1 Ŵandu ŵatandite kwadandaulila Ambuje Akunnungu ligongo lya masausyo gawo. Ambuje Akunnungu paŵapikene yaachimile kwannope ŵaatuluchisye mooto. Mooto wo wakolele pasikati jao, wachomile upande umo wa chigono. 2 Ŵandu ŵalilile che Musa, nombejo ŵampopelele Ambuje Akunnungu ni mooto ula wasimiche. 3 Kwayele peuto pala paŵilanjikwe Tabela, pakuŵa pelepo mooto wa Ambuje Akunnungu wakolele pasikati ja ŵandu.

4 Pasikati ja Ŵaisilaeli kwaliji ni wandu ŵangaŵa Ŵaisilaeli ŵaŵaliji ni lung'wanu lwa kulya nyama. Ŵaisilaeli nombe ŵatandite kulila achitiji, "Mbaya tukapatile nyama tulye! 5 Tukukumbuchila somba sitwalyaga ku Misili pangalipila, mataanga, matikiti ni mboga, ni itunguu ni itunguu saumu! 6 Nambo sambano machili gatumalile ni nganitukola lungwanu lwa kulya ine ni pelepa ngapagwa chakulya chine ikaŵe mana peji!"

7 Mana jaliji mpela songolo sya mapemba, langi jakwe jaliji nti manjano gepauche. 8 Mana jo jagwaga chilo pa chigono pamo ni mangame. 9 Kundaŵi ŵandu ŵajaulaga ni kujikumbikanya, nipele ŵajisyajile kwa maganga ga kusyajila pane ŵatwele mmatuli, nipele ŵateleche nnyiŵiga pane kukolosya maandasi. Unonye wakwe waliji mpela maandasi gagakolochekwe kwa mauta ga seituni.

10 Che Musa ŵaapikene ŵandu ŵa kila ulongo ali nkudandaula ali ajimi mu minango jamasakasa gawo. Nipele uchimwa wa Ambuje Akunungu wakolele, ni che Musa nombe ŵaatumbilile. 11 Pelepo che Musa ŵaausisye Ambuje Akunnungu, "Kwachichi kundendela yangalumbana une jwakutumichila jwenu? Nantendele chichichi cha kunchima mpaka kuumba mesengo gakulema ga kwalongosya ŵandu wose ŵa? 12 Uli uneji ni unaŵeleche kwampaka muusalile naajigale ni kwalela mpela jwakulela yakuti kunjigala mwanache jwannandi, ni kwajausya mpaka ku chilambo chimwalanjile kwapa achinangolo ŵao? 13 Timbate kwapi nyama jampaka jakwanile ŵele ŵandu wose ŵa? Ligongo akwendelechela kundilila une achitiji naape nyama alye. 14 Uneji jikape ngangukombola kwalela ŵandu wose ŵa, gele gali masengo gakutopa kukwangu. 15 Iŵaga timundendele yeleyi, mbaya muumulaje sambano jino! Iŵaga nkuungolela chanasa, nkaaneka nagawone masausyo gangu."

16 Nipele, Ambuje Akunnungu ŵasalile che Musa kuti, "Mwasonganganye achachekulu sabini ŵa Ŵaisilaeli ŵankwamanyilila mmwe kuti akuchimbichikwa ni kukundikwa ni ŵandu nti ilongola, mwaichisye ku Lisakasa lya Kusimanilana kwaligongo lya Akunnungu, ajimeje kuŵandikana ni mmwe. 17 Tinduluche kweleko kukunguluka nomwe, tinyigale sehemu ja machili ga mbumu jangu, ni une tiimiche sehemu ja machili go kwa ŵele ŵandu wo, kwapele chakombole kukamulangana nomwe pakwalela ŵandu ŵa, nkagatenda masengo go jika. 18 Sambano mwasalile ŵandu yeleyi: ‘Nliswejesye kwaligongo lya malaŵi pachinlye nyama. Ambuje Akunnungu apilikene nchililaga ni kusala kuti ngapagwa jwakumpanga nyama, ni kuti mwaliji chenene pamwaliji ku Misili. Sambano Ambuje Akunnungu tachimpanga nyama, ni ŵanyamwe nkusachilwa nlyeje. 19 Nyama jo tinchilya, ngaŵa pa lyuŵa limo pe pane moŵa gaŵili pane nsano pane likumi pane moŵa ishilini, 20 nambo kwa mwesi wosepe wene, tinchilya mpaka tijimpesye ni kuntindikwa mpaka tiinchime. Yele yose yo ligongo munkanile Ambuje Akunnungu ŵali apano pasikati penu, ni kulila paujo pakwe nchitiji kuti mbaya ngankatyoche ku Misili.’"

21 Nambo che Musa ŵaasalile Ambje Akunnungu kuti, "Ŵandu ugwalongosya apano ali laki sita ŵakwenda wamakongolo, nomwe nkuti timwape nyama kwa mwesi wantundu! 22 Ana ikomboleka kusinga ngondolo ni ng'ombe syakwanila? Uli somba syosye sya mubahali siloposekwe kwaligongo lyao kuti syakwane?" 23 Ambuje Akunnungu ŵanjanjile che Musa kuti, "Uli ana ukombole wangu upungwiche? Sambano tinnyiwone iŵaga liloŵe lyangu tiliŵe lisyene pane ngaŵa."

24 Nipele che Musa ŵajawile kwamanyisya ŵandu aila yaŵechete Ambuje Akunnungu. Nipele, ŵaasonganyisye achachekulu sabini kutyochela pasikati ja achachekulu ilongola ni ŵajimiche kusyungula lisakasa. 25 Pelepo, Ambuje Akunnungu ŵatulwiche mwiunde ni kukunguluka ni che Musa. Nipele ŵajigele sehemu ja machili ga mbumu jiŵampele che Musa ni kwapa aŵala achachekulu sabini ŵala. Mbumu paŵatulwiche pachanya pao, ŵatandite kulondola, nambo nganaujila sooni kutenda yeleyo.

26 Nambo achachekulu ŵaŵili pasikati ja aŵala sabini ŵaŵasagulikwe ŵala, meena gao che Elidadi ni che Medadi, ŵasigalile pachigono achinjawo paŵaliji ali apite ku Lisakasa. Nambo mbumu ŵaatuluchile mmomo mu chigono mo, ni ŵatandite kulondola pamalo paŵaliji. 27 Jwanchanda jumo ŵautwiche ni kwasalila che Musa kuti, "Che Elidadi ni che Medadi akulondolanga ku chigono ko." 28 Pelepo che Yoshua mwana jwa che Nuni, juŵaliji nkamusi jwa che Musa kutandilila uchanda wakwe, ŵansalile che Musa kuti, "Ambuje ŵangu, mwakanye!" 29 Nambo che Musa ŵanjanjile kuti, "Uli, nkuungolela wiu? Ngulajila ŵandu wose ŵa Ambuje Akunnungu akaŵele ŵakulondola ni kuti Ambuje akaŵisile Mbumu jakwe pachanya pao!" 30 Nipele che Musa ni aŵala achachekulu ŵa Ŵaisilaeli ŵausile ku chigono.

31 Kanyuma Ambuje Akunnungu ŵaichisye mbungo chisisimuchile, ŵaichisye ngwale kutyochela ku bahali ni kwatesya atule mungulugulu chigono, utaliche wa kilometa syejinji kosekose kusyungula chigono, ŵaliunjiche chiŵandika mita jimo kutyochela paasi. 32 Nipele, palyuŵa lilyolyo, muusi ni chilo, ni pa lyuŵa lyaaŵili lyakwe ŵandu ŵaliji ni masengo gakukumbikanya ngwale; nganapagwa mundu juŵasongangenye kupungula kilo elufu moja. Ŵaajanichile palipose mungulugulu chigono kuti ajumusye. 33 Nyama jili chiŵela jejinji, ni ŵandu akanaamale kulya Ambuje Akunnungu ŵaatumbilile ŵandu, ŵaaputile kwa iputiko yekulungwa kwannope. 34 Kwapele pamalo po paŵilanjikwe Kibiloti Hataava; ligongo kweleko ni kuŵaasichile ŵandu ŵaŵaliji ŵalukowo.

35 Kutyochela pele Kibiloti Hataava po ŵandu ŵajesile mpaka ku Haseloti, ŵaŵisile chigono chao ni kutama kweleko.