1 "Katema kala, Ambuje Akunnungu ŵasalile, ‘Nsepe ibao iŵili ya maganga mpela yandanda ila, ni lisanduku lya mbao, nipele nnyiche kukwangu akuno ku litumbi kuno. 2 None chinembe maloŵe ganalembile mmaganga gandanda gamwatemangwile gala, ni chingaŵiche mu lisanduku mo.’"

3 "Nipele, nakolosisye lisanduku lya chitela cha nsonobali ni ibao iŵili ya maganga mpela yandanda ila, ni najigele mmakono ni napite nayo kulitumbi. 4 Ambuje Akunnungu ni ŵalembile pa ibao yo maloŵe galagala giŵalembile pa maganga gandanda gala. Malajisyo kumi gaŵampele ŵanyamwe ndaŵi jaŵaŵechete pa mooto, pa lyuŵa limwasongangene kwitumbi kula. Nipele Ambuje Akunnungu ŵambele une ibao yo. 5 Nagalawiche ni kutuluka ku chitumbi kula, nagaŵisile maganga go mu lisanduku linapanganyisye mpela iŵanajisye Ambuje Akunnungu, ni ili chiŵela mwelemo."

6 Ŵaisilaeli ŵajendelechele ni ulendo wao kutyochela kuyaliji isima ya ŵandu ŵa lukosyo lwa Yaakani ni ŵapite ku Mosela. Kweleko che Haluni ŵawile, ŵasichikwe. Che Eleasali mwanagwe jwachilume, ŵajinjile kuŵa jwambopesi pamalo pakwe. 7 Kutyochela ku Mosela po, Ŵaisilaeli ŵapite ku Gudigoda, ni ŵapelengenye kwaula ku Yotibata chilambo cha sulo syejinji sya mesi. 8 Katema ko Ambuje Akunnungu ŵaasagwile ŵandu ŵa lukosyo lwa Lawi kuti aŵe ŵa kulinyakula Lisanduku lya Malangano, ŵaatumichile Ambuje Akunnungu nti ŵambopesi, ni kwapa upile ŵandu kwa liina lya Ambuje Akunnungu, mpela yaili mpaka lelojino. 9 Lyele ni ligongo lukosyo lwa Lawi nganapegwa malo jakuŵa jawo mpela iŵatite kupegwa achalongo achinjawo ngosyo sine, chiŵapochele chili luchimbichimbi lwa kuŵa ŵambopesi ŵa Ambuje Akunnungu, mpela Ambuje Akunnungu, Akunnungu ŵenu iŵatite kulanga.

10 "Natemi ku chitumbi kwa moŵa alubaini, muusi ni chilo, nti inatesile kuundanda. Ambuje Akunnungu, ŵambikanile, ni sooni ŵakundile kuti ngaŵaajonanga achachekulu ŵenu. 11 Nipele ŵasalile, ‘Ntyoche njendelechele ni ulendo wenu nli kwalongosya ŵandu kuti ajinjile ni kuchijigala chilambo chinaalumbilile achachekulu ŵenu kuti chinampe.’"

12 "Sambano, ŵanyamwe Ŵaisilaeli, Ambuje Akunnungu, Akunnungu ŵenu ngakusaka chachili chose kukwenu, nambo kwajinichila Ambuje Akunnungu, Akunnungu ŵenu, kugakuya malajisyo gao gose, ni kwanonyela, ni kwatumichila Ambuje Akunnungu, Akunnungu ŵenu, kwa ntima wenu wose ni mbumu jenu jose, 13 ni kwitichisya makanyo ni mashalaiti ga Ambuje Akunnungu gingumpanga lelo jino kuti jiŵe mboka jenu mwachimisyene. 14 Nnole, kwinani, namose kwinani kwakuli kwinani nnope ili yao Ambuje Akunnungu, ni chilambo pano yose yaili mwelemo ili yao. 15 Namose yeleyo Ambuje Akunnungu ŵaliji ni lung'wanu ni achachekulu ŵenu, ni ŵaanonyele nnope ni kunsagula ŵanyamwe ŵanli iŵelesi yao, kuŵa ŵandu ŵakwe pasikati ja ŵandu wose, nti yaitite kuŵa lelo jino. 16 Kwayele kutandilila sambano, mwapilikanichisye Ambuje Akunnungu, ni ngasimma ŵandu ŵamakani sooni. 17 Pakuŵa Ambuje Akunnungu, Akunnungu ŵenu, ali Akunnungu ŵa minungu ni Ambuje ŵa achambuje, Ŵelewo ali Akunnungu ŵakulu ŵali ni machili, ni ŵakwajogopa; ŵangali lusagu sooni ngakupochela hongo. 18 Akwachenjela ŵamalekwa ni achakongwe ŵawililwe ni achiŵankwao; akwanonyela achalendo ŵakutama pasikati jenu ni kwapa yakulya ni yakuwala. 19 Nipele, mwanonyele achalendo pakuŵa nombe ŵanyamwe mwaliji achalendo ku chilambo cha ku Misili kula. 20 Mwajinichile Ambuje Akunnungu, Akunnungu ŵenu ni kwapopelela ŵelewo jikape; nkamulangane nawo kwa kukulupilichika ni nlumbileje kwa liina lyao pe. 21 Ŵelewo ni ŵakuŵajilwa kwalapa; ni ŵaali Akunnungu ŵenu ni uŵantendele indu yekulungwa ni yakogoya imwalionele mwachinsyene. 22 Ndaŵi jiŵajaulaga achachekulu ŵenu ku Misili, ŵaliji ŵandu sabiini pe, nambo sano Ambuje Akunnungu, Akunnungu ŵenu, anchulwiye mpela ndondwa sya kumaunde."