1 "Munchimbichisye Ambuje Akunnungu, Akunnungu ŵenu, kwa kuntendela chindimba cha Pasaka pa mwesi wa Abibu, yaani mwesi waandanda wa chaka, pakuŵa pa mwesi wo ŵantyosisye ku Misili katema ka chilo. 2 Chinchityosya mbopesi ja Pasaka kutyochela mu ilango yenu ya ngondolo ni ng'ombe peuto patachisagula Ambuje Akunnungu kuti paŵe malo ga kwapopelela. 3 Nkalya nyama jo ni mikate jetaje amila kwapamo. Mmoŵa saba chinchilya mikate jangataga amila, jele mikate jo jikuŵilanjikwa mikate ja masauko pakuŵa mwatyosile ku Misili mwakwanguya, kwayele, moŵa gose pachintame chinkumbuchile lyuŵa limwatyosile ku Misili. 4 Jikapagwa amila mu chilambo chenu mmoŵa saba. Nyama jajilijose jichinjityose mbopesi ligulo lya lyuŵa lyandanda nkajisigasya mpaka kundaŵi."

5 "Nkatyochesya mbopesi ja Pasaka mu musi wauliwose wampele Ambuje Akunnungu, Akunnungu ŵenu, 6 ikaŵe malo gati asagwile Ambuje Akunnungu, Akunnungu ŵenu, kuti gawe malo ga kumpopelela. Pelepo ni pachintyose mbopesi ja Pasaka, ligulo katema kalikutiŵila lyuŵa, katema kalakala kamwatyosile ku Misili. 7 Nteleche nyama jo ni kulila pamalo paasagwile Ambuje Akunnungu, Akunnungu ŵenu, ni kundaŵi jakwe chimmuje ku chigono kwenu. 8 Mmoŵa sita chinchilya mikate jangataga amila ni palyuŵa lya saba ntende nsongangano kwaligongo lya kwapopelela Ambuje Akunnungu, Akunnungu ŵenu, ni nkapanganya masengo galigose pa lyuŵa lyo."

9 "Mmalanje ijuma saba kutyochela pankutanda kugungula magowolo. 10 Nipele ntende Chindimba cha Ijuma kwa luchimbichimbi lwa Ambuje Akunnungu, Akunnungu ŵenu, kwa kwatyochesya sadaka kwa usache wenu malinga ni intite kupegwa upile ni Ambuje Akunnungu, Akunnungu ŵenu. 11 Njangale paujo pa Ambuje Akunnungu, Akunnungu ŵenu, ŵanyamwe ni achachanda ŵenu ni achiŵali ŵenu ni achikapolo ŵenu ni ŵakutumichila ŵenu ni Ŵalawi ŵali mu misi jenu ni achalendo ni ŵamalekwa pamo ni achakongwe ŵawililwe ni ŵankwakwe ŵaali pasikati jenu. Nkatende yeleyo pamalo patasagule Ambuje Akunnungu, Akunnungu ŵenu kuti mwapopelele. 12 Nkumbuchile kuti mwaliji achikapolo ku Misili, nipele ngajitichisye malajisyo ga kwakulilochesya."

13 "Kila chaka pachimmale kugasonganganya magowolo genu ni kuminya sabibu syenu, ntende Chindimba cha Masakasa kwa moŵa saba. 14 Njangale mu chindimba cho, ŵanyamwe ni achachanda ŵenu ni achiŵali ŵenu ni achikapolo ŵenu pamo ni ŵakutumichila ŵenu, ni Ŵalawi ni achalendo pamo ni ŵamalekwa ni achakongwe ŵaŵililwe ni achiŵankwawo ŵaali mu misi jenu. 15 Kwa moŵa saba chintende chindimba chakunchimbichisya Ambuje Akunnungu, Akunnungu ŵenu pa malo patapasagule Ambuje Akunnungu, Akunnungu ŵenu. Pakuŵa Ambuje Akunnungu, Akunnungu ŵenu tachimpa upile mmagowolo genu ni mmasengo gankugapanganya kwa makono genu, ni pelepo kusengwa kwenu tikumalile."

16 "Kila jwannume taachika katatu pachaka paujo pa Ambuje Akunnungu, Akunnungu ŵenu, pamalo patapasagule, ku Chindimba cha Mikate jangataga amila ni ku Chindimba cha Ijuma ni ku Chindimba cha Masakasa. Mundu jwalijose akaika makono pe paujo pa Ambuje Akunnungu. 17 Kila mundu atyosye yakuti kukombola, malinga ni yatite kupegwa upile ni Ambuje Akunnungu, Akunnungu ŵenu."

18 "Chinsagule ŵakulamula ni achikamusi ŵao pa kila lukosyo, mu misi jose jakumpa Ambuje Akunnungu, Akunnungu ŵenu, nombewo chiŵalamule ŵandu pangali lusagu. 19 Nlamule yaikuti kusachilwa namose kutenda lusagu. Nkapochela hongo pakuŵa jelejo jikwataga chiputa ŵandu ŵaali ni lunda ni kwatendekasya ŵakulamula alamule yangaikusachilwa kwa ŵandu ŵangali chileŵo. 20 Nlamule ni kuikuya yakuisaka Akunnugu pe, kuti nkatame ni kuchitenda chenu chilambo chakumpa Ambuje Akunnungu, Akunnungu ŵenu."

21 "Pachintaŵe chilisa chakutyochesya mbopesi kwa Ambuje Akunnungu, Akunnungu ŵenu, nkachijimika chiŵandi pao chinyago cha nnungu jwankongwe Ashela. 22 Namose nkajimika chanamila sya liganga kwaligongo lya kujipopelela minungu, pakuŵa Ambuje Akunnungu, Akunnungu ŵenu, akusichima chanamila syo."