1 Ambuje Akunnungu ŵasaalile che Musa, 2 "Mwasagule ŵandu ajaule akachiuchilichisye chilambo cha Kaanani chingwapa Ŵaislaeli. Timunjausye mundu jumojumo kutyochela mu kila lukosyo, ni mundu jo aŵeje chilongola jwa lukosyo lwakwe."

3 Nipele che Musa ŵaapeleche ŵandu kutyochela ku chipululu cha Palani malinga ni malajisyo ga Ambuje Akunnungu. Ŵandu wose ŵaŵatumikwe ŵaliji ilongola ŵa ngosyo sya Ŵaisilaeli. 4 Meena gao ni aga: Kutyochela mu lukosyo lwa Lobeni, che Shammu mwana ju che Sakuli.

5 Kutyochela mu lukosyo lwa Simeoni, ŵampeleche che Shafati mwanache ju che Holi.

6 Kutyochela mu lukosyo lwa Yuda, ŵampeleche che Kalebu mwana ju che Yefune.

7 Kutyochela mu lukosyo lwa Isakali, ŵampeleche che Igali mwana ju che Yusufu.

8 Kutyochela mu lukosyo lwa che Efulaimu, ŵampeleche che Hoshea mwana jwa che Nuni.

9 Kutyochela mu lukosyo lwa Benjamini, ŵampeleche che Paliti mwana jwa che Lafu.

10 Kutyochela mu lukosyo lwa Sabuloni, ŵampeleche che Gadieli mwana jwa che Sodi.

11 Kutyochela mu lukosyo lwa Yusufu (Yaani lukosyo lwa che Manase), ŵampeleche che Gadi mwana jwa che Susi.

12 Kutyochela mu lukosyo lwa Dani, ŵampeleche che Amieli mwana jwa che Gemali.

13 Kutyochela mu lukosyo lwa Asheri, ŵampeleche che Setuli mwana jwa che Mikaeli.

14 Kutyochela mu lukosyo lwa Nafutali, ŵampeleche che Nabi mwana jwa che Wofisi.

15 Kutyochela mu lukosyo lwa Gadi, ŵampeleche che Geueli mwana jwa che Maki.

16 Gelega ni meena ga ŵandu ŵati che Musa ŵatumile kuti ajaule akachiulichisye chilambo cha Kanaani. Che Musa ŵampele che Hosea mwana jwa che Nuni liina lyampya, wammilasile che Yoshua.

17 Paŵatumile kwaula kukuuchilichisya chilambo cha Kanaani, che Musa ŵaasalile, "Kutyochela pelepa njaulangane chakumpoto ni kwinjila ku Negebu yaani chakulujenda kwa chilambo cha Kanaani, pakumala pelepo njendelechele mpaka ku chilambo cha itumbi, 18 nkachiuchilichisye chilambo cho chili chanti uli. Nkauchilichisye naga ŵandu ŵakutama mwelemo ali ni machili pane nganakola machili, atupile pane nganatupa. 19 Nkachiuchilichisye chilambo cho chili chambone pane ngaŵa chambone, ni iŵaga akutama mu igono pane mmajumba gesyunguchisye makome. 20 Mmuchilichisye nombe naga chilambo chisyene chana chajila pane ngwamba, naga china itela pane nganichikola itela. Nkajigale munkukombolela isogosi impepe ya kweleko." Katema ko kaliji katema ka kutanda kwiula sabibu. 21 Nipele, ŵandu wo ŵapite ni kuchiuchilichisya chilambo kutyochela ku chipululu cha Sini mpaka ku Lehobu, chiŵandi ni malo jakwinjilila ku Hamati. 22 Ŵapite mpaka ku Negebu, ŵapitile mpaka ku musi wa Hebuloni. Kwele ŵaasimene Ŵaahimani, Ŵasheshai ni Ŵatalimai, uŵelesi wa Ŵaanaki. Musi wa Hebuloni wataŵikwe yaka saba ukanaŵe kutaŵikwa musi wa Soani wauli ku chilambo cha Misili. 23 Paŵaiche ku lichemba lya Eshikoli, ŵandu wo ŵakatile chisagwa cha sabibu chichaliji ni isogosi yejinji ni chaliji chakutopa kwannope. Chisagwa cho chajigalikwe kwa chisanyasanya ni ŵandu ŵaŵili. Ŵagajigele ni makomamanga pamo ni tini. 24 Peuto po paŵilanjikwe Lichemba lya Eshikoli ligongo lya achila chisagwa chati Ŵaisilaeli ŵachikatile kutyochela peuto po.

25 Paŵamasile kuchiuchilichisya chilambo kwa moŵa alobaini ŵandu ŵala ŵausile. 26 Ŵaajaulile che Musa ni che Haluni ni nsongangano wose ku Kadeshi, ku chipululu cha Palani, ŵapeleche ngani ja indu yose iŵaiweni ni kwalosya isogosi iŵaijigele. 27 Ŵaasalile che Musa, "Twaiche ku chilambo chimwatutumile kuchiuchilichisya, chilambo chambone chachikufai kwa kulima ni kulanga, chisagwa chi chili isogosi ya kweleko. 28 Nambo, achinsyene chilambo wo akwete machili nnope ni misi jao jikusile nnope ni jisyunguchikwe ni makome. Kupunda yele, kweleko twaweni ŵandu ŵa uŵelesi u che Anaki. 29 Ŵaamaleki akutama ku Negebu. Ŵahiti ni Ŵayebusi pamo ni Ŵaamoli akutama ku chilambo cha itumbi ni Ŵakanaani akutama chiŵandi ni bahali ja Meditelania ni mungulugulu mwa lusulo lwa Yolodani."

30 Nambo che Kalebu ŵamyalesye ŵandu paujo pa che Musa achitiji, "Tujaule chitema tukachijigale chilambo cho chiŵe chetu. Pakuŵa tukwete ukombole wa kwapunda." 31 Nambo ŵandu ŵaŵalongene nao kukuuchulichisya chilambo ŵatite, "Ngatukombola kuputana ni ŵandu wo, ŵanyawo akwete machili kutupunda uweji." 32 Kwayele ŵajenesye ngani ja unami pasikati ja Ŵaisilaeli nkati chilambo chiŵachiuchilichisye achitiji, "Ŵandu ŵa chilambo cho akuulaga ŵandu ŵakwe. Nombe ŵandu wose twaŵaweni kweleko alewipe nnope. 33 Twaweni Ŵanefili, yaani mikammandu ŵa uŵelesi wa che Anaki kweleko. Uweji twaliweni nti itete paujo pao, ni ŵanyawo ni iŵatuwonaga uweji."