1 Ambuje Akunnungu ŵaasalile che Musa, 2 "Mwasalile che Haluni kuti katema kachimmiche aila imuli saba mu chindu chakuŵichila imuli, ikusachilwa imulichile kulangusya cha kummbujo kwa chindu chakuŵichila lumuli." 3 Che Haluni ŵatesile yeleyo, ŵaiŵisile imuli yo imulichile cha kummbujo kwa chindu chakuŵichila lumuli, mpela Ambuje Akunnungu iŵatite pakwalajichisya che Musa. 4 Yele ni iyatite kukolochekwa chindu chakuŵichila lumuli; Chakolochekwe kwa sahabu jesyane kutandilila ku chitamilo chakwe mpaka pa uluwa wakwe. Chindu chakuŵichila lumuli cho chakolochekwe malinga na chisyasyo chati Ambuje Akunngu ŵaalosisye che Musa.

5 Sooni Ambuje Akunnungu ŵaasalile che Musa, 6 "Mwaŵiche pajika Ŵalawi kutyoka kwa Ŵaisilaeli, ni mwatende akundikwe kwa masengo gakupopelela. 7 Yeleyi ni yachintende: Timwanyuluchisye meesi ga kwaswejechesya, nipele mwasalile amyole chiilu chose, achape yakuwala yao kwayele chaŵe ŵasalele. 8 Nipele tinjigale ng'ombe nkambaku jangakomala pamo ni mbopesi jakwe ja utandi wesyajiche yambone wewanganye ni mauta ga miseituni, ni mmwe tinjigale ng'ombe nkambaku wine kwa ligongo lya mbopesi jakutyosya sambi. 9 Timwasonganganye Ŵaisilaeli wose ni kwaichisya Ŵalawi ajime paujo pa Lisakasa lya Kusimanilana kwaligongo lya Akunnungu. 10 Patimwaichisye Ŵalawi kwima paujo pangu, Ŵaisilaeli tiŵasajichile makono pa mitwe, 11 nipele che Haluni taachaŵika ŵanyawo mbujo nti mbopesi jakunyakula kutyochela kwa Ŵaisilaeli kuti andumichile. 12 Nipele, Ŵalawi taŵiche makono gao pa mitwe ja ngombe mikambaku jiŵili jo. Jumo timuntyosye aŵe mbopesi jakutyosya sambi, ni jine timuntyosye aŵe mbopesi jakutinisya, kuti ntendele ujilanyo kwa ligongo lya Ŵalawi."

13 "Nipele timwajimiche Ŵalawi paujo pa che Haluni ni achiŵanagwe, nipele timwatyose nti mbopesi ja kunyakula kukwangu. 14 Yele ni itimwaŵiche pajika Ŵalawi pasikati ja Ŵaisilaeli ŵane kuti aŵe ŵangu. 15 Pakumala kwatenda aŵe ŵakukundikwa kwa mapopelelo Ŵalawi ni kwatyosya nti mbopesi ja kunyakula tajinjile kuti andumichile mu Lisakasa lya Kusimanilana. 16 Ŵanyawo atyosyekwe kukwakungu kusyenesyene, pamalo pa ŵakwitiwo ŵa Ŵaisilaeli. 17 Pakuŵa ipago yaandanda yose pasikati ja Ŵaisilaeli ali ŵangu une, iŵeje ŵandu pane inyama; ligongo panauleje ŵanache ŵa kwitiwo wose ŵa pa Misili naaŵisile ŵanyawo pajika aŵe ŵangu nansyene. 18 Sambano naajigele Ŵalawi pamalo pa ipago ya kwitiwo ya Ŵaisilaeli, 19 ni naapele che Haluni ni achiŵanagwe nti ntuka kutyochela kwa Ŵaisilaeli, kuti atende masengo mu Lisakasa lya Kusimanilana kwa ligongo lya Ŵaisilaeli ni kwatendela ujilanyo, kuti pakatyochela yangalumbana yaikukombola kwaputa Ŵaisilaeli patachiŵandichila peuto papaswela."

20 Kwayele che Musa ni che Haluni ni nsongangano wose wa Ŵaisilaeli ŵatyosisye Ŵalawi aŵe ŵa Ambuje Akunnungu, mpela Ambuje Akunnungu iŵatite pakwalajisya che Musa. 21 Ŵalawi ŵaliswejesye sambi syao ni kuchapa yakuwala yao, che Haluni ŵaatyosisye nti mbopesi ja kunyakula paujo pa Ambuje Akunnungu. Nombe che Haluni ŵatesile ujilanyo kwa ligongo lya kwaswejesya. 22 Pakumala yeleyo, Ŵalawi ŵatandite kupanganya masengo gawo pa Lisakasa lya Kusimanilana kwaligongo lya Akunnungu kwakuimililwa ni che Haluni ni achiŵanagwe, mpela Ambuje Akunnungu iŵalajisye che Musa.

23 Ambuje Akunnungu ŵaasalile che Musa, 24 "Kila Mlawi jwannume jwali ni yaka ishilini na tano pane kupunda, tatumichile pa Lisakasa lyangu lya Kusimanilana, 25 nambo pataichile lisusa lya yaka hansini akajendelechela kupanganya masengo. 26 Pelepo akukombola kwakamusya Ŵalawi achinjao patachitumichila pa Lisakasa lya Kusimanilana kwaligongo lya Akunnungu, nambo jwalijose ngaakundikwa kutumichila jika. Yele ni itimwapanjile masengo Ŵalawi."