Deuteronômio 33

Che Musa akwapa upile ngosyo sya Ŵaisilaeli

1 Weleu ni upile ŵati che Musa ŵapele Ŵaisilaeli akanaŵe kuwa.

2 Ŵatite: Ambuje Akunnungu ŵaiche kutyochela pa chitumbi cha Sinai,

ŵakopochele nti lyuŵa lyaikuti kukopochela, pachanya pa chitumbi cha Seili;

ŵaalanguchisye ŵandu ŵakwe kutyochela pachitumbi cha Palani.

Ŵaiche pamo ni achikatumetume ŵakwinani elufu kumi,

ni lilamba lili nkukolela pankono wao wakunlyo.

3 Ambuje Akunnungu, akwanonyela ŵandu ŵakwe;

ni kwalindilila aŵala ŵaali ŵakwe.

Kwayele, achikatumetume ŵa kwinani akugona manguku paujo pa Ambuje Akunnungu,

ni kugapikanila malajisyo gakwe.

4 Che Musa ŵatulamwile kuti tupilikanichesye malajisyo;

chili chindu cha ntengo wekulungwa nnope mu chilambo chetu.

5 Ambuje Akunnungu, ŵaliji mwenye jwa Ŵaisilaeli,

katema ilongola ni ngosyo syose paŵasongangene pamo,

6 Che Musa ŵaŵechete maloŵe gakwalumba lukosyo lwa Lubeni:

"Lukosyo lwa Lubeni lukawa,

ni ŵandu ŵakwe, akaŵa ŵandu kanandi."

7 Nkati lukosyo lwa Yuda ŵasalile kuti,

"Ŵalakwe Ambuje Akunnungu, mpilikanile kulila kwa ŵandu ŵa Lukosyo lwa Yuda;

mwalumbikanye sooni ni ŵandu ŵa ngosyo sine sya ku Isilaeli.

Mputane kwaligongo lyao,

mwakamuchisye pakumenyana ni ŵammagongo ŵao."

8 Upile kwa lukosyo lwa Lawi, ŵatite kuti:

"Alakwe Ambuje Akunnungu, mwape ŵandu ŵa lukosyo lwa Ŵalawi chinkusala kwa Tumimu ni Ulimu,

ŵele ŵandu ŵaali ŵakukulupilichika umwalinjile kwele ku Masa pa meesi,

ni kulimbana nao pa mesi ga Meliba.

9 Ŵele ŵandu ŵa lukosyo lwa Ŵalawi ŵalosisye kukulupilichika kwakukulungwa kukwenu kupunda kwa achaŵelesi ŵao ni achalongo achinjawo pane achiŵana ŵao,

ŵajitichisye lilajisyo lyenu ni aŵele ŵakukulupilichika pa lilangano lyenu.

10 Ni chiŵajiganye ŵandu ŵenu kulipilikanichisya lilajisyo lyenu;

chantyochesye mbopesi syakutinisya pachilisa penu.

11 Alakwe Ambuje Akunnungu, mwape upile akole ni machili,

nomwe nganonyele masengo gakugapanganya,

mwatende ŵammagongo ŵao akakola machili,

mwapatusye akajimuka sooni."

12 Upile kwa lukosyo lwa Benjamini ŵatite,

"Lwelelu ni lukosyo lwakulunonyela Ambuje Akunnungu, ni kululindilila

nombelo lukutama salama pachiŵandi nao,

Ambuje Akunnungu akulugosa muusi wose,

nombejo akutamanga pasikati jawo."

13 Yankati lukosyo lwa Yusufu ŵatite:

"Ambuje Akunnungu achipe upile chilambo chao,

kwa upile wa ula ni meesi gagakutyochela paasi,

14 chilambo chao chikole upile kwa isogosi yambone yaikupagwa katema ka lyuŵa,

ni ikole isogosi yejinji pa kila katema;

15 ni mmatumbi gakwe ga chikala, gagumbele magungulo gambone,

16 chilambo chao chigumbaswe ni indu yose yambone, indu yambone yaipele upile Ambuje Akunnungu,

Ŵelewo ŵaŵechete kutyochela pa chisukutu chichakolelaga mooto,

au upile wu wasimane ŵandu ŵa lukosyo lwa Yusufu.

Juŵaliji chilongola pasikati ja achapwakwe,

17 Che Yusufu akwete machili mpela ng'ombe nkambaku,

maŵengwa gakwe gali mpela ga tonde ja njati.

Chagapanganyichisye masengo ga kututa ŵandu ŵa ilambo ine

chiŵaatute mpaka kuchipelele chilambo.

Che Efulaimu chaŵe ni maŵengwa go elufu kumi

nombe che Manase chaŵe ni maŵengwa go maelufu."

18 Yankati lukosyo lwa Sabuloni ni lukosyo lwa Isakali, ŵatite,

"Sabuloni, asichile mu ulendo wao wakwausya malonda mu bahali.

Nombe che Isakari, ipanje yakwe ijonjesyeche ali pamangwakwe.

19 Chiŵaalaliche achalendo ajaule ku matumbi gao,

ni kutyosya mbopesi syasikusachilwa kweleko.

Pakuŵa ŵanyao chapate ipanje yaijinji kutyochela ni masengo gaakugapanganya ku bahali

ni indu yakuikolosya munsanga wa ku mbwani."

20 Yankati lukosyo lwa Gadi, ŵatite:

"Alapikwe Akunnungu jwakungaŵila Gadi malo jekulungwa.

Gadi akuuŵilila nti lisimba,

ankwachule nkono pane liuwo.

21 Ŵalisagulile malo gambone kupunda gane gose

ŵelewo ŵapegwilwe malo jajikulungwa jajikusachilwa kupegwa chilongola.

Ŵalongwesye ŵandu kwapilikanichisya Ambuje Akunnungu,

katema ilongola ŵa Ŵaisilaeli paŵasongangene."

22 Yankati lukosyo lwa Dani ŵatite

"Dani ali mpela lisimba lyamwana

jwaakuguluka alinkutyochela ku Bashani.

23 Yankati lukosyo lwa Nafutali ŵatite

Alakwe Nafutali umpegwile upile kwannope ni Ambuje Akunnungu jwaali jwambone kukwenu,

lisi lyenu liiche mpaka kulujenda kwa litanda lya Galilaya."

24 Yankati lukosyo lwa Asheli ŵatite:

Ŵandu ŵa lukosyo lwa Asheli akwete upile kwapunda ngosyo syose sya che Yakubu,

ŵelewo chatendelwe kwa lusagu ni achalongo achinjakwe wose;

ni chilambo chenu chichigumbale miseituni.

25 Misi jenu chijilindililwe ni makumba gamaleu gagali ni milango ja isyano

ni chijiugalikwe katema kose.

26 Che Musa ŵaamalisisye kuŵecheta achitiji,

"Ŵanyamwe Ŵaisilaeli, ngapagwa ŵali mpela Akunnungu ŵenu,

ŵelewo ŵali kwinani, akutuluka pasi pano kukunkamuchisya,

ŵelewo akupita mwinani kwa ung'alime wakwe.

27 Akunnungu ŵa moŵa gose pangali mbesi ali chiutuchilo chenu;

machili gao gakuoneka pachilambo.

Ŵatopwele ŵammagongo ŵenu paujo penu,

ni ŵalamwile kuti mwaulaje.

28 Kwayele, Ŵaisilaeli chintame salama,

ŵanyamwe uŵelesi wa che Yakubu ngaansausya mundu jwalijose,

ku chilambo chachigumbele magungulo ni divai,

lisi lyalikunyelelwa ula kutyochela kwinani.

29 Ŵanyamwe Ŵaisilaeli nkwete upile.

Ngapagwa ŵali mpela ŵanyamwe, chilambo cha ŵandu ŵaŵankulupwisye Ambuje Akunnungu,

Ambuje Akunnungu nsyene ni ŵaali chakulichinga chenu,

ni upanga wenu kuti anlindilile ni kuntendekasya mwapunde ŵammagongo ŵenu!

Ŵammagongo ŵenu chaiche kukummenda mwakolele chanasa,

nombe ŵanyamwe chimwaliŵatile."

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?