1 Ambuje Akunnungu ŵakungulwiche ni che Musa ku iŵata ya ku Moabu, pesi lusulo lwa Yolodani chiŵandika ni ku Yeliko, ŵasalile kuti, 2 "Mwasalile Ŵaisilaeli kuti malinga ni malo gitapegwe kuŵa gawo, chiŵape Ŵalawi misi jakutama ni malo gakulisisya kusyungulila misijo. 3 Misi jo tijiŵe jawo, nombewo chatame mwelemo ni malo gakulisisya tigaŵe kwaligongo lya ng'ombe ni ilango yao pamo ni inyama yao ine. 4 Malo gakulisisya ga mwelemo gatimwape Ŵalawi kusyungulila misi tigajenele kila upaande mita mia nne na hansini kutyochela ku makumba ga misijo. 5 Kwayele, malo ga kulisisya go tigaŵe ga mita mia tisa kila upaande wa musi, musi usyene tiuŵe pambindikati. Malogo tigaŵe malo gao gakulisisya kusyungulila misi jao. 6 Timwape Ŵalawi misi sita jakuutuchila mwati mundu aulagaga njakwe pangaŵa kwamele tautuchile kweleko. Pamo ni yeleyo, timwape misi jine alobaini na mbili. 7 Misi jitimwape Ŵalawi tijiŵe alobaini na nane; timwape misi jo pamo ni malo gakulisisya ilango. 8 Misi jitimwape Ŵalawi kutyochela ku malo ja Ŵaisilaeli tijiŵe malinga ni kukula kwa lukosyo; lukosyo lwekulungwa tilutyosye misi jejinji ni lukosyo lwenandi tilutyosye misi kanandi. Kila lukosyo tilityosye misi jakwe kwaligongo lya Ŵalawi malinga ni malo gatachipegwa gaŵe gawo."

9 Ambuje Akunnungu ŵaasalile che Musa kuti, 10 "Mwaasalile Ŵaisilaeli kuti katema patinjomboche lusulo lwa Yolodani ni kwinjila ku chilambo cha ku Kanaani, 11 tinsagule misi jati tijiŵe jakuutuchila mwati mundu aulagaga njakwe pangaŵa kwa mele tautuchile kweleko. 12 Misi jo tijiŵe malo jakuutuchila kuti jwele jwakuulaga jo akaulajikwa ni mundu jwakuuchisya akanaŵe kulichenjela pankungulu. 13 Tinjiŵichile misi sita kwaligongo lya kuutuchila. 14 Pa jele misi sita jitinjisagule jo, misi jitatu jiŵeje kungopoko lyuŵa kwa Yolodani ni misi jitatu jiŵeje pa chilambo cha ku Kanaani. 15 Misi ji tijiŵe jakuutuchila kwaligongo lya Ŵaisilaeli ni achalendo ŵakutama pasikati jenu, kuti mundu jwalijose jutaulaje mundu njakwe pangaŵa kwa mele akukombola kuutuchila mwelemo.

16 "Nambo mundu amputaga njakwe kwa chisyano, ni kuwa, mundu jo ali jwakuulaga, jwelejo nombe aulajikwe. 17 Mundu jwalijose amputaga njakwe ni liganga, awaga, mundu jo ali jwakuulaga, jwelejo nombe aulajikwe. 18 Iŵaga amputile njakwe kwa chitela chachikukombola kuulaga, awaga, mundu jo ali jwakuulaga, jwelejo nombe aulajikwe. 19 Nlongo njakwe mundu jwaulajikwe, tauchisye katema patasimane ni jwakuulaga jo, ammulaje nombe jo.

20 "Sooni iŵaga mundu akunchima njakwe kwa moŵa gamajinji, ni antutaga pane kumponya ni chindu pakunjuŵilila, 21 pane amputaga lingumi ni kuwa, nipele mundu jwamputile njakwe ni kummulaga jo, jwelejo nombe aulajikwe. Nlongo njakwe mundu jwaulajikwe tauchisye patasimane nawo.

22 "Nambo iŵaga mundu antutile njakwe chisisimuchile panganchima pane amponyaga chindu panganjuŵilila, 23 pane mundu aponyaga liganga lyalikukombola kuichisya chiwa, ni kummulaga mundu pangaŵa kwamele, nachiŵamuno nganaŵa jwammagongo jwakwe namose nganasaka kuti ammulasye, 24 nipele, nkungulu tiulamule pasikati ja mundu jwakuulaga jo ni nlongo njakwe mundu jwaulajikwe jwakusaka kuuchisya, malinga ni malamusi ga. 25 Nkungulu tiunkulupusye mundu jwauleje jo mmakono mwa nlongo njakwe mundu jwaulajikwe, ni kummusya ku musi wakuutuchila muŵautuchile. Chatame mwelemo mpaka patachiwa jwambopesi jwankulu jwasagulikwe pa katema ko kwakwajitilila mauta gagakuntendekasya mundu aŵe jwambopesi jwa Akunnungu. 26 Nambo jwauleje jo akopokaga paasa musi wautuchile pa katema kalikose, 27 nombe nlongo njake mundu jwaulajikwe ansimanaga paasa pa mipika ja musi wakuutuchila wo ni kummulaga, jwele mundu jo ngaakola magambo ga kuulaga. 28 Pakuŵa mundu jwauleje jo akusachilwa atame nkati mwa musi wakuutuchila mpaka jwambopesi jwankulu patawe; ni jwambopesi jwankulu awaga, jwakuulaga jo akukombola kuuja kumangwakwe. 29 Malajisyo ga tigatumiche pa iŵelesi yenu yose, pamalo palipose patintame.

30 "Mundu jwalijose jutaulaje mundu, talamulikwe chiwa kwa umboni wa ŵandu ŵaŵili pane kupunda, mundu jwalijose ngaikomboleka kulamulikwa chiwa kwa umboni wa mundu jumo. 31 Nkapochela malipilo galigose kuukulupusya umi wa mundu jwauleje, jwasimanikwe ni magambo ni kulamulikwa chiwa, mundu jo aulajikwe. 32 Nkapochela namose nkakunda malipilo galigose kutyochela kwa mundu jwautuchile ku musi wakuutuchila kuti aujile kutama kumangwakwe, jwambopesi jwankulu akanaŵe kuwa. 33 Mwatendaga yeleyo chinchitende chilambo chinkutama nachikane pakuŵapo une Ambuje Akunnungu nombe ngutama mwelemo. Kuulaga ŵandu kukuchitenda chilambo chikakundikwa ni une, ni ngapagwa mbopesi jajikukombola kuchitenda chilambo cho chikundikwe ni une, ikaŵe mundu jwauleje jo nombejo aulajikwe. 34 Nkachitenda chilambo chinkutama nachikane, pakuŵapo uneji Ambuje Akunnungu ngutama mwelemo; pakuŵapo uneji Ambuje Akunnungu ngutama pasikati jenu Ŵaisilaeli."