1 Chitabu chi chana maloŵe ga che Musa gaŵaasalile Ŵaisilaeli katema kaŵaliji mwipululu kungopochelo lyuŵa kwa lusulo lwa Yolodani. Ŵaliji ku lichemba lya Yolodani chiŵandi ni malo jajikuŵilanjikwa Sufu, upaande umo kwaliji ni musi wa Palani ni upande wine kwaliji ni misi ja Tofeli ni Labani, ni Haseloti ni Disahabu. 2 Lwendo lwa moŵa kumi na moja kutyochela ku chitumbi cha Holebu pane chikuŵilanjikwa chitumbi cha Sinai, mpaka ku Kadeshi Balinea kwa litala lyalikupitila mmatumbi gagakuŵilanjikwa Seili. 3 Chaka cha alobaini pa lyuŵa lya ndanda lya mwesi wa kumi na moja pakumala kutyoka ku Misili, Che Musa ŵaasalile ŵandu indu yose iŵalajiswe ni Ambuje Akunnungu kuti ŵaasalile. 4 Yelei yaliji pakumala Ambuje Akunnungu kwapunda che Sihoni mwenye jwa Ŵaamoli, juŵatawalaga musi wa ku Heshiboni, ni mwenye che Ogu jwa ku Bashani juŵatawalaga misi ja ku Ashitaloti ni ku Edilei. 5 Paŵaliji kungopochelo lyuŵa kwa lusulo lwa Yolodani ku chilambo cha ku Moabu, Che Musa ŵatandite kwasalila ŵandu malamusi ga Akunnungu.

Waasalile yeleyi, 6 "Patwaliji kuchitumbi cha Sinai kula, Ambuje Akunnungu ŵetu ŵatusalile kuti, ‘Ntemi katema kakaleu pachitumbi pa, sano ikwanile. 7 Sambano ntyokangane, njendelechele ni ulendo wenu mpaka ku chilambo cha matumbi ga Ŵaamoli ni ku ilambo yaiŵandichile ku Alaba, kwakuli ni itumbi ni machemba ni kwele ku Negebu ni mu mbwani mose. Njaule mpaka chilambo cha Kanaani ni ku Lebanoni, mpaka lusulo lwekulungwa lwalukuŵilanjikwa Eufulate. 8 Nnole nampele chilambo chi ŵanyamwe. Mpela une Ambuje Akunnungu inatite pakwalumbilila achachekulu ŵenu che Abulahamu ni che Isaka, che Yakubu ni uŵelesi wao. Njinjilanje mwelemo nkatame ni kuchitenda chiŵe chenu.’ "

9 Che Musa ŵaasalile ŵandu kuti, "Katema katwaliji chiŵela pachitumbi cha Sinai, une nansalile kuti, ‘Masengo gakunnongosya ŵanyamwe gandopile. Ngangukombola jika. 10 Ambuje Akunnungu, Akunnungu ŵenu, antesile mme achajinji, lelo ntupile mpela ndondwa sya kumaunde. 11 Ambuje Akunnungu ŵa achambuje ŵenu, antende kuwa achajinji maelufu kwa maelufu, ipunde yantite kuŵa sano ni kumpa upile mpela iŵatite kulanga! 12 Nambo une jika chingombole chinauli kuchenjeuchila masauko genu? 13 Mwasagule ŵandu ŵaali ni lunda, ni umanyilisi, ni ŵakuchimbichikwa, kutyochela mu ngosyo syenu, none chinaatende aŵe ilongola ŵenu.’ 14 Mwanyamwe mwajanjile kuti, ‘Chindu chinsasile chili chambone kukwetu.’ 15 Nipele naajigele ilongola ŵenu ŵaali ni lunda, ni ŵakuchimbichikwa, umwasagwile kutyochela mu ngosyo syenu, natesile kuŵa ilongola ŵenu. Naaŵisile ŵane aŵe ilongola ŵa ŵandu elufu moja, ni ilongola ŵa ŵandu mia moja, ni ilongola ŵa ŵandu hansini, ni ilongola ŵa ŵandu likumi. Naasagwile achakulu ŵane ŵakwimilila ŵandu mu kila lukosyo."

16 "Patwaliji pepala, naasalile ŵakulamula ŵenu, ‘Ngapikanile magambo ga achalongo ŵenu, nkalamule pangali lusagu, iŵeje pasikati ja Mwisilaeli ni Mwisilaeli pane Mwisilaeli ni jwanlendo jwakutama pasikati jao. 17 Pankulamula nkaŵa ni lusagu, mwapikanile wosepe yalumo, jwankulungwa atamuno mwanache. Nkanjogopa mundu jwalijose, pakuŵa ulamusi unkutyosya ukutyochela kwa Akunnungu. Ligambo lyalililyosye lyannemaga mumbelechele une, none chinalilamule.’ 18 Kele katema ko nansalile kila chindu chinkusachilwa kupanganya."

19 "Nipele, mpela Akunnungu, Akunnungu ŵetu iŵatulamwile uwe, twautandite ulendo wetu kutyochela kuchitumbi cha Holebu, twapitile ku chipululu chachikulungwa chakogoya chimwachiweni chila, twapitile litala lyalikwaula kuchilambo cha matumbi ga Ŵaamoli. Patwaiche ku Kadesh Balinea, 20 une nansalile, ‘Sano nnyiiche pachilambo cha matumbi ga Ŵaamoli, chilambo chaatupele Ambuje Akunnungu, Akunnungu ŵetu. 21 Nnole, Ambuje Akunnungu, Akunnungu ŵenu akumpa chilambo chachili mbujo mwenu, Hayaga! Nkajinjile chikaŵe chenu mpela Ambuje Akunnungu ŵa achachekulu ŵenu iŵatite pakunsalila. Nkajogopa namose nkapwa ntima!’"

22 "Nipele wose mwanyichilile ni mwaasalile, ‘Twatume ŵandu, akachiuchilichisye chilambo, sooni auje kutusalila litala lyambone lyachitupite, ni misi jachitujijaulile yajitite kuŵa.’"

23 "Liloŵe li lyanonyele une, nipele, naasagwile ŵandu kumi na mbili, mundu jumo kutyochela mu kila lukosyo. 24 Ŵandu wo ŵapite kuchilambo cha matumbi, ŵaiche kulichemba lya Eshikoli ni ŵachiulichisye. 25 Paŵausile, ŵatujigalile isogosi impepe iŵakaŵile kuchilambo kula ni ŵatusalile kuti chilambo chaakutupa Ambuje Akunnungu, Akunnungu ŵetu chili chambone."

26 "Nambo mwanyamwe mwagakanile malajisyo ga Ambuje Akunnungu, Akunnungu wenu, ni nganinjaula kuchilambo kula. 27 Mwalalataga ndi mmasakasa genu, mwatiji, ‘Ambuje akutuchima uwe, lyele ni ligongo atutyosisye ku chilambo cha ku Misili kuti ŵaatende Ŵaamoli atukamule ni kutuulaga. 28 Kwachichi tujaule kweleko tuli tupwele mitima kwa lipamba? Atusalile kuti ŵandu ŵa kweleko ali makammandu, sooni atupundile uleu, ni misi jao jikusile ni jesyunguchisye makumba gamaleu kuichila kumaunde. Sooni ŵatite kuti ŵaaweni makammandu, yaani uŵelesi wa Ŵaanaki!’"

29 "Nambo nansalilenje kuti, ‘Nkakola lipamba namose ngasimwajogopanga.’ 30 Ambuje Akunnungu, Akunnungu ŵenu ŵakunnongolela chamenyane nawo kwaligongo lyenu mpela iŵatite pakuntendela nli nkulola pamwaliji ku Misili kula, 31 ni kulipululu kula. Mwaweni Ambuje Akunnungu iŵatite kunjigala ni kunnyichisya pangali masausyo mpela atati yakuti kunjangata mwanagwe mpaka ŵannyichisye apano. 32 Atamuno ŵagatesile gele gosego, ŵanyamwe nganimwakulupilila Ambuje Akunnungu, Akunnungu ŵenu, 33 juŵannongwesye mu ulendo wenu ni kunsosela liuto limwaŵisile chigono chenu. Chilo ŵannongwesye kwa luchanamila lwa mooto ni musi ŵannongwesye kwa luchanamila lwa liunde kuti annanjile litala."

34 "Ambuje Akunnungu ŵapilikene kudandaula kwenu, yaachimile, ŵalumbilile achitiji, 35 ‘Ngapagwa mundu jwalijose mu uŵelesi wa chigongomalo wu juchajinjile mu achila chilambo chambone chinaalumbilile kwapa achachekulu ŵenu. 36 Che Kalebu mwana ju che Yefune jikape ni juchajinjile mu chilambo cho, none chinaape chilambo chaaliŵete cho chiŵe chakwe ni uŵelesi wakwe ligongo ali jwakukulupilichika kukwangu.’ 37 Ambuje Akunnungu ŵandumbilile ni une jwakwe ligongo lyenu mwanya, ŵatite, ‘Atamuno mmwe che Musa nganjinjila mu chilambo cho. 38 Nambo nkamusi jwenu che Yoshua mwana ju che Nuni, tajinjile mwelemo. Nipele mwalimbisye ntima pakuŵa jwelejo ni jutiŵalongosye Ŵaisilaeli akachijigale chilambo cho chiŵe chao.’"

39 "Sooni Ambuje Akunnungu ŵatusalile uwe ŵanawose, ‘Aŵala ŵanache ŵenu umwatite kuti chajigalikwe mateeka, yaani ŵanache ŵali achanandi ŵangakuimanyilila yaili yambone pane yangalimate, ŵanyawo ni ŵatajinjile mu chilambo cho. Une chinape chilambo cho kuti chiŵe chao. 40 Sambano ŵanyamwe ngalauche mmujangane ku lipululu kwa litala lyalikwaula ku bahali ja Shamu.’"

41 "Nipele mwanyanjile kuti, ‘Uwe twaleŵele Ambuje Akunnungu, Akunnungu ŵetu nambo sano tutujaule kukumenyana mpela Ambuje Akunnungu, Akunnungu ŵetu yatite kutulajisya.’ Nipele kila mundu ŵajigele yakumenyanila ngondo, nchiganisyaga kuti ngailema kuchigunguchila chilambo cha matumbi cho."

42 "Nambo Ambuje Akunnungu ŵasalile, ‘Mwasalile ŵandu wo akajaula ku ngondo ko pakuŵa une ngama nao pamo. Chinkaputikwe ni ŵammagongo ŵao.’ 43 Nipele nansaalile, nambo nganimumbikanila. Mwakanile kugakuya malajisyo ga Ambuje Akunnungu, kwa chibuli chenu mwajawile kuchilambo cha matumbi. 44 Pelepo, Ŵaamoli ŵaŵatamaga ku liuto lya matumbi lyo ŵatulwiche kukwagunguluchila ni kwatopola mpela ŵandu ŵakutopolwa ni nyuchi, mpaka ku Seili ni kwapunda ku musi wa ku Holima. 45 Ni pamwausile, mwalisile kwa Ambuje Akunnungu, nambo nganampikanila namose nganankosya."

46 "Kwayele mwatamilisye nnope ku Kadeshi ko, malinga ni moŵa gamwatemi kweleko."