1 "Iŵaga nkujiwona ng'ombe pane ngondolo ja nlongo njenu Mwisilaeli jili jipotele, nkajileka, nambo njisakule kujiusya kwa asyene. 2 Iŵaga nsyene jo ngakutama chiŵandi ni mmwe pane iŵaga ngankwamanyilila njisakule mpaka kumangwenu, njigose mpaka nsyene jo pachaiche kujisosa, nomwe mwapeje. 3 Ntendeje iyoyo peyo iŵaga nkujisimana mbunda ja mu Isilaeli njenu pane chakuwala chakwe pane chilichose chachipotele. Nkalitenda kuti nganinchiwona."

4 "Iŵaga nkujisimana mbunda pane ng'ombe ja mu Isilaeli njenu jili jigwile mwitala nkalitenda kuti nganimwawona. Munkamuchisye njenu jo kuti achijimusye chinyama chakwe."

5 "Achakongwe akawala yakuwala ya achalume ni achalume akawala yakuwala ya achakongwe. Ambuje Akunnungu, Akunnungu ŵenu akwachima ŵandu ŵakutenda yeleyo."

6 "Iŵaga nkuchisimana chisusi cha chijuni, iweje mu chitela pane paasi, nangolo ali awutamule mandanda, pane ali ni makandi gakwe, nkajigala nangolo ni makandi gakwe. 7 Nkukombola kugajigala makandi gakwe, nambo nangolo munneche aguluche ni kwaula, kwakutenda yeleyo Ambuje Akunnungu chantende indu yenu injaulile yambone ni chintame moŵa gamajinji."

8 "Pankutaŵa nyuumba nsyunguchisye nchejeka mumbali mwa nsakasa, akaika ŵandu kunlalatila iŵaga mundu agwile kutyochela kweleko ni kuwa."

9 "Nkapanda mbeju sya mitundu jiwili mu ngunda wenu wa misabibu, mwatendaga yeleyo, kutandilila isogosi ya misabibu ni mbeju sine syo ngaikundikwa paujo pa Akunnungu."

10 "Nkataŵa ng'ombe ni mbunda kuti ilimeje pamo."

11 "Nkawala nguo jakupanganyikwa mwakupwatikanya usi wa manyunya ga ngondolo ni nguo jeswele mbee."

12 "Ntaŵe iundo mu mbande ncheche sya chakuwala chenu."

13 "Mundu alombelaga mwali ni kugona nawo, panyuma pakwe ni akusala kuti ngakunsaka mwali jo, 14 ni akutanda kunlambuchisya indu ya unami yakutesya soni, ni yakusakasya mbili jakwe, pakusala kuti, ‘Mwali ju nganawoneka kuti ŵaliji mwalimwalipe pa lyuŵa linanlombile.’ "

15 "Nipele achinangolo ŵa mwali jo ajigale chimanyisyo chachikulosya kuti mwali jo ŵaliji umwalimwalipe ni kuchijausya kwa achakulu pa nnango wekulungwa wa musi wo. 16 Atatigwe mwali jo chiŵaasalile achakulu ŵapankungulu wo kuti, ‘Nanlombekasisye mwali jwangu kwa jwanchanda ju nambo sambano ngakunsaka, 17 Sano akunlambuchisya indu ya unami pakusala kuti nganawoneka kuti ŵaliji mwalimwalipe pa lyuŵa linanlombile. Nambo apano chipali chindu chakulosya kuti mwali jwangu ŵaliji mwalimwalipe’ Nipele achinangolo ŵakwe chasambalukule nguo ni kulosya umboni wo kwa achakulu ŵa musi. 18 Pelepo achakulu ŵa musi chankamule jwele jwannume jo ni kumputa mbokola. 19 Chanlipisye mundu jo ipande mia moja ya madini ga feza ni kwapa atatigwe mwali jo, pakuŵa jwannume jo antendekasisye mwali jwa Chiisilaeli aŵilanjikwe liina lyangalumbana. Nombe jwankongwe jo chaŵe ŵankwakwe, ni ngaakombola kwapa talaka mu umi wakwe wose."

20 "Nambo iŵaga magambo go gali ga isyene, ni nganiupagwa umboni wakulosya kuti mwali jo ŵaliji umwalimwalipe, 21 chanjigale mwali jo mpaka pannango wa nyuumba ja atatigwe, ni kweleko ŵandu ŵa mmusi mo amponye maganga mpaka kuwa. Atesile chindu chaasoni mu Isilaeli kwa kutenda chigwagwa ali mu nyuumba ja atatigwe. Kwa kutenda yeleyo chinchilekasya ugongomalo wo pasikati jenu."

22 "Mwansimanaga jwannume ali nkutenda chikululu ni jwankongwe jwa mundu jwine, wose ŵanaŵaŵili aulajikwe. Kwakutenda yeleyo chinchilekasya ugongomalo wo pasikati jenu."

23 "Jwannume ansimanaga ku boma mwalimwalipe jwatomelwe, ni kugona nawo, 24 mwapeleche ŵanawose ŵaŵili paasa musi ni kwaponya maganga mpaka awe. Mwali jo akusachilwa aulajikwe ligongo ngananyanyisya kuti ŵaakamuchisye nachiŵamuno ŵaliji mboma, ni jwannume jo nombe aulajikwe ligongo ansakesye jwankongwe jwatomelwe ni njakwe. Kwakutenda yeleyo chinchilekasya ugongomalo wo pasikati jenu."

25 "Nambo jwannume ansimanaga mwali jwatomelwe kumigunda ni kunkamulila, jwannume jwatesile yeleyo jo jika ni juchaulajikwe. 26 Mwali jo nkampanganyichisya chachili chose, jwelejo nganaleŵa mwakuichila kulamulikwa kuulajikwa. Chele chindu chi chili yalumo ni cha mundu jwakungunguluchila njakwe ni kummulaga mwamele, 27 pakuŵa jwannume jo ŵansimene mwali jo kumigunda, nachiŵamuno mwali jo ŵagumisile, nganapagwa mundu jwakunkamuchisya."

28 "Jwannume asimanaga mwali jwangatomelwa, ankamulilaga ni ŵandu kwasimanila, 29 jwannume jo anlipe atatigwe mwali jo ipande hansini ya feza ligongo ansakesye, ni mwali jo aŵeje ŵankwakwe, ni ngaakombola kwaleka mu umi wakwe wose."

30 "Jwannume akagona ni jwankongwe jwa atatigwe. Chelechi chichinjalusye atatigwe."