1 Ambuje Akunnungu ŵaasalile che Musa, 2 ŵape Ŵaisilaeli malajisyo ga: Iŵaga jwankongwe pane jwannume taŵiche nasili kwa kulumbila, nasili ja kulityosya nsyene kwa ligongo lya Ambuje Akunnungu, 3 nipele, ngasang'wa divai namose nkologo, ngasang'wa chakungwa chachilichose chekolochekwe kutyochela ni sabibu pane chakung'wa chichilichose chakuŵaŵa, ngasang'wa meesi ga sabibu namose kulya sabibu syejiu pane syejumu. 4 Katema kose katachiŵa mu nasili ngasalya chilichose chachikutyochela ni msabibu, iŵeje mbeju atamuno makoŵa gakwe.

5 "Moŵa gose ga nasili jakwe ja kuliŵika pajika kwaligongo lya Ambuje Akunnungu, ngaamyola umbo syakwe mpaka pachamalichisye ndaŵi sya nasili jakwe ja kuliŵika pajika kwa ligongo lya Ambuje Akunnungu, taŵe jwakwe Ambuje Akunnungu, tasilechelele umbo syakwe sileupe. 6 Moŵa gose pataliŵiche aŵe ŵa Ambuje Akunnungu, mundu jo akaŵandichila malilo, 7 atamuno gaŵeje malilo ga atati ŵao pane achikulugwe, alongo pane alumbugwe akaika kulinyakasya pakuŵa chilosyo cha kuliŵika pajika kwa ligongo lya Ambuje Akunnungu chili muntwe mwakwe. 8 Katema kose katachiŵa mu nasili tachiŵa jwakwe Ambuje Akunnungu."

9 "Iŵaga mundu jwalijose awile chisisimuchile chiŵandika najo ni kusitenda umbo syakwe syagosile kwaligongo lya Ambuje Akunnungu sikakundikwa, tamyole pa lyuŵa lyakuswejeswa, yaani pa lyuŵa lya saba. 10 Pa lyuŵa lya nane tapeleche njuŵa siŵili pane ngunda siŵili sya mwana kwa jwambopesi pa nnango wa Lisakasa lya Kusimanilana kwaligongo lya Akunnungu. 11 Jwambopesi tatyosye jimo jakwe jiŵe mbopesi ja kutyosya sambi ni jine jiŵe mbopesi ja kutinisya, nombejo tantendele ujilanyo, pakuŵa ŵatesile sambi kwa kugaŵandichila malilo. Lyuŵa lilyolyo, tauswejesye ntwe wakwe kwaligongo lya Akunnugu. 12 Talityosye sooni kwa ligongo lya Ambuje Akunnungu kwa moŵa galagala gaŵaliŵichile nasili kuundanda. Moŵa ga ndanda go ngagaŵalanjikwa pakuŵa umbo syakwe syeleu sinyakeswe. Pakuti alityosye sooni kwa Ambuje Akunnungu tatyosye ngondolo tonde jamwana ja chaka chimo jiŵe mbopesi kwalogongo lya chileŵo cho."

13 "Lyele lili lilamulo lya mundu jwaŵisile nasili katema pachamale kutindimisya moŵa gakwe ga kuliŵika pajika kwaligongo lya Ambuje. Tannyichisye pa nnango wa Lisakasa lya Kusimanilana kwaligongo lya Akunnungu, 14 ni kwatyochesya Ambuje Akunnungu inyama yangalema kuŵa mbopesi: Tonde ja ngondolo jamwana ja chaka chimo kwa ligongo lya mbopesi ja kutiniswa, ngondolo jankolo ja chaka chimo kwa ligongo lya mbopesi ja sambi, ni ngondolo tonde kwa ligongo lya mbopesi ja chitendewele, 15 pamo ni mbopesi ja utandi ni ja yakung'wa, ni chitundu chachili ni mikate jangataga amila, ni maandasi ga utandi wesyajiche yambone wewanganye ni mauta, ni mikate jakunyilila jepache mauta."

16 "Jwambopesi tantyochesye Ambuje Akunnungu indu yose yo pamo ni mbopesi jakwe ja sambi ni mbopesi ja kutinisya. 17 Tantyochesye Ambuje Akunnungu ngondolo nti mbopesi ja chitendewele pamo ni chitundu chachili ni mikate jangataga amila ni mbopesi ja utandi ni mbopesi ja yakung'wa. 18 Pannango wa Lisakasa lya Kusimanilana kwaligongo lya Akunnungu, jwanasili jo tamyole umbo syakwe ni kusitaga pa mooto wauli paasi ja mbopesi ja chitendewele."

19 "Nipele jwambopesi tajigale likoyo lya ngondolo tonde jila lili lyeteleche pamo ni liandasi limo pamo ni nkate wakunyilila kutyochela mu chitundu, yose yangataga amila, ni kumpa jwa nasili jula, amalaga kumyola umbo syakwe. 20 Nipele jwambopesi tainyakule indu yo kuŵa mbopesi ja kunyakula paujo pa Ambuje Akunnungu; yose yo ili yeswela kwa jwambopesi pamo ni chidali chenyakule ni chiiga chetyosyekwe kuŵa mbopesi. Pakumala yele yose jwa nasili akukombola kung'wa divai."

21 "Gelega ni malamulo kwaligongo lya mundu jwaŵisile nasili juŵalumbilile kwichisya yakupeleka kwa Ambuje Akunnungu. Akukombola kuichisya yakupeleka yakupunda kwa iŵaga akupakombola nambo akusachilwa aichisye kila chindu chalanjile paŵalumbilile paŵaŵikaga nasili jawo."

22 Ambuje Akunnungu ŵaasalile che Musa, 23 "Mwasalile che Haluni ni achiŵanagwe kuti, yele ni itinjile pakwapa upile Ŵaisilaeli:

24 Ambuje Akunnungu ampe upile ni kungosa;

25 Ambuje Akunnungu annolechesye kwa umbone wakwe ni kuntendela yaili yambone;

26 Ambuje Akunnungu annosye chanasa chakwe ni kumpa chitendewele."

27 Kwayele Ambuje Akunnungu ŵatite, "Iŵaga che Haluni ni achiŵanagwe tachimenda une kuti naape upile Ŵaisilaeli, tinjapa upile."