu ŵaoneche ali ni matana, geswela mbee. Che Haluni paŵagalawiche ni kunnola che Miliamu ŵasimosile kwawona akwete matana. 11 Pelepo che Haluni ŵaasalile che Musa, "Alakwe ambuje ŵangu, nkatulechelela tulaje kwanti yeleyi pakuŵa tutesile indu yakuloŵela ni kutenda sambi. 12 Nkanneka che Miliamu aŵe mpela mwanache jwamwana jwapagwile ali jwammwe, jwati nusu ja chiilu chakwe chihalibiche." 13 Che Musa ŵaalilile Ambuje Akunnungu achitiji, "Ngunchondelela alakwe Akunnungu, munnamye." 14 Nambo Ambuje Akunnungu ŵansalile che Musa, "Naga atati gwe akansunile mata kumeso, uli ngaakakole soni kwa moŵa saba? Nipele muntyosye paasa chigono atame kweleko moŵa saba, syamalaga timwauchisye sooni pachigono." 15 Kwayele ŵankopwesye che Miliamu paasa chigono kwa moŵa saba. Ŵandu nganajendelechela ni ulendo mpaka paŵammuchisye che Miliamu pachigono. 16 Pakumala yeleyo ŵandu ŵatandite ulendo kutyochela ku Haseloti, ŵaŵisile chigono ku chipululu cha Palani.

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?