1 Ambuje Akunnungu ŵasalile che Musa kuti, 2 akunguluche ni Ŵaisilaeli, ŵasalile kuti patajinjile ku chilambo chingwapa kuti atame mwelemo, 3 akaambelechele une Ambuje Akunnungu mbopesi jakutinisya kutyochela mu mipingo ja ng'ombe syenu pane ngondolo, kuŵa ununjile wambone waukuunonyelesya une Ambuje Akunnungu, iŵaga jili mbopesi jakutinisya pane mbopesi, kwaligongo lya nasili pane sadaka sinkupeleka kwakusaka kwenu, pane sadaka sya indimba yenu. 4 Nipele ajula jwakupeleka sadaka jakwe, tambelechele une Ambuje Akunnungu mbopesi ja yakulya, kilo moja ja utandi wesyajiche yambone, weunye ni mauta ga miseituni lita jimo. 5 Pamo ni divai ja mbopesi ja yakung'wa lita jimo, indu yo chiityosekwe pamo ni kila chinyama cha mbopesi ja kutinisya, iŵeje ngondolo pane mbusi. 6 Katema ka kutyosya mbopesi ja ngondolo tonde chintyose pamo ni utandi kilo siŵili syeunye pamo ni lita moja na nusu ja mauta, yeleyo chiityosekwe iŵe mbopesi ja utandi, 7 pamo ni mbopesi ja yakung'wa lita jimo ni nusu ja divai ni kujitenda jiŵe ununjile wambone ja mbopesi jajikuunonyelesya une Ambuje Akunnungu. 8 Katema katimwatyochesye Ambuje Akunnungu ng'ombe nkambaku kuŵa mbopesi ja kutinisya pane mbopesi kuti ngopole nasili pane kwaligongo lya mbopesi sya chitendewele, 9 tintyosye ng'ombe nkambaku jo jiŵe mbopesi pamo ni mbopesi ja utandi wambone kilo sitatu ni lita siŵili sya mauta ga miseituni, 10 pamo ni lita siŵili sya divai jiŵe mbopesi ja yakung'wa. Jele mbopesi jakutinis jo tijinunjile yambone kwakuunonyelesya une Ambuje Akunnungu.

11 Yele ni indu itachiityosya pamo ni kila ng'ombe nkambaku pane ngondolo tonde pane mbusi tonde pane ngondolo jangakomala pane mbusi jangakomala talinganye kwanti nyi. 12 Kila chinyama chachikutyosekwa kuŵa mbopesi chityosekwe ni yele indu yaikulajichikwa yo. 13 Kila Mwisilaeli takuye malajisyo go katema pakujityosya mbopesi ja kutinisya kuŵa ununjile wambone waukuunonyelesya une Ambuje Akunnungu. 14 Naga kwana jwannendo jwakutama pamo ni ŵanyamwe kwa katema kakaleu pane moŵa gose, asakaga kutyosya mbopesi jakwe kwa kutinisya jiwe ni ununjile wambone waukuunonyelesya une Ambuje Akunnungu, mundu jo tatende malinga ni munkutendela ŵanyamwe. 15 Mu iŵelesi yose yaikwika, malajisyo gatingakuye ŵanyamwe ni jwannendo jwalijose jwakutama pamo ni ŵanyamwe, paujo pa Ambuje Akunnungu chinchiŵa yalumo. 16 Ŵanyamwe ni jwannendo tinlongoswe ni malajisyo gagogo.

17 Ambuje Akunnungu ŵansalile che Musa, 18 akunguluche ni Ŵaisilaeli ŵasalile kuti, katema katajinjile ku chilambo chingunjausya, 19 kila patichilya magowolo ga chilambo cho, tinsapule magowolo gampepe kuŵa mbopesi kwa une Ambuje Akunnungu. 20 Pankuteleka mikate, nkate wandanda wa milimbu ja utandi wenu tiityochekwe kuŵa mbopesi kutyochela peuto pakuputila magowolo. 21 Timundyochesye une Ambuje Akunnugu aji mbopesi ja milimbu ji mu iŵelesi yenu yose yaikwika.

22 Nambo iŵaga mundu talepele kukuya malajisyo gose gati une Ambuje Akunnungu ngumpa kwa litala li che Musa, 23 iŵaga mmoŵa gagakwika ŵandu talepele kukuya malajisyo gose gati une Ambuje Akunnungu naalajisye che Musa, 24 iŵaga aleŵile pangaŵa kwa mele, ni pangamanyilila ŵandu, nipele ŵandu wose tatyosye ng'ombe nkambaku umo wangakomala jiŵe mbopesi ja kutinisya, kuŵa ununjile wambone waukuunonyelesya une Ambuje Akunnungu, pamo ni mbopesi jakwe ja utandi ni yakung'wa malinga na malajisyo gangu. Iyoyo peyo ŵandu tachityosya mbusi tonde jimo jiŵe mbopesi jakutyosya sambi. 25 Jwambopesi tatende ujilanyo kwa ligongo lya Ŵaisilaeli wose, ni ŵanyawo talechelelwe, ligongo nganaleŵa kwamele, sooni aiche ni mbopesi ja kutinisya kwa Ambuje Akunnungu ni mbopesi jakutyosya sambi kwa ligongo lya chileŵo chao. 26 Ŵaisilaeli pamo ni achalendo ŵakutama nao, talechelelwe ligongo wose aŵalanjikwe pa chileŵo cho.

27 Mundu jumo atendaga sambi pangaŵa kwa mele, tatyosye mbusi jankolo ja chaka chimo jiŵe mbopesi jakutyosya sambi. 28 Jwambopesi tatende ujilanyo paujo pa Ambuje Akunnungu kwa ligongo lya mundu jwaleŵile pangaŵa kwamele, katema ujilanyo patiutendekwe kwaligongo lyakwe, mundu jo talechelelwe. 29 Lilamulo lyo tiliŵe kwa kila mundu jutaleŵe pagaŵa kwa mele, aŵeje Mwisilaeli pane jwannendo jwakutama pamo nawo.

30 Nambo mundu jwalijose jutaleŵe kwa mele, aŵeje Mwisilaeli pane jwannendo, taŵe akuntukana Ambuje Akunnungu, mundu jo aulajikwe. 31 Pakuŵa akanile aila yasasile Ambuje Akunnungu, nikutema lilamulo limo mu malamulo gakwe, mundu jo aulajikwe; chileŵo chakwe chichiŵe pa nsyene jo.

32 Lyuŵa limo katema Ŵaisilaeli paŵaliji mwipululu, ŵamweni mundu jumo ali nkulokota sasu pa lyuŵa lya Kupumulila. 33 Nipele, ŵanjawisye mundu jo paujo pa che Musa ni che Haluni ni pa ŵandu wose. 34 Ŵammisile mu chitaŵiko pakuŵa nganiimanyika yambone itajile kuntendela mundu jwanti yele. 35 Pelepo Ambuje Akunnungu ŵansalile che Musa, "Mundu ju aulajikwe, kwa kuputikwa ni maganga paasa pa chigono." 36 Nipele, ŵandu ŵantyosisye paasa chigono ŵamputile ni maganga mpaka kuŵa, mpela Ambuje Akunnungu iŵatite kwalajisya che Musa.

37 Ambuje Akunnungu ŵansalile che Musa, 38 ŵasalile Ŵaisilaeli kuti, "Nlipanganyichisye iundo mumbali mwa yakuwala yenu, ni iundo yo iŵe ni usi wa chibuluu. Ntendeje yele mu iŵelesi yenu yose yaikwika. 39 Iundo yo tiiŵe chikumbuchisyo kukwenu. Kila patinchiiwona tinkumbuchile malajisyo gangu gose ni kugakuya, kuti nkaika kukuya inkuisaka mwachinsyene ni aila inkuiwona kwa meeso genu mwachinsyene. 40 Iundo yo tiinkumbusye malamulo gangu gose ni tingakuye gose kwa utindimisyo, ni ŵanyamwe tinchiŵa ŵandu ŵangu kusyene. 41 Une ndili Ambuje Akunnungu, Akunnungu ŵenu unantyosisye ku chilambo cha ku Misili kuti me Akunnungu ŵenu. Une ndili Ambuje Akunnungu, Akunnungu ŵenu."