Deuteronômio 32

1 "Mpilikane mwanya ŵanawose ŵanli Kwinani,

ŵanyamwe ŵanawose ŵanli pachilambo mpikanile maloŵe ginguŵecheta.

2 Majiganyo gangu tigapatuche mpela mandondwa ga ula.

Maloŵe gangu gatuluche mpela mangame,

Nti manyuunyu ga ula pa mimela jamwana,

Mpela ula jenandi pa mimela.

3 Pakuŵa chinalilape lina lya Ambuje Akunnungu,

ni ŵanyamwe njile, ‘Akunnungu ŵetu ali jwankulu!’ "

4 "Ambuje Akunnungu ali lwala, masengo gao gali ga utindimisyo,

matala gao gali gagoloka.

Akunnungu jwakulupilichika jwangali chilewo,

Akutenda yindu yaikuti kusachilwa ni pangali lusagu.

5 Nambo ŵanyamwe nganimma ŵakulupilichika kukwao,

ŵanyamwe ngankuŵajilwa kuŵa wanache ŵakwe sooni, kwaligongo lya ugongomalo.

Ŵanyamwe nli uŵelesi wachigongomalo ni ŵakulambusya.

6 Ana yeleyi ni inkuti kwalipa Ambuje Akunnungu,

ŵanya ŵakuloŵela unganinkola umanyilisi?

Ana ŵele ngaŵa atati ŵenu uŵangumbile?

Uŵampangenye ni kunlimbisya?"

7 "Nkumbuchile ya chikala, nganichisye iŵelesi ya kalakala yaipitile.

Mwausye achatati ŵenu chammanyisye,

Mwausye achachekulu ŵenu chansalile.

8 Akumanani paŵapele ŵandu ŵa ilambo malo gakutama gaŵe gao,

paŵagaŵenye ŵandu,

ŵaaŵichile mipika, malinga ni winji wa ŵanache ŵa Isilaeli.

9 Nambo ŵalisagulile uŵelesi u che Yakubu kuŵa ŵandu ŵankwe nsyene."

10 "Ŵaasimene ku chilambo cha lipululu,

mu ukweti wangali chindu kujikupepela mbungo.

Ŵaalindilile ni kwagosa,

mpela mundu yakuti kulindilila liso lyakwe.

11 Mpela kapungu jwakwajiganya wanache ŵakwe kuguluka,

ali atambasukwile mapapiko gakwe kuti akapatuka,

Ambuje Akunnungu ŵaagosile Ŵaisilaeli kuti akagwa.

12 Ambuje Akunnungu jikape ŵaalongwesye ŵandu ŵakwe,

Nganapagwa nnungu jwaine jwakunkamuchisya."

13 "Ŵaatesile apitile mu ikwesya,

nombewo ŵalile magowolo ga mmigunda.

Ŵaapele uuchi palwala,

ni mauta ga mseituni waumesile pa litaka lyalili ni maganga.

14 Ng'ombe syao ni ngondolo syao syakopweche maŵele gamajinji,

ŵakwete ngondolo syambone ni mbusi syambone ni ng'ombe syambone nnope,

ŵaapele ngano jambone nnope ni divai jambone nnope."

15 "Ŵandu ŵa Akunnungu ŵasichile kwannope nambo ŵaliji ŵakugalaukagalauka,

ŵajimbele ni kukola itambi ni kutindigala.

Ŵannesile Akunnungu uŵagumbile, ŵankanile Lwala lwa Ukulupusyo wao.

16 Ŵantendekasisye Akunnungu akole wiu ni chisongo, ligongo lya minungu jao,

ŵantesile atumbile kwa ipanganyo yao yakuchimasya.

17 Ŵatyosisye mbopesi syakutinisya kwa masoka, yanganaŵa Akunnungu,

minungu janganajimanyilila,

minungu jasambano jajimanyiche nachiŵandika muno

Minungu janganajijogopanga achachekulu wenu.

18 Ŵaaliŵalile Akunnungu jwali nkulupusyo jwankulu,

jwelejo juŵammeleche."

19 "Ambuje Akunnungu ŵachiweni chindu chi ni ŵaakanile,

pakuŵa ŵatumbilikasiswe ni achiŵanagwe ŵachilume ni ŵachikwongwe.

20 Ŵatite, ‘Ngaanyendelechela kwakamusya,’

‘Nole mbesi jao chijiŵe jantiuli,

Pakuŵa ŵelewo aŵele uŵelesi welyungasiche, ni ŵangakukulupilichika.

21 Andesile ngole wiu kwa chindu chati ngaŵa nnungu,

andumbilikasisye kwa inyago yao,

chinjatenda ŵakolele wiu ŵandu ŵaangakwamanyilila,

chinaatumbilikasye kwakwatumia ŵandu ŵakulowela.

22 Pakuŵa lutumbilo lwangu lukolele nti mooto,

lukutinisya mpaka peuto pa ŵandu ŵawile,

chilutinisye chilambo pamo ni magowolo gakwe,

ni kukolesya mooto pa misingi ja itumbi.’ "

23 " ‘Chinjaichisya limbulunga lyangali mbesi,

chinjaputa ni mipamba jangu jose.

24 Tachiwa kwa sala ni kukolela mooto pa chiilu,

tachiwa kwa ilwele yakogoya.

Tinaichisye inyama yachikali yaaguluchile,

ni majoka gagali ni sumu gaalume.

25 Ngondo tijiichisye iwa yejinji paasa pa majuumba genu,

ni mmajumba gao lipamba chilijenele.

Achachanda ŵenu ni achiŵali ŵenu chaulajikwe,

namose ŵanache ŵakonga pamo ni achachekulu ŵaali ni uli.

26 Natite chinaajonanje tikitiki,

ni kwatesya akakumbuchilwa sooni ni mundu jwalijose.

27 Nganinaalechelela ŵammagongo ŵao alilape,

ŵammagongo ŵao akaganichisya ine,

akaika kusala kuti, akombwele kwajonanga,

ni une Ambuje Akunnungu nganimbanganya chachilichose.’ "

28 "Ŵandu ŵa chilambo cha ku Isilaeli ali ŵandu ŵangali umanyilisi,

ŵandu wo nganakola lunda.

29 Akakwete lunda akaimanyilile kuti ligongo chi ŵalepele,

akakombwele kwimanyilila mbesi jao chijiwe uli!

30 Ikukomboleka chinauli jwangondo jumo jwa ŵammagongo kwapunda ŵandu elufu moja,

pane ŵangondo ŵaŵili ŵa ŵammagongo kwapunda ŵandu elufu kumi?

ngaikaŵe kuti Akunnungu jwao ŵajasile,

ni Ambuje Akunnungu jwao ŵalesile.

31 Namose ŵammagongo ŵetu akwimanyilila kuti minungu jao nganijikola machili,

mpela Akunnungu jwa ku Isilaeli.

32 Pakuŵa ŵammagongo ŵao ahalibiche kwa ugongomalo mpela ku Sodoma ni ku Gomola,

ili mpela misabibu yaikusogola isogosi yakuipa ni yaili ni sumu,

33 Divai jao jili mpela divai jekolochekwe kutyochela ni sumu jakalipa ja majoka."

34 "Ambuje Akunnungu akuikumbuchila yaitesile ŵammagongo ŵao

akulindilila katema kambone kakwaputa

35 Kuuchisya kuli pa une,

uneji chinaliuchisye,

pachijiiche ndaŵi jakwe;

pakuŵa lyuŵa lyao lya limbulunga liiche,

mbesi jao jiŵandichile kwannope.

36 Ambuje Akunnungu chiŵachenjele ŵandu ŵakwe,

ni kwakolela chanasa ŵakutumichila ŵao,

katema pachiŵaone amalilwe machili,

atamuno pangali jwasigele, mundu jwataŵikwe pane junganataŵikwa.

37 Nipele Ambuje Akunnungu tachiuusya,

‘Jilikwapi minungu jenu,

lwala lumwaluutuchile kuti mme salama?’

38 Jilikwapi minungu jenu jijalile mbopesi jenu jakutinisya

ni kung'wa sadaka ja divai jimwapele?

Nipele ni jijimuche, jinkamuchisya;

nneche jele minungu jo jinlindilile!"

39 "Nnole une ndili Akunnungu

ni ngapagwa jwine nambo unepe;

une nguulaga ni kusyusya;

kuulasya ni kulamya,

ni ngapagwa jwalijose jwakukombola kukanila achila chinguchipanganya.

40 Kusyene mpela une Akunnungu jungutama pangali mbesi

ngunyakula nkono wangu ni kulumbila,

41 iŵaga timmone ndili ngunola upanga wangu wa kunyesima

ni kugolosya nkono kutyosya ulamusi.

Tinjiliusisya kwa ŵammagongo ŵangu

tinjajamuka aŵala ŵakunjima.

42 Mipamba jangu tijichejele pyuu kwa myasi jao,

ni upanga wangu tiuulaje wose ŵaakunganila.

Ngananneka jwalijose jwakumenyana ni une

namose ŵaaulele ni ŵataŵikwe chachiwa."

43 "Ŵanyamwe ŵandu ŵa ilambo yose, mwasangalalile ŵandu ŵakwe,

pakuŵa Ambuje Akunnungu taliuchisye kwaligongo lya ŵandu ŵakwe

taliuchisye kwa ŵammagongo ŵakwe,

ni kulechelesya sambi sya ŵandu ŵakwe."

44 Che Musa ni che Yoshua mwanache ju che Nuni, ŵagasasile maloŵe gose ga lujimbo lo kuti Ŵaisilaeli agapikanile.

Maloŵe ga mbesi ga che Musa

45 Che Musa paŵamasile kwasalila ŵandu ŵa ku Isilaeli aga maloŵe gose ga, 46 ŵasaalile sooni kuti, "Ngaŵiche muntima malajisyo gose gingumpanga lelojino ga. Nkusachilwa mwalamulile ŵanache ŵenu kuti agapilikanichisye kwakukulupilichika maloŵe gose ga malajisyo ga. 47 Pakuŵa malajisyo ga nganigaŵa maloŵe pe nambo gali umi wenu. Ngapilikanichisye malajisyo ga ni ŵanyamwe chinkatame moŵa gamajinji ku chilambo chinkwaula kuchitenda chenu pesi lusulo lwa Yolodani."

48 Lyuŵa lilyolyo, Ambuje Akunnungu ŵansalile che Musa kuti, 49 "Nkakwele pa itumbi ya Abalimu, mpaka chitumbi cha Nebo chachili ku chilambo cha ku Moabu, mwakulolegana ni musi wa ku Yeliko, nchilole chilambo cha Kanaani chele chingwapa Ŵaisilaeli kuti chiŵe chao. 50 Nipele chinkawilile kukoko ku chitumbi ko mpela nkulugwenu che Aloni juŵawilile ku chitumbi cha Holi, 51 Ligongo ŵanyamwe wose ŵanaŵaŵili nganinlosya chikulupilichiko kukwangu paujo pa Ŵaisilaeli. Ndaŵi jimwaliji akula ku meesi ga Meliba, kuŵandikana ni musi wa ku Kadeshi, kulipululu lya Sini, nganimunjimbichisya une paujo pa Ŵaisilaeli. 52 Kwayele chinchione chilambo cho mmbujo mwenu, nambo nganjaula kwinjila ku chilambo chingwapa Ŵaisilaeli cho."

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?